Abavakalisi BoBukumkani Bayabalisa
Ukusuka Kudandatheko Ukusa Kulonwabo
UYEHOVA unguThixo owonwabileyo. (1 Timoti 1:11, NW) Ufuna abo bamkhonzayo nabo bonwabe. Ngenxa yoko, ukuba omnye wabakhonzi bakhe udandathekile, uYehova uya kumnceda ukuba anyamezele intlungu yaye ngamanye amaxesha amncede afumane umoya owonwabileyo kwakhona. Amava alandelayo avela eUruguay acacisa oku.
Udade wayelinde iziphumo zoxilongo lweX-reyi kwikliniki eseMontevideo. Inenekazi elalihleli kufuphi naye lalikoyika kakhulu oko ugqirha wayesenokukuxelela lona okungumphumo woxilongo oluye lwenziwa kulo. Udade walixelela ukuba okoko waba liNgqina likaYehova, akazange oyike nto. Phofu ke, inenekazi lamxelela ukuba lalingawathandi amaNgqina kuba ayelindele umgangatho ophakame kakhulu emntwini.
Ngoko ke udade walixelela indlela ulwazi lwenyaniso yeBhayibhile olwamnceda ngayo. Wayefelwe yintombi yakhe eneminyaka eli-18 ubudala yaye wayedandatheke ngokunzulu kangangeminyaka esibhozo. Oogqirha bezifo zengqondo okanye amayeza axabiso likhulu abazange bamncede ukuba oyise olu dandatheko. Wathi, kangangamaxesha amaninzi wayelaliswa esibhedlele, kodwa oku akuzange kuziphucule iimeko. Indlu yakhe yayinyanyekelwa zizicaka kuba yena ngokwakhe kwakungekho nto wayenokuyinyamekela. Wazama ukuzibulala kuba weyephelelwe ngumdla ebomini. Akukho nto yabonakala inganceda.
Walixelela inenekazi ukuba, ngaminazana ithile omnye wamaNgqina wamtyelela waza wamshiyela uncwadi lweBhayibhile. Oko kwambangela umdla kwiLizwi likaThixo, yaye waqalisa ukufunda iBhayibhile okokoko. Kwaqalisa inguqulelo ethile ngaphakathi kuye. Waqalisa ukuvuka kusasa aze abe nokuyinyamekela ngomdla indlu yakhe. Ekugqibeleni wagqiba ekubeni ayinyamekele ngokwakhe indlu yaye wafumanisa ukuba wayenako ukukwenza oko. Kwaba ngathi akazange agule! Oku kwamenza waziva onwabe kakhulu.
Akazange abuyele kugqirha wezifo zengqondo. Umnqweno wakhe wokuphila wavuselelwa lulwazi lwakhe lweLizwi likaThixo, yaye oku kwangqineka kulelona yeza. Wakhangela amaNgqina kaYehova, yaye aqalisa isifundo esithe rhoqo kunye naye. Waqalisa nokuya kwiintlanganiso, yaye ngokukhawuleza wabhaptizwa. Engasakhathazwa ludandatheko, ngoku ufumana uvuyo ekukhonzeni uYehova.
Inenekazi elalikwigumbi lokulindela laphulaphula ngenyameko. Landula ke lathi kulo dade: “Kangangethuba elide, amaNgqina kaYehova ebesoloko edibana nam; kodwa ukuba kwixesha elizayo, kunokwenzeka ngokwenene ukuba ndibe ngomnye wamaNgqina kaYehova, kuya kuba ngenxa yoko usandul’ ukundixelela kona. Ukukuphulaphula kufana nokuqalisa ukubona ukukhanya kwindawo emnyama.”
Abantu abaninzi kulo lonke ihlabathi bayabubona ubuze bokuzama ukuzicombulula ngokwabo iingxaki zobomi, yaye baphethukela kuYehova uThixo. Olunjani uvuyo abanalo bakufunda ngehlabathi elitsha elizayo likaThixo apho wonke ubani eya konwaba, yaye udandatheko luya kuba yinto yexesha elidluleyo!—IMizekeliso 16:20.