Xa Isifo Esinganyangekiyo Sihlasela Intsapho

INTSAPHO yakwaDu Toit yonwabe ngendlela emangalisayo. Ukuthandana kwayo ngokufudumeleyo kuyinto eyonwabisayo. Xa uthetha nayo akunakuze utsho ukuba iye yanyamezela iinzingo eye yazinyamezela.

Okokuqala, xa umntwana wabo wokuqala uMichelle, wayeneminyaka emibini, uBraam noAnn bafumanisa ukuba unesifo esinganyangekiyo esikwimizila yemfuza esasibangela ukuba buthathaka kwezihlunu.

Unina uAnn uthi: “Ngequbuliso, kuye kufuneke ufunde indlela yokuhlangabezana nesi sifo singanyangekiyo nesitheza amandla. Ufumanisa ukuba izinto azisayi kufana entsatsheni.”

Kodwa emva kokuba kuzelwe enye intombi nonyana wabo, le ntsapho yehlelwa yenye intlekele. Ngenye imini bathi aba bantwana besadlala phandle, amantombazana amabini angena egxalathelene endlwini. Ayekhwaza esithi: “Mama! Mama! Khawuleza uzokubona. UNeil uyagula!”

Njengoko waphuma ekhawulezile, uAnn wabona uNeil etyekisele intloko calanye. Wayengakwazi ukuyimisa nkqo.

UAnn ukhumbula oku: “Ndothuka ndaphants’ ukufa kuba le nto yenzeka nje ngephanyazo. Eyona yayindenza intliziyo ebuhlungu kukucinga ukuba le nkwenkwana isempilweni iza kujamelana nocelomngeni lwezihlunu ezibuthathaka kanye njengodadewabo omkhulu kunayo.”

Uyise uBraam uthi: “Uvuyo lokukhulisa intsapho esempilweni lwakhawuleza lwaphazanyiswa zezona nkathazo zinkulu kwesakha sajamelana nazo.”

Ekugqibeleni, nangona wafumana olona nyango lusemgangathweni esibhedlele, uMichelle wafa ngenxa yeengxaki ezazibangelwa kukugula kwakhe. Wayeneminyaka eli-14 ubudala kuphela ngelo xesha. UNeil usaqhubeka enyamezela ubunzima obubangelwa sisifo sakhe.

Oku kubangela ukuba kuphakame lo mbuzo, Iintsapho ezifana neyakwaDu Toit zihlangabezana njani nocelomngeni lokuba nelungu lentsapho elinesifo esinganyangekiyo? Ukuze uphenduleke lo mbuzo, makhe sihlalutye ezinye iindlela intsapho echatshazelwa ngazo sisifo esinganyangekiyo.