Zikhusele Kunye Nabo Ubathandayo

I-INTERNET inokuba sisixhobo esiluncedo. Kodwa kanye njengezinye izixhobo, inokusetyenziswa kakubi. Yaye icyberporn—amanyala aboniswa kwikhompyutha—angumzekelo wokusetyenziswa kakubi kwayo. Kuba beyazi indlela eyingozi ngayo le mifanekiso, abazali bafanele benze konke okusemandleni abo ukuthintela abantwana bangangeni kumajelo athandabuzekayo eInternet. Incwadana ethi Teen Safety on the Information Highway inikela inkcazelo ebalulekileyo kule nkalo. Ithi: “Ngoku kukho iinkqubo ezinceda ekukhetheni nasekuhluzeni ukufaneleka kweeweb sites, nto leyo enceda abazali bakwazi ukuthintela ezo bazigqala zingafanelekanga. Ezi nkqubo zisebenza ngeendlela ezahlukeneyo. Ezinye zithintela iiweb ezinenkcazelo engafunwayo. Ezinye zithintela abasebenzisi beekhompyutha ukuba bangazifumani iinkcukacha ezithile njengegama nedilesi yabo. Ezinye iinkqubo zithintela abantwana ukuba bangakwazi ukusebenzisa amajelo onxibelelwano okanye bangakwazi ukuthumela nokufunda imbalelwano ngekhompyutha. Ngokuqhelekileyo abazali baye bazisebenzisele ezi nkqubo ukuthintela kuphela iiweb sites abazigqala zingafanelekanga.”—Bona kwanebhokisi enomxholo othi “Ukukhusela Abantwana Emanyaleni.”

Noko ke, limele liqondwe elokuba kulinganiselwe okunokwenziwa ngabazali ukuze bawahluze ngokupheleleyo amajelo angafunekiyo anokubonwa ngabantwana babo. Abanakukwazi ukubukela abantwana babo mzuzu ngamnye. Yaye umntwana okanye oselula ongakwaziyo ukuwabukela amanyala ekhaya unokuwabukela ngokungenamlinganiselo kwikhompyutha yasesikolweni okanye ekhayeni lomntwana afunda naye. Ngoko ukongezelela ekwenzeni konke okusemandleni abo ukuze bathintele abantwana babo bangawaboni amanyala, abazali bafanele babancede babe nesazela esiphilileyo esiya kubakhuthaza ukuba bangawabukeli amanyala bengadanga banyanzelwe.

Bekuya kuba yimpazamo ukucinga ukuba abantu abadala banokuwabukela amanyala kunokuba benjalo abantwana. Njengoko siye sabona kwinqaku elandulelayo, amanyala akamele abukelwe nangubani na!

Noko ke, masithi ububukela amanyala kangangethuba elithile. Ufumanise ukuba le nto uyenzayo ayimkholisi uThixo, yaye ufuna ukwahlukana nalo mkhwa. Ungakwazi? Ewe, unako. Abantu bahlukana nemikhwa emibi mihla le. Ukuba ngokwenene ufuna ukwahlukana namanyala, ungayenza loo nto.

Ukuba Ufuna Ukwahlukana Nawo

Inyathelo lokuqala kukuyeka ukubukela amanyala—ngokukhawuleza! Okukhona uye uzibekela amangomso izinto kokukhona kuya kuba nzima ukuyeka. Noko ke, ukuyeka ngokoqobo akulula kunokuyeka ngomlomo. Ngokusengqiqweni, iBhayibhile ithi isono sinokuba mnandi okomzuzwana. (Hebhere 11:25) Kodwa isono sikwanokukhokelela ekufeni. (Roma 6:23) Ekuqaleni usenokuzingxengxezela ngokumana ubukela amanyala. Musa ukuyekela kuloo nto! Yaye musa ukuyekela kwisilingo sokumana uwabukela!

Njengoko kuye kwatshiwo ngaphambilana kolu ngcelele, ukubukela amanyala kunokuyichaphazela ngokunzulu indlela ophila ngayo. Khawukhe uhlolisise ngenyameko indlela lo mkhwa oluchaphazela ngayo ulwalamano lwakho nentsapho nabahlobo bakho. Ngaba ungumyeni nobawo? Kusenokwenzeka ukuba umfazi nabantwana bakho baye baphawula utshintsho kwindlela owenza ngayo izinto. Emva kokuba uqale ukubukela amanyala, usenokuba usoloko untshingintshingi, uyaqumba, unezinto ozifihlayo, okanye uyazikhetha—ekusenokwenzeka ukuba wena akuyiphawuli loo nto. Maxa wambi usenokuba ukhe ungxolise amalungu entsapho ngaphandle kwesizathu. Ukuba ubukela amanyala, indlela ozenza ngayo izinto isenokuba iyakuntama. Abahlobo namalungu entsapho basenokuphawula ukuba ikho le nto ingahambi kakuhle. Abakayazi ukuba yintoni—okwakalokunje!

Ukuba ufumanisa ukuba uyatsaleleka emanyaleni, musa ukuzama ukulwisana naloo nto ngokwakho. Funa uncedo. Funa uncedo lomhlobo onamava. Liyinyaniso elokuba, kufuna inkalipho ukuvuma ukuba unengxaki yokubukela amanyala, kodwa umhlobo oqolileyo uya kukuncoma ngokuthabatha amanyathelo okuphelisa lo mkhwa.

Umnqweno onamandla wokukholisa uThixo ngokuqinisekileyo usesona sizathu sinamandla sokulwa nokubukela amanyala. Xa sibambelela kwikhondo lobulumko, sivuyisa intliziyo kaThixo. (IMizekeliso 27:11) Xa silandela ikhondo eliphosakeleyo, siyenza ibe “buhlungu intliziyo yakhe.” (Genesis 6:6) Ukuba ungumKristu, ngaphandle kwamathandabuzo uyixhalabele indlela avakalelwa ngayo uThixo. Kwakhona ufanele uyixhalabele indlela oyisebenzisa ngayo ingqondo nentliziyo yakho, ozahlulele kuThixo nofanele uzigcine zicocekile ukuze zifeze inkonzo yakhe. (Hezekile 44:23) IBhayibhile ibongoza amaKristu ukuba ‘azihlambulule kuko konke ukudyobheka kwenyama nokomoya, egqibelelisa ubungcwele esoyika uThixo.’ (2 Korinte 7:1) Ewe, ukoyika ngokupheleleyo ukungamkholisi uThixo, obona zonke izinto, kunokukukhuthaza ukuba wahlukane nokubukela amanyala.

Noko ke, masithi njengoko usiwa uvuka uzama ukwahlukana nalo mkhwa, ungacingelanga uvula iWeb site ebonisa amanyala. Lishiye ngokukhawuleza elo jelo! Ukuba kuyimfuneko, yivale i-Internet! Ukuba uziva ufuna ukubuyela, thandaza kuThixo ngokunyanisekileyo, umcele akuncede uxhathise esi silingo. IBhayibhile ithi: “Ezintweni zonke zaziseni izibongozo zenu kuThixo.” Ukuba ungcungcuthekiswa ziingcinga ezingafanelekanga, thandaza de ufumane isiqabu. Ngoko ke “uxolo lukaThixo olungaphaya kokuqonda luya kuzilinda iintliziyo zenu namandla enu engqondo.” (Filipi 4:6, 7) Kambe ke, kuya kufuneka uthabathele indawo yeengcinga ezingafanelekanga ‘ngeziyinyaniso, ezizezenkxalabo enzulu, ezibubulungisa, ezinyulu, ezithandekayo, nekuthethwa kakuhle ngazo.’—Filipi 4:8.

Usenokukufumanisa kuluncedo ukukhumbula nokucamngca ngezibhalo zeBhayibhile ezifana nezi zilandelayo.

“Nina nithanda uYehova, kuthiyeni okubi.”—INdumiso 97:10.

“Ndiyawuqoba umzimba wam ndize ndiwuphathe njengekhoboka, ukuze, emva kokuba ndishumayele kwabanye, mna ngokwam ndingabi ngongakholekanga ngandlel’ ithile.”—1 Korinte 9:27.

“Bhubhisani, ke ngoko, amalungu enu omzimba asemhlabeni, uhenyuzo, ukungahlambuluki, inkanuko yesini.”—Kolose 3:5.

‘Ngamnye wenu ufanele akwazi ukusizuza esakhe isitya ngobungcwalisa nembeko, kungekhona ngenkanuko yesini.’—1 Tesalonika 4:4, 5.

“Wonk’ ubani oqhubeka ekhangela umfazi ngokokude amkhanuke sele emkrexezile entliziyweni yakhe.”—Mateyu 5:28.

“Amadoda afanele abathande abafazi bawo njengemizimba yawo. Lowo umthandayo umfazi wakhe uyazithanda.”—Efese 5:28.

Zininzi izizathu zokuwaphepha amanyala. Anokubuchaphazela ngendlela ephawulekayo ubomi bakho, agqwethe indlela ozibona ngayo izinto, onakalise ulwalamano lwakho nabanye, yaye eyona nto ibalulekileyo kukuba, anokonakalisa nolwalamano lwakho noThixo. Ukuba awukangeni kumkhwa wokubukela amanyala, musa ukuba saqala. Ukuba ubusenjenjalo, wuyeke ngokukhawuleza! Enoba aboniswa encwadini okanye kwiphephancwadi okanye kwikhompyutha, amanyala akawafanele amaKristu. Waphephe ngandlela zonke!

[Ibhokisi/Umfanekiso okwiphepha 9]

Ukukhusela Abantwana Emanyaleni

La macebiso alandelayo anokukunceda ekukhuseleni abantwana bakho kwiingozi zamanyala aboniswa kwi-Internet.

● Musa ukuvumela umntwana wakho ukuba asebenzise i-Internet egumbini lakhe lokulala. Beka nayiphi na ikhompyutha kwigumbi elisetyenziswa ngawo onke amalungu entsapho.

● Zazi zonke iinkqubo zekhompyutha ezisetyenziswa ngumntwana wakho.

● Khangela ukuba umntwana wakho akazenzelanga iWeb site ngaphandle kwakho kusini na. Ukuze wenze oku zama ukukhangela igama lakhe kwiindawo zokwenza uphando ezigqogqa yonke inkqubo yeInternet. Bhala igama lakhe elipheleleyo libe kwiimpawu zocaphulo ukuphepha ukungena kumajelo angafanelekanga.

● Musa ukuvumela umntwana wakho ukuba adibane nomnye umntu onekhompyutha ongamaziyo.—Bona ibhokisi ethi “Akuloqwa Nje Izinto Ezingenamsebenzi.”

● Musa ukusabela kwimiyalezo okanye izinto ezivela kumajelo eendaba ezingcolileyo, ezikrwada, ezinobundlobongela okanye ezinezisongelo.

● Balumkise abantwana bakho ngokubukela izinto ezingafanelekanga kwi-Internet. Bafundise ukuba bathabathe isigqibo ngokwabo xa ungekho. Khumbula ukuba iikhompyutha zasesikolweni okanye ekhayeni lomhlobo azenzelwanga ukuba abantwana bangabukeli izinto ezingamanyala.

[Inkcazelo]

Le nkcazelo isekelwe ngokuyinxalenye kwincwadana ethi Child Safety on the Information Highway nakwinqaku elikwiLos Angeles Times, kaJulayi 5, 1999.

[Ibhokisi/Umfanekiso okwiphepha 10]

Akuloqwa Nje Izinto Ezingenamsebenzi

Kumele kulunyukelwe gqitha ukusetyenziswa kwejelo lokuncokola ekhompyutheni. Ijelo lokuncokola livumela abantu abasebenzisa i-Internet ukuba banxibelelane. Kambe ke, abantu abaninzi banxibelelana nezihlobo ezisenyongweni nge-E-mail. Abanye abantu abahlala kude namalungu eentsapho zabo bayakwazi ukunxibelelana ngokuthe rhoqo ngale ndlela. Kodwa kukho umahluko phakathi kokuthumela iE-mail kumntu omaziyo nokunxibelelana nomntu ongamaziyo. Ngaba ubuya kusuka nje utsale umnxeba uze uzenze umhlobo wakhe nabani na ophendula imfonomfono? Ubungayi kwenjenjalo! Ngoko kutheni usakha ulwalamano ekhompyutheni nomntu ongamazi kwaphela?

Enye ingxaki yokunxibelelana nomntu ongamaziyo yeyokuba usenokungabi yinto abonakala eyiyo. Ngokomzekelo, usenokuba ngumxhaphazi wabantwana ojonge amathuba okuzifikisela kumntwana okanye umntu oselula ongaqondiyo.

UParry Aftab, oligqwetha elijongene namatyala aphathelele i-Internet, wayichaza indlela enokwenzeka lula ngayo le nto. Wathi: “Ngokuqhelekileyo abantwana bayalivula eli jelo lokuncokola. Abantu abaxhaphaza abantwana bayayibona le nto, yaye bayayilandela incoko baze bakhangele abantwana abanesithukuthezi. Omnye umntwana usenokuthumela imiyalezo enjengethi ‘Abazali bam baqhawula umtshato . . . Ndiyamcaphukela umama, kuba akandithengeli umdlalo wekhompyutha endiwuthandayo.’ . . . Abo baxhaphaza abantwana bayangenelela baze bathi ‘Abazali bam baqhawula umtshato . . . Ndiyamcaphukela umama . . . Andiwufumani umdlalo endiwufunayo de ndiwuthengelwe nguMalume uTimmy. . . . Ekuphela kwento onokuyenza kukuya ngasezivenkileni uze udibane noMalume uTimmy.’” “UMalume uTimmy” ngulo kanye uxhaphaza abantwana.

Ngenxa yoko, abazali bafanele babe nolwalamano olufudumeleyo nolunomsa nabantwana babo. Qhubeka unxibelelana nabo ukuze abantwana bangayi kwiindawo ezingafanelekanga ukuze bafumane inkxaso engokweemvakalelo.

Abantu abakhulileyo abanesithukuthezi okanye abangonwabanga emitshatweni yabo abafanele babhenele kumajelo okuncokola akwikhompyutha ukuze bafumane inkxaso engokweemvakalelo. Kuyingozi ukubhenela kubantu ongabaziyo. Abanye abakhulileyo baye bashiya amaqabane abo baya kumntu “abadibene” naye ngekhompyutha.a

[Umbhalo osemazantsi]

[Umfanekiso okwiphepha 8]

Umthandazo unokukunceda uphephe esi silingo