Ungaphoswa!

YINTONI? YiNdibano YeSithili ‘Yabenzi BeLizwi LikaThixo’ YamaNgqina KaYehova! Olu thotho lweendibano, oluqale ngoMeyi eUnited States, luya kuqhutywa kumakhulukhulu ezixeko ehlabathini jikelele kwisithuba seenyanga eziliqela eziya kulandela. Kwiindawo ezininzi ucwangciso luya kuqalisa ngomculo ngeye-9:30 kusasa ngoLwesihlanu.

Emva kokuvula ngokhuthazo lokuthobela oko kuthethwa liLizwi likaThixo, ucwangciso lwakusasa luya kuqhubeka nentetho enomxholo othi “Khazimla Ngenxa Yokulunga KukaYehova” nenomxholo othi “Qhubekani Niqinile Ngokungathi Niyambona Lowo Ungabonakaliyo.” Emva koko ucwangciso lwakusasa luya kuqukunjelwa ngentetho engumxholo kule ndibano ethi, “Dumisa UYehova—UMenzi Wezinto Ezimangalisayo.”

Intetho yokuqala kucwangciso lwasemva kwemini enomxholo othi, “Musa Ukuyeka Ukwenza Okuhle,” iya kulandelwa lungcelele lweentetho ezintathu oluya kuxubusha ngendlela yokukhetha iqabane lomtshato, indlela yokwakha intsapho eyomeleleyo ngokomoya, nendlela yokufundisa abantwana ukuthanda uYehova. Intetho yokuqukumbela olo suku enomxholo othi, “Ukuhambisana Kunye Nentlangano KaYehova,” iya kuxubusha inkqubela eye yenziwa kumaxesha akutshanje ekuqondeni iinjongo zikaThixo.

Ucwangciso lwakusasa ngoMgqibelo luya kuba nolwesibini ungcelele lweentetho ezintathu olunomxholo othi “Abalungiseleli BeLizwi LikaThixo.” Ezi ntetho ziya kusicebisa ngendlela yokwenza umsebenzi wethu wokwenza abafundi. Emva koko kuya kubakho intetho enomxholo othi “Ukungamenzi Iintloni UThixo.” Emva koko kuya kubakho intetho yobhaptizo, yaye kuya kuvulwa ithuba lokubhaptizwa kwabo bakufanelekelayo ukwenjenjalo.

Emva kwemini ungcelele lwesithathu lweentetho luya kubalaselisa umxholo othi “Zibhokoxe Ukuze Uhlale Uphilile Ngokomoya,” apho kuya kunikelwa amacebiso aluncedo aphathelele indlela yokuzabalazela ukukhula ngokomoya. Olu cwangciso luya kuqukunjelwa yintetho efundisayo enomxholo othi “Ukuhamba Ekukhanyeni Okuqhubekayo KweLizwi LikaThixo.” Le ntetho iya kuxubusha uIsaya isahluko 25 nesama-26 yaye iya kuchaza indlela esinokuyiqonda ngayo le ncwadi ibangela umdla yeBhayibhile.

Intsasa yangeCawa iya kuquka ungcelele lokugqibela lweentetho ezintathu olunomxholo othi “Isiprofeto SikaZefaniya Esinentsingiselo Kwabo Benza Ukuthanda KukaThixo.” Luya kuchaza indlela esi siprofeto esasisebenza ngayo kuhlanga lwakwaYuda nendlela esisebenza ngayo kumhla wethu, ingakumbi kwiinkonzo zeli hlabathi. Emva koko, uya kunandipha umdlalo onesinxibo samandulo onomxholo othi “Imizekelo Esisilumkiso Kumhla Wethu,” oxubusha ngokuziphatha kakubi kwamadoda akwaSirayeli kanye ngaphambi kokuba uSirayeli angene kwiLizwe Lesithembiso. Imbalasane yocwangciso lokugqibela lwendibano emva kwemini ngeCawa iya kuba yintetho yesidlangalala enomxholo othi, “Isizathu Sokunikela Ingqalelo Kwimisebenzi Emangalisayo KaThixo.”

Cwangcisa kwangoku ukuze ubekho kuzo zontathu ezi ntsuku. Ukuze wazi ngendawo eza kuba kuyo ekufutshane nawe, yiya kwiHolo yoBukumkani yamaNgqina kaYehova yasekuhlaleni okanye ubhalele abapapashi beli phephancwadi.