Isizathu Sokuba Ufanele Ukuphephe Ukusebenzelana Nemimoya

UKUBA uye wafundiswa ukuba ezinye iindlela zokusebenzelana nemimoya zikwenza unxibelelane nemimoya elungileyo, kusenokukumangalisa ukufumanisa oko kuthethwa yiBhayibhile ngokusebenzelana nemimoya. Ngokomzekelo ithi: “Musani ukuphethukela kwabaneshologu, yaye ningabuzisi kwabo banobunkunkqele bokuxela iziganeko kwangaphambili, ukuze nizenze abangahlambulukanga ngabo.”—Levitikus 19:31; 20:6, 27.

Enyanisweni, iBhayibhile ichaza umntu onxibelelana nemimoya “njengocekisekayo kuYehova.” (Duteronomi 18:11, 12) Ngoba? Ukukhangela ngokusondeleyo oko iBhayibhile ikutshoyo yenye inkalo ephambili yokusebenzelana nemimoya—ekuthiwa lunxibelelwano nabafileyo—kuya kuwuphendula loo mbuzo.

Ngaba Abafileyo Bayaphila?

Ngokwahlukileyo koko abantu abaninzi bakucingayo, iLizwi likaThixo, iBhayibhile, lifundisa ukuba akunakwenzeka ukuba abantu banxibelelane nabo babathandayo baye bafa. Ngoba? Kaloku, ukuba kukho umntu onokuthetha nabafileyo, loo nto ithetha ukuba basaphila. Imele ukuba ikho kubo into esindayo besakufa. Abanye bemi ngelithi umphefumlo uqhubeka uphila xa umzimba usifa. Ngaba oko kuyinyaniso?

Ingxelo yeBhayibhile engokudalwa komntu ithi: “UYehova uThixo wabumba umntu ngothuli lomhlaba waza wavuthela impefumlo yobomi emathatheni akhe, umntu ke waba ngumphefumlo ophilayo.” (Genesis 2:7) Ngaba oku akutyhili ukuba umntu gaqa ngumphefumlo yaye akanawo umphefumlo ongafiyo oqhubeka uphila emva kokufa komzimba? Eneneni, iZibhalo zithi: “Umphefumlo owonayo—kuya kufa wona.” (Hezekile 18:4) “Abaphilayo bayazi ukuba baya kufa; kodwa abafileyo, abazi nto konke konke . . . Akukho msebenzi nakuyila nakwazi nakulumka eShiyol,” ingcwaba eliqhelekileyo loluntu.—INtshumayeli 9:5, 10.

Ngoko ngokutsho kweBhayibhile, umphefumlo awuyonto esindayo xa umzimba usifa nabanokuthi abantu abafileyo banxibelelane nayo. Apha sinemizekelo emibini yabaphengululi beBhayibhile abahlonelwayo abaye bafikelela kwisigqibo sokuba umphefumlo uyafa. Umfundi wezakwalizwi waseKhanada uClark H. Pinnock wathi: “Le ngcamango [yokuba umphefumlo womntu awufi] iye yanempembelelo ixesha elide kwezakwalizwi, kodwa ayiphumi zibhalweni. IBhayibhile ayifundisi ukungafi komphefumlo ngokwemvelo.” Ngokufanayo umphengululi waseBritani uJohn R. W. Stott wathi: “Ukungafi—nokungatshabalali—komphefumlo yingcamango yamaGrike kungekhona eseBhayibhileni.”

Noko ke, abantu bayayifumana imiyalezo okanye beve amazwi avakala ngathi avela kwabafileyo. Ngoko ke, ngubani lo uthethayo?

Banxibelelana Nabani?

IBhayibhile ibonisa ukuba umntu wokomoya ongabonakaliyo wasebenzisa inyoka, kanye njengechule lokudlalisa oonopopi, ukuze anxibelelane nebhinqa lokuqala uEva, waza walenza lamvukela uThixo. (Genesis 3:1-5) IBhayibhile imbiza lo mntu wokomoya, okanye ingelosi ngokuthi, ‘yinyoka yantlandlolo, leyo ibizwa ngokuba nguMtyholi, noSathana, lowo ulahlekisa umhlaba omiweyo uphela.’ (ISityhilelo 12:9) Lo Sathana waphumelela ekulukuhleni ezinye iingelosi ukuba zivukele. (Yude 6) Ezi ngelosi zingendawo kuthiwa ziidemon yaye ziziintshaba zikaThixo.

IBhayibhile ithi iidemon zinamandla okuphembelela uluntu. (Luka 8:26-34) Ngoko akumangalisi ukuba uMthetho kaThixo uthi: “Maze kungafunyanwa namnye kuwe . . . obuza koneshologu, noyinkunkqele ekuxeleni iziganeko kwangaphambili, nobuzisa kwabafileyo. Kuba uYehova uyamcekisa wonke ubani ozenzayo ezi zinto.” (Duteronomi 18:10-12) Ziyintoni iingozi zokungawusi so lo mthetho?

Amava okoqobo kaKumkani uSawule woSirayeli wamandulo ayawuphendula lo mbuzo. Ngenxa yokuba wayesoyika iintshaba zakhe, uKumkani uSawule wakhangela umntu oneshologu. Wamcela ukuba athethe nomprofeti ofileyo uSamuweli. Akuva indlela lo oneshologu ayichaza ngayo indoda enkulu, wacinga ukuba yayibona uSamuweli. Yaye uSawule wafumana siphi isigidimi? AmaSirayeli ayeya kunikelwa ezandleni zeentshaba, yaye uSawule noonyana bakhe babeya kuba kunye “noSamuweli,” okutheth’ ukuthi nabo babeza kufa. (1 Samuweli 8:4-19) UThixo wasabela njani xa uSawule wagqiba kwelokuba aye koneshologu? IZibhalo zisixelela oku: ‘Wafa ke uSawule ngenxa yokungathembeki kwakhe, nangokubuzisa kwakhe koneshologu.’ (1 Kronike 10:13) Enjani ukuba buhlungu imiphumo!

Ngokufanayo namhlanje, abo bazibandakanya ekusebenzelaneni nemimoya bazibeka kweyona ngozi ingathethekiyo. IBhayibhile ilumkisa ngelokuba ‘abo basebenzelana nemimoya’ baya kufunyanwa ‘kukufa kwesibini [okanye okungunaphakade].’ (ISityhilelo 21:8; 22:15) Ngoko, licacile elokuba, ikhondo lobulumko nelisindis’ ubomi kukuphepha naluphi na uhlobo lokusebenzelana nemimoya.

Indlela Yokuxhathisa Imimoya Engendawo

Kuthekani ukuba ubusele usebenzelana nemimoya? Ngoko uya kuba wenza kakuhle ukuba uthabatha amanyathelo akhawulezileyo ukuze ukhusele wena nentsapho yakho ekwenzakalisweni yimimoya engendawo. Ngawaphi loo manyathelo? Ngokomzekelo: Umntu ulikhusela njani ikhaya lakhe nentsapho yakhe kwizinambuzane eziyingozi? Emva kokuba ezitshabalalisile ekhayeni lakhe, ususa izinto ezizitsalayo. Ungciba iintanda aze omeleze iindonga ukuze anqande ezi zinambuzane ziyingozi zingangeni, yaye ukuba esi sibetho sezinambuzane siyaqhuba, usenokucela uncedo kumagunya asekuhlaleni ukuze ahlangabezane nazo.

Unokusebenzisa indlela efanayo ukuze uhlangabezane nemimoya engendawo uze uphuncule kuyo. Khawucinge nje ngomzekelo wamaKristu enkulungwane yokuqala e-Efese awayesebenzelana nemimoya ngaphambi kokuba abe ngamaKristu. Emva kokuba egqibe kwelokuba ayeke ukusebenzelana nemimoya, athabatha amanyathelo amathathu ukuze azikhusele kwiintlaselo ezifana nezezinambuzane eziyingozi zemimoya engendawo. Enza ntoni?

Inyathelo Lokuqala

IBhayibhile ithi: “Abaliqela noko kwabo babeqhelisela ubugcisa bomlingo bazizisa ndawonye iincwadi zabo baza bazitshisa phambi kwakhe wonk’ ubani.” (IZenzo 19:19) Ngokutshisa kwawo iincwadi zokuvumisa, loo maKristu asematsha abamisela umzekelo bonke abo banqwenela ukuyixhathisa imimoya engendawo namhlanje. Tshabalalisa zonke izinto ezinxulumene nokusebenzelana nemimoya. Oku kuya kuquka zonke iincwadi, amaphephancwadi, iincwadi ezinemifanekiso ehlekisayo, iividiyo, izibhengezo, izinto ze-elektroniki ezinento yokwenza nokusebenzelana nemimoya, umculo, kwakunye namakhubalo okanye ezinye izinto ezinxityelwa “ukuzikhusela.”—Duteronomi 7:25, 26; 1 Korinte 10:21.

Enye indoda yaseMzantsi Merika eyayitshone ayavela nangonwele ekusebenzelaneni nemimoya kangangamashumi eminyaka yalithabathela entliziyweni eli cebiso leZibhalo. Ikhumbula oku: “Ngenye imini ndaqokelela zonke izinto zam ezinento yokwenza nokusebenzelana nemimoya ndazibeka ngaphambi kwendlu, nqaku izembe, ndaza ndazicanda zaziingceba.” Yandula yazitshisa zonke de akwasala nempunde. Emva koko yenza inkqubela entsha ngokomoya yaye akuzange kube kudala yaba ngumlungiseleli onenzondelelo kwelinye ibandla lamaNgqina kaYehova.

Kodwa, inyathetlo lokuqala alanele. Ngoba? Kaloku, sele kuyiminyaka emva kokuba loo maKristu ase-Efese ezitshabalalisile iincwadi zawo zomlingo, umpostile uPawulos wabhala: “Sizamazamana . . . nemikhosi yoomoya abangendawo.” (Efese 6:12) Iidemon zazingekanikezeli. Zazisafuna ikroba lokungena. Yiyiphi enye into ekwakusafuneka eyenzile loo maKristu?

Inyathelo Lesibini

UPawulos wathi xa wayebongoza amaEfese enkulungwane yokuqala: “Yambathani sonke isikrweqe sikaThixo ukuze nikwazi ukuma niqinile nxamnye namaqhinga kaMtyholi.” (Efese 6:11, umbhalo osemazantsi) Eli cebiso lisasebenza nanamhlanje. Kanye njengomntu ozama ukugcina izinambuzane eziyingozi zikude nekhaya lakhe, umKristu ufanele omeleze izinto zokuzikhusela ezifana nodonga ukuze angafunyanwa yimimoya engendawo. Eli nyathelo lesibini liquka ntoni?

UPawulos wabethelela oku: “Ngaphezu kwezinto zonke, thabathani ikhaka elikhulu lokholo, enothi ngalo nikwazi ukucima yonke imijukujelwa evuthayo yalowo ungendawo.” (Efese 6:16) Eli khaka lifuneka ngokwenene. Okukhona ukholo lwakho lusomelela, kokukhona uya kukwazi ngakumbi ukuxhathisa imikhosi yoomoya abangendawo.—Mateyu 17:20.

Noko ke, ungazomeleza njani izinto zakho zokuzikhusela? Ngokuqhubeka ufundisisa iBhayibhile. Ukufundisisa iBhayibhile kuhlobene njani nokholo? Kanye njengokuba ukomelela kodonga kuxhomekeke ubukhulu becala ekomeleleni kwesiseko, ngoko ukomelela kokholo lomntu kuxhomekeke kakhulu ekomeleleni kwesiseko salo. Siyintoni eso siseko?

Lulwazi oluchanileyo lweLizwi likaThixo. Umpostile uPawulos uthi: “Ukholo lulandela oko kuviweyo. Oko kuviweyo kungelizwi elingoKristu.” (Roma 10:17) Uvumelekile ukuba ucele isifundo seBhayibhile sesisa komnye wamaNgqina kaYehova, ngexesha nakwindawo elungele wena. Olo fundisiso luya komeleza ukholo lwakho. (Roma 1:11, 12; Kolose 2:6, 7) Oko kuya kuphumela entwenini? Akusayi kuba kudala ukholo lwakho lukuhlanganisele njengekhaka nxamnye noomoya abangendawo.—INdumiso 91:4; 1 Yohane 5:5.

Liliphi inyathelo lesithathu ekwafuneka loo maKristu ase-Efese alithabathe?

Inyathelo Lesithathu

Emva phayaa e-Efese abo babesandul’ ukukholwa bathabatha amanyathelo okuxhathisa imimoya engendawo, kodwa loo maKristu ayesahlala kwisixeko esizaliswe bubudemon. Ayefuna iindlela ezingakumbi zokuzikhusela. Ngoko xa umpostile uPawulos wabhalela amakholwa angoowabo, wawaxelela oko amele akwenze: “Ngazo zonke izihlandlo [qhubekani] nithandaza ngako konke ukuthandaza nokukhunga nikuwo umoya. Yaye ngenxa yoko hlalani niphaphile rhoqo kwaye nikhunga ngenxa yabo bonke abo bangcwele.”—Efese 6:18.

Ngokuqinisekileyo, ukuthandaza ngamandla nangokuzingisileyo ukuze ukhuselwe nguYehova kwakulinyathelo lobulumko yaye kuselilo ukuba ufuna ukukhuseleka kwimimoya engendawo. Yaye kuyathuthuzela ukwazi ukuba uYehova uya kuziphendula izikhungo zakho ezisuka entliziyweni ngokukukhusela, nto leyo equka inkxaso yeengelosi zakhe. (INdumiso 34:7; 91:2, 3, 11, 14; 145:19) Ngoko ke, kubaluleke gqitha ukuzingisa ekuthandazeni kuThixo sisithi, “Sihlangule kulowo ungendawo.”—Mateyu 6:13; 1 Yohane 5:18, 19.

UAntônio, owayesakuba ngusiyazi eBrazil, wawaqonda amandla omthandazo. Emva kokuba amkele isifundo seBhayibhile waza wafunda ngegama likaThixo, uYehova, waqalisa ukuthandaza ngamandla kuYehova uThixo ukuze amncede aphuncule ekusebenzelaneni nemimoya. Xa ekhangela emva uthi: “Ukuthandaza kuYehova kuye kwangqineka kuligwiba kum nakwabanye abebekhotyokiswe yimimoya engendawo ngaphambili.”—IMizekeliso 18:10.

Unokuphumelela

Kubalulekile ukuba emva kokwazi uYehova, uthembele kuye ngokupheleleyo, uzithobe kwigunya lakhe, uze uthobele imiyalelo yakhe. Ukuba wenjenjalo, xa ucela uncedo kuye usebenzisa igama lakhe, uya kukukhusela. UAntônio wakhuselwa ngolo hlobo. Namhlanje ungumdala ongumKristu kwelinye lamabandla amaNgqina kaYehova eSão Paulo yaye unombulelo kuba efumene inyaniso eye yamkhulula.—Yohane 8:32.

NjengoAntônio namanye amawaka awayesebenzelana nemimoya ngoku akhonza uYehova uThixo, unokuphumelela ekuphunculeni ekusebenzelaneni nemimoya. Ngoko, lahla izinto ezinxulumene nokusebenzelana nemimoya, yomeleza ukholo lwakho ngokufundisisa iBhayibhile, uze uthandazele inkuselo kaYehova. Thabatha la manyathelo—ubomi bakho buxhomekeke kuwo!

[Amagama acatshulweyo akwiphepha 5]

Ngokutsho kweBhayibhile, abaphilayo abanakunxibelelana nabafileyo

[Umfanekiso okwiphepha 6]

1. Tshabalalisa zonke izinto ezinxulumene nokusebenzelana nemimoya

[Umfanekiso okwiphepha 7]

2. Qhubeka ufundisisa iBhayibhile

[Umfanekiso okwiphepha 8]

3. Thandaza ngamandla uze uzingise