Kutheni Kuthandwa Kangaka Ukusebenzelana Nemimoya?

Ukusebenzelana nemimoya kuye kwachazwa “njengenkolelo yokuba inxalenye engumoya yabantu iyaphila ekufeni komzimba wenyama ibe inokunxibelelana nabaphilileyo, ngokuqhelekileyo ngomntu osebenza njengosiyazi.”

NGOWE-1998 incwadi ethetha ngendlela yokunxibelelana nabafileyo yathandwa gqitha eUnited States kangangokuba ngokutsho kweNew York Times yakhawuleza yafikelela kwincopho yoludwe lweencwadi ezithengiswe kakhulu.

Kwiminyaka embalwa eyadlulayo eMoscow, abacebisi noosiyazi bathandwa gqitha ngabezobupolitika noosomashishini, ababesiya kubo baze bahlawule iimali ezinkulu.

EBrazil, amabali obuhenyu akumabonwakude abalaselisa ukusebenzelana nemimoya anomtsalane kubabukeli abaninzi.

Kubantu abaninzi abahlala eAfrika naseAsia, ukusebenzelana nemimoya kuxhaphake njengokuthengisa emarikeni.

Isizathu Sokuba Bebaninzi Abasebenzelana Nemimoya

Abaninzi babhenela ekusebenzelaneni nemimoya ukuze bazithuthuzele emva kokufa kwabantu ababathandayo. Besebenzisa oosiyazi, basenokufumana inkcazelo ekhethekileyo esenokubonakala ivela kubantu abafileyo. Ngenxa yoko, abo bafelweyo basoloko beqinisekile ukuba abo bafileyo babathandayo bayaphila yaye ukunxibelelana nabafileyo kuya kubanceda bahlangabezane nokulahlekelwa ngabo.

Abanye baye batsaleleka ekusebenzelaneni nemimoya kuba beye baxelelwa ukuba imimoya iya kunyanga izigulo zabo, ibakhulule kubuhlwempu, baphumelele ekuthandaneni kwabo, icombulule iingxaki zomtshato, okanye bafumane imisebenzi. Yaye abanye babhenela ekusebenzelaneni nemimoya kuba nje befuna ukwazi.

Noko ke, ngokutsho kwenye ingcali kweli candelo, esinye isizathu sokuba izigidi zabantu ziye zabhenela ekusebenzelaneni nemimoya kukuba zifundiswe ukuba ukusebenzelana nemimoya kuchazwa “njengenxalenye eyongezelelekileyo yonqulo ehambisana nobuKristu.” Imeko yonqulo eBrazil ingumzekelo woko.

IBrazil inawona maRoma Katolika maninzi emhlabeni, kodwa ngokutsho kombhali uSol Biderman, “amawakawaka amarhamente alumeka amakhandlela kwizibingelelo ezininzi yaye akaboni nto ityhulu kuloo nto.” Enyanisweni, iphephandaba laseBrazil iVeja lanikela ingxelo yokuba ama-80 ekhulwini abo baquqa bebuyelela kwiindawo zoosiyazi eBrazil ngamaKatolika abhaptiziweyo ahamba noMthendeleko. Ukongezelela nabefundisi babakho kwiimbutho zokusebenzelana nemimoya, yaye unokusibona isizathu sokuba amakholwa amaninzi ecinga ukuba ukunxibelelana nemimoya ukuze azithuthuzele okanye afumane ulwalathiso kuyamkholisa uThixo. Kodwa ngaba kunjalo?

[Ibhokisi/Imifanekiso ekwiphepha 3]

Iindlela Ezahlukeneyo Zokusebenzelana Nemimoya

Ukusebenzelana nemimoya kusenokuquka ukuya kusiyazi, ukubuza kwabafileyo okanye ukuhlaba izihlabo. Enye indlela exhaphakileyo yokusebenzelana nemimoya kukuvumisa—ukuzama ukufumanisa ikamva okanye into engaziwayo ngoncedo lwemimoya. Ezinye iindlela zokuvumisa kukusebenzisa iinkwenkwezi, icrystal-ball, ukondela, ukuchaza amaphupha, ukuvumisa ngokufunda imigca esesandleni nokusebenzisa amakhadi okuxel’ ithamsanqa.