Imbono YeBhayibhile

Ukucamngca Okuyingenelo

“AMAZWI OMLOMO WAM NOKUCAMNGCA KWENTLIZIYO YAM MAKUKUKHOLISE, YEHOVA LIWA LAM NOMKHULULI WAM.”—INDUMISO 19:14.

KUTHETHA ntoni “ukucamngca” kuwe? Ukuba ulandela iimfundiso zeenkonzo ezithile zaseMpuma, usenokukholelwa kukuba ngoku kutsho kwee qwenge okanye ufumene ukhanyiselo nje olukhethekileyo. Ukucamngca okwenziwa ngamaBhuda kukhuthaza ukuqongqotha iingqondo ngazo zonke iingcinga. Kuthiwa ezinye iintlobo zokucamngca zikhuthaza ukuzalisa ingqondo yakho “ngeenyaniso zobulumko ezamkelwa ngokubanzi.”

Imbono yeBhayibhile ngokucamngca yahlukile kwezi. Ngayiphi indlela? Cinga ngomzekelo waseBhayibhileni wendoda egama linguIsake, owayenezinto ezininzi awayenokucamngca ngazo xa wayeneminyaka engama-40 ubudala. IGenesis 24:63 ithi: “Wayephumile ke uIsake ehamba-hamba ukuze acamngce entsimini xa kuhlwayo.” Akukho sizathu sakucinga ukuba uIsake waqongqotha ingqondo yakhe ngeengcinga okanye wayecinga ‘ngeenyaniso zobulumko ezamkelwa ngokubanzi.’ Kusenokwenzeka ukuba uIsake wayenezinto ezikhethekileyo awayenokucinga ngazo, njengekamva lakhe, ukulahlekelwa ngunina okanye lowo wayeza kuba ngumfazi wakhe. Wasebenzisa ixesha elithile eyedwa ngokuhlwa ukuze acamngce, ngemibandela enjalo ebalulekileyo. EBhayibhileni, ukucamngca kungaphezulu nje kunokuvumela ingqondo ibhadule.

Ukucamngca Kubandakanya Okungakumbi

Cinga ngomzekelo womdumisi uDavide. Wajamelana neengxaki ezininzi ezingaphaya kwengqondo, yaye wayesazi kakuhle ukuba njengomntu ongafezekanga, wayefuna uncedo oluvela kuThixo ukuze aziphathe kakuhle. Yintoni eyaqinisa uDavide kwiimeko ezinzima? Njengoko kuchazwe kwiNdumiso 19:14, uDavide wathi: “Amazwi omlomo wam nokucamngca kwentliziyo yam makukukholise, Yehova Liwa lam noMkhululi wam.” Igama lesiHebhere apha eliguqulelwe ngokuthi “camngca” ngokoqobo lithetha “ukuthetha nesiqu sakho.” Ewe, uDavide ‘wathetha nesiqu sakhe’ ngoYehova, imisebenzi yakhe, imithetho yakhe nangobulungisa bakhe.—INdumiso 143:5.

Ngokukwanjalo, amaKristu okuqala ayekugqala njengenxalenye yonqulo lokwenyaniso ukuzibekela ixesha lokucamngca ngezinto zokomoya. Umpostile uPawulos wabongoza esithi: “Hlalani nicinga ngezinto eziyinyaniso, nezizezenkxalabo enzulu, nezibubulungisa, nezinyulu, nezithandekayo, nekuthethwa kakuhle ngazo, nezinesidima, nezincomekayo.” (Filipi 4:8) Kakade ke, ukuze ucinge ngezinto ezakhayo, ezi “zinto” uPawulos awathetha ngazo kuya kufuneka zibe sezingqondweni zethu ngaxa lithile. Njani?

Umdumisi uyaphendula. INdumiso 1:1, 2 ifundeka ngolu hlobo: “Unoyolo umntu ongahambanga ngecebo labangendawo . . . Uyoliswa ngumthetho kaYehova, efunda emthethweni wakhe ngesandi esiphantsi imini nobusuku.” Ewe, umdumisi wayefunda umthetho kaThixo ngokuthe rhoqo. Ngoko ke wayenokucamngca ngezinto awazifundayo ngoMdali.

Ukucamngca Namhlanje

Ukufunda iBhayibhile kuxabiseke kakhulu, kodwa emva kokuyifunda, simele sicamngce, sicinge ngokunzulu, okanye “sithethe neziqu zethu” ngoko siye sakufunda. Njengoko kufuneka setyise ukuba sifuna ukuba nengenelo ngokuzeleyo kukutya esikutyayo, ukucamngca kuyafuneka ukuba sifuna ukufunxa oko sikufunda eBhayibhileni. Ukucamngca okuhle kwenza okungaphezulu kunokususa nje iingcamango ezingentle. Kwakhona kusinceda ukuba sicinge ngokucombulula iingxaki zethu ngokusuka eBhayibhileni. Ukucamngca okunjalo kunokusinceda siqhubane ngokuphumelelayo namaxhala obomi emihla ngemihla.—Mateyu 6:25-32.

Umdumisi uDavide waqonda indima yokucamngca ekukholiseni uThixo. Wathi: “Ngumlomo welungisa othetha ubulumko ngesandi esiphantsi.” (INdumiso 37:30) Ewe, ukucamngca luphawu olufanisa umnquli othembekileyo. Ukugqalwa njengelungisa nguThixo kuyintsikelelo yokwenene, yaye kuzisa iingenelo zokomoya. Ngokomzekelo, iBhayibhile ithi “umendo wamalungisa unjengokukhanya okuqaqambileyo okuya kukhanya ngokukhanya de kube semini emaqanda.” (IMizekeliso 4:18) Ngenxa yoko, umKristu othobekileyo “othetha ubulumko ngesandi esiphantsi” unokulindela ukuyazi ngakumbi iBhayibhile.

Kwakhona iBhayibhile iluleka amaKristu ukuba acamngce ngeembopheleleko zawo zeZibhalo. Umpostile uPawulos waxelela uTimoti esithi: “Ziphonononge ezi zinto; wendele kuzo, ukuze ukuhambela kwakho phambili kubonakale ebantwini bonke. Zilumkele wena nemfundiso yakho. Hlala kwezi zinto, kuba ngokwenza oko uya kuzisindisa wena nabo bakuphulaphulayo.” (1 Timoti 4:15, 16) Ewe, oko sikuthethayo noko sikwenzayo kunokuba negalelo kwabanye.

Ngokucacileyo, sinezizathu ezininzi zokucinga ngokunzulu ngezinto ezibalulekileyo. Kubalulekile ukucingisisa ngamava ethu ezinto ezidluleyo, siphonononge ngemibandela yangoku yaye sicingisise ngokuceba ikamva. Kodwa ngaphezu kwako konke oku, ukucamngca kwethu kuya kusikhanyisela kakhulu kwiingcinga zethu ezisekelwe kubulumko boMdali wethu, uYehova uThixo.

[Umfanekiso okwiphepha 29]

“The Thinker,” nguRodin