Uncedo Lokwahlukana Nobunjubaqa
NGUMBHALELI KAVUKANI! EFRANSI
KUTSHANJE iziganeko ziye zabonisa ngokucacileyo ukophulwa komthetho nocwangco ngendlela exhomisa amehlo kwiidolophu ezininzi ezisakhasayo zaseFransi. Ngokutsho kwephephancwadi lesiFrentshi iL’Express, “ugonyamelo ezidolophini luye lwanda ngokuphindwe kahlanu kwisithuba seminyaka emithandathu.” Eyona nto ide yathi chatha, inani labantwana ababandakanyeka kulwaphulo-mthetho olunogonyamelo liye landa ngendlela eyothusayo.
Ukongezelela ekonakaliseni izinto, ukuthengisa ngokungekho mthethweni iziyobisi, ukuphanga, ukutshisa nobusela, iinjubaqa ziye zahlasela amagosa kaRhulumente. Phakathi kwawo, amapolisa, abacimi bomlilo nabo bathutha uwonke-wonke, basoloko bengamaxhoba okuhlaselwa ngogonyamelo.
Kutheni kukho ugonyamelo olungaka nje? Izazi ngezentlalo ezibini zithi: “Kungenxa yokuwohloka kweentsapho, kukuvukela nje nantoni na eza namagunya.” Kwakhona zikhankanya “imvakalelo [yolutsha] yokuziva lungakhathalelwa ngamagunya” nokungabi “nathemba lokufumana ikamva elinentsingiselo.”
AmaNgqina kaYehova athe gqolo eshumayela isigidimi seBhayibhile sethemba kwimimandla apho kugquba ubunjubaqa. Kwenye inkqubo yakutshanje kamabonwakude eFransi, enye intatheli yathi: “AmaNgqina kaYehova ahla enyuka kwimimandla esezidolophini nakubantu abakwiindawo ezisakhasayo—imimandla maxa wambi ebonakala ingakhathalelwa ngurhulumente, amapolisa neriphabliki. Kwezi zakhiwo nezitrato, ayathetha aze aphulaphule.” Umsebenzi wawo unemiphumo emihle, njengoko le leta ilandelayo esuka kumfundi kaVukani! oselula ibonisa.
“Ndithanda ukunibulela ngentliziyo yam yonke ngeempapasho zenu. Anindincedanga nje kuphela kodwa ulwalamano lwam nabazali bam luye lwaphucuka. Ndineminyaka eli-16 kuphela ubudala yaye ndizalwa ngamaSilamsi.
“Ndifuna ukuthi nindincede ngokunempumelelo ekundahlukaniseni nobunjubaqa. Ngenxa yoko, ndinamathele ngakumbi kunqulo lwam, kodwa ndiyayifunda neBhayibhile. Ngokuncedwa nini, ndisaqhubeka nesikolo. Ngaphezu koko, niye nanceda abantu abaliqela elumelwaneni ukuba bahlukane nobunjubaqa ngamaphephancwadi enu—endibaboleka wona nyanga nganye. Ndinombulelo kakhulu kuni yaye ndiziva ndinityala nto ithile.”