Iindlulamthi—Zithe Ncothu, Zinooxhongw’ Abade, Kwaye Zinomfaneleko

NGUMBHALELI KAVUKANI! EKENYA

KWAKUNGOQHIZA xa amatye enyengane emhlophe ayegqunywe likhephu yaye ebanda ceke okwempumlw’ enja. Sasifane see khotsho, sigovalele kwezo zixebenga zamatye, siphunga iti eshushu eyayikwiikomityi ezenziwa ngenkonkxa, sibukele idlelo laseAfrika elalingasezantsi kwaloo ndawo.a Kwathi kanti sasingafananga salinda nje. Kuthe kuloo lozi-lozi welanga lakusasa, gqi qhaphu umhlambi weendlulamthi—ezithe ncothu, zitsho ngooxhongw’ abade kwaye zinomfaneleko—zicondoba kuhle ukunqumla elo thafa. Ngesantya solovane, zangcemba zenze into entle ngaloo milenze inga zizinti, loo mirhutyululu yeentamo zazo sel’ iman’ ukugetyeza kanye oku kweemasti zeenqanawa xa kubhudl’ umoya. Sakha see xum kunzima nokuphefumla. Suka, yantle le nto madoda!

Ngokungathi azisiboni, zajika zonke, nazo zisiya kwintshinyela yegcume lomthi womnga ukuze zifumane amasebe anameva. Ngokuchula nangenyamekokazi, ezi zigxadavu zamanono zathi nqothu nqothu loo magqabi mancinane aluhlaza ngaloo matyatyasholo amalwimi. Zilapho, kanye phezulu, nazo zinyakathisa iintloko kwiingqweji zamahobohobo zinyondlanyondla. Yeka ke ezi ntaka ukutsho ngontshwentshwentshwe zixwaxwa aba bangeneleli banamatyongotyongo eentamo. Ithe xhungu koku kunxwalwa, le mihlambi yaya kweminye imithi ngokuzola nangesithozela.

Zinamendu Nomkhitha

Nabani na owakha wazibona ezi zidalwa zinkolonkoloza emva kweentsimbi zomzi wogcino zilwanyana angothuka angalibali xa ebona ubuhle nomkhitha ezinawo xa zizonwabele zikhululekile kumatyholo aseAfrika. Xa zihamba iindlulamthi zenza into entle nebukekayo. Njengoko ziphala kwithafa elinengca, ubutyongotyongo bazo buzenza zibe ngathi ziethe-ethe de kube ngathi zingakhubeka nakwinto nje engenamsebenzi ziyokuwa kude. Ngokwahlukileyo, isixhinga senkunzi yendlulamthi enobunzima obuziikhilogram ezili-1 300 inezigindiva zamanqina yaye ingabaleka ngesantya esingangeekhilomitha ezingama-60 ngeyure.

Esi sidalwa sibukekayo sifumaneka eAfrika kuphela. Ngenxa yobunono nokuzola kwaso kumyoli kakhulu ukusibukela. Ubuso bendlulamthi kunokuthiwa bukhethekile yaye bunomtsalane, buneendlebe ezinde ezibhityileyo namaphondwana amabini phezu kwawo kuthe chu kuwo amanquma eenwele ezithambileyo ezimnyama. Ineengqanda zamehlo ezimnyama, athe khatha emva kwamagqajolo eentshiyi eziphothiweyo. Xa indlulamthi ijonge ikwindawo ephakamileyo, ubona nje ubuso obuzolileyo obulunguzayo.

Mandulo phayaa, indlulamthi le yayithandwa yaye ixatyiswa gqitha ngenxa yokuthandeka, ukuba ngumnyewu, ukuzola kwayo nokungabi nguphuma-silwe. Abalawuli nookumkani babedla ngokuphiwa iindlulamthi ezisakhulayo njengembonakaliso yoxolo nemvisiswano phakathi kwamazwe. Namhlanje imizobo engasacaciyo yeendlulamthi isabonakala phakathi kwemizobo yamandulo esematyeni yaseAfrika.

Isukil’ Egadeni

Indlulamthi izodlula zonke ezinye izilwanyana ngobude. Ukusuka enqineni ukuya emaphondweni iinkunzi ezikhule zagqiba zinokukhula zibe nde ngaphezu kweemitha ezi-5,5. Ngokwendlela yokubhala yeYiputa yamandulo, indlulamthi yayimela isenzi esithi “ukuqikelela” okanye “ukuxela kusengaphambili,” nto leyo eboniswa bubugxamsholo bayo nokukwazi kwayo ukubona kude.

Xa imi phakathi kwengxubevange yamaqwarhashe, iinciniba, iimbabala nezinye izilwanyana ezihlala entiilini zaseAfrika, indlulamthi iba yimboniselo ethile. Ukuthi ncothu kwayo egadeni nokukwazi kwayo ukubona kuyenza ibonisele mgama ize ibone nayiphi na ingozi ezayo kuselithuba. Ngenxa yoko, ngaphandle kwamathandabuzo, ukuma kwayo njengenqaba kunomlinganiselo othile wokhuseleko kwezinye izilwanyana.

Ngummangaliso Wendalo

Indlulamthi yenziwe ngokumangalisayo ukuze itye kwawona masebe aphezulu emithi emide, angenakufunyanwa nasisiphi na esinye isilwanyana ngaphandle kwendlovu. Umlebe wayo ongasentla osixwexwe nongaqhelekanga nolwimi oluthambileyo lwenza ukuba kube lula ngayo ukunqothula amagqabi kumasebe azele amagqajolo ameva abukhali.

Ngemini, iindlulamthi zinokuphosa esiswini kangangeekhilogram ezingama-34 zohlaza. Nangona zisitya iintlobo ezahlukeneyo zohlaza, zithanda kakhulu umnga onameva othe gqa gqa kwiintili zaseAfrika. Inkunzi yendlulamthi iyakwazi ukolula ulwimi lwayo kangangeesentimitha ezingama-42 ikhangela ukutya. Intamo yendlulamthi ibhetyebhetye ngolona hlobo. Oku kwenza ukuba indlulamthi ijike ize ithambekise elo phokobhela lentloko yayo ilise macala onke njengoko izama ukufikelela kwawona masebe aphezulu emithi.

Ukufikelela phezulu yintw’ engenamsebenzi kwindlulamthi, kodwa ukusela amanzi yenye into. Ithi isakudibana nomngxuma onamanzi, kufuneke ukuba indlulamthi izicenge ithi saa imilenze yonke ize igaqe ngamadolo omabini ukuze ide iwasele loo manzi. Njengoko iguqe kabuhlungu, indlulamthi kuye kufuneke iyolule yonke loo ntamo yayo inde ngaphambi kokuba isele. Ngethamsanqa, akusoloko kuyimfuneko ngendlulamthi le ukuba isele rhoqo, njengoko ifumana amanzi kumagqabi anencindi ewatyayo.

Intamo nephango lendlulamthi linemibalabala emihle emile okwamagqabi. Imibala yazo iyahluka, kuba ezinye zigolide bumdaka, zintsundu kakhulu ezinye zide zibe mnyama. Ngokuya ikhula indlulamthi, imibala yayo iya isiba mdaka.

Ubomi Bentsapho

Iindlulamthi zizilwanyana ezithandanayo, zithanda ukuthi saa zihambe ngambini, maxa wambi de zibe ngama-50. Imazi ikhulelwa kangangeentsuku ezingama-420 ukuya kwezingama-468 ngaphambi kokuba izale ithole eliziimitha ezi-2. Ekuzalweni kwalo, eli thole liwa ngentloko emhlabeni umgama ongangeemitha ezimbini! Kodwa kwimizuzu eli-15 lingenzakalanga, eli thole, libhadaza de lime ngeenyawo, lize londliwe. Emva kweeveki ezimbini okanye ezintathu, eli thole liqalisa ukugramza amagqabi athambileyo akwiincam zamasebe omnga yaye kungekudala lifumana amandla awaneleyo okugxanya nonina.

Ithole lendlulamthi lifana nabazali balo behleli. Lifutshane kunezinye iindlulamthi, kodwa lide kunoninzi lwabantu. Ungalithanda xa ulibona limi ngokuzithemba lingoyiki njengoko liphantsi kweliso lenkuselo likanina.

Ngexesha lokuzalwa kwawo, amathole endlulamthi anyanyekelwa ngokwamaqela, apho achitha imini yonke ephumle, edlala yaye ejonge izinto eziwangqongileyo. Ithole elisandul’ ukuzalwa likhula ngokukhawuleza ngendlela ongasokuze uyiqonde. Kwisithuba seenyanga ezintandathu ithole linokukhula kangangemitha lize libe lide ngokuphindwe kabini kwisithuba sonyaka. Kwiveki nje enye, ithole linokukhula kangangeesentimitha ezingama-23! Umdlezana wendlulamthi ulikhusela gqitha ithole lakhe yaye nangona elivumela ukuba lihambahambe kangangomgama othile, ukubona kwakhe ngendlela esemagqabini kumenza ukuba asoloko elibona ithole lakhe.

Ngenxa yobukhulu bayo obukhethekileyo, nokukhawuleza kwayo, kwanamendu ayo kunye nokubona kwayo kakuhle gqitha, zimbalwa iintshaba zendlulamthi ehlathini ngaphandle kweengonyama. Kodwa umntu uye wasizingela waza wasibulalel’ ukusibon’ oku esi silwanyana sihle. Kuba sifunwa phantsi naphezulu ngenxa yesikhumba saso esithandekayo, inyama yaso enencasa nesihlwitha seenwele ezisemsileni waso—bambi abakholelwa ukuba zinamandla angabonakaliyo—ikamva lesi silwanyana sithand’ uxolo limfiliba. Nangona yakha yaxhaphaka kwiindawo ezininzi zaseAfrika, ngoku kuyabonakala ukuba indlulamthi ikhuseleke kwimida yemizi yogcino-zilwanyana nezinye iindawo ekhuselwe kuzo.

Namhlanje iindwendwe ezize kubona izilwanyana eAfrika zisakuvuyela ukubukela iindlulamthi zigetyezisa ezo ntamo zinde, zibaleka ngokukhululekileyo kwiintili ezithe gabalala nezinengca. Kulapho ke uya kufika zinyondla-nyondla kwimithi ephakamileyo yomnga neneencakuba zameva okanye zijonge mgama njengoko indlulamthi ibiya kwenza. Esi sidalwa sihamba sodwa, sakhiwe kakuhle ngokukhethekileyo nesilinono, ngokwenene singummangaliso wendalo—obunye ubungqina bokuba yingcungela yomdali nokuba ngumntu okhethekileyo kukaThixo usomandla uYehova.—INdumiso 104:24.

[Umbhalo osemazantsi]

[Ibhokisi/Umfanekiso okwiphepha 18]

UMMANGALISO WENTAMO ETYONGOTYONGO

Mhlawumbi omnye umntu usenokucinga ukuba indlela ekhethekileyo eyakhiwe ngayo indlulamthi nobukhulu bayo bufanele ukuba bubangela ingxaki. Ngenxa yobude bendlulamthi netyongotyongo lentamo, ukulawulwa kokuhamba kwegazi kuwo onke amalungu omzimba wayo kusenokubonakala kungenakwenzeka. Ngokomzekelo, xa indlulamthi ithobela intloko yayo emhlabeni, umxhuzulane ufanele ubangele igazi elininzi ukuba libaleke lize entloko, ligubungele ingqondo. Xa indlulamthi iphakamisa intloko, igazi belifanele libuyele entliziyweni, lize libangele esi silwanyana singabikho zingqondweni. Noko ke, akwenzeki nanye kwezi. Kutheni?

Eneneni inkqubo yendlulamthi yokuhamba kwegazi ingummangaliso wendalo, yenziwe ngendlela engazang’ ibonwe ukuze ixhase ukumila nobukhulu obukhethekileyo besi silwanyana. Nentliziyo yayo ngubhazabhaza yaye inembopheleleko yokumpompa ngamandla ukuze ithumele igazi engqondweni, ekwisithuba seemitha ezintathu ezinesiqingatha ukusuka kuyo. Njengoko ibetha kangangezihlandlo ezili-170 ngomzuzu, amacala entliziyo eyomeleleyo nangqindilili kangangeesentimitha ezi-7, itsho ngamandla kangangezihlandlo ezithathu ngaphezu kweyomntu. Ukuze ikwazi ukuwathwala kakuhle loo mandla, umthambo ekuthiwa yicarotid, othumela igazi engqondweni, nalowo usentanyeni, obuyisela igazi entliziyweni, imele ibe ngqingqisholo. Enyanisweni, le mithambo yegazi ingangeesentimitha ezi-2,5 yaye inesicwili esomeleleyo nesinwebekayo, nto leyo eyenza ibe bhetyebhetye ize yomelele.

Xa indlulamthi ithoba intloko, imithambo esentanyeni ithintela ukubaleka kwegazi lisiya engqondweni. Emazantsi engqondo, umthambo omkhulu ekuthiwa yicarotid ulithumela kwelinye ilungu elenziwe ngokumangalisayo ekudla ngokuthiwa ngumnatha okhethekileyo. Apha igazi elininzi eliya engqondweni, nto leyo ebangelwa kukuthoba intloko kwendlulamthi lifika lithotywe isantya lize lithunyelwe kubuxhakaxhaka obukhethekileyo bemithambo yegazi emincinane elawula uxinezeleko lwegazi ize ikhusele ingqondo kwigazi elininzi eliza ngamandla. Lo mnatha ukhethekileyo uyaxananaza xa kuthotywa intloko uze unciphe xa indlulamthi iphakamisa intloko, ngaloo ndlela uyinceda imelane nokuhla ngendlela ephawulekayo koxinezeleko lwegazi nto leyo enokubangela incilikithi.

Nentamo le yendlulamthi ingummangaliso wendalo. Izazinzulu zakhuz’ azayeka kukufumanisa ukuba eli tyongotyongo lentamo yendlulamthi linenani lamathambo omqolo elilinganayo nelisempukwini nakuninzi lwezinye izilwanyana ezanyisayo! Noko ke, ngokwahlukileyo kwezinye izilwanyana ezanyisayo, indlulamthi inamathambo omqolo amade nawenziwe ngohlobo olukhethekileyo olujikajika lula, nto leyo eyenza ibe bhetyebhetye. Ngenxa yoko, indlulamthi iyakwazi ukugoba ize ijike intamo yayo ukuze icoce onke amalungu omzimba wayo, okanye ngokulula nje ifikelele kumasebe aphezulu omthi ewutyayo.