Ukondla Nokunyamekela Izilwanyana
Umbhali KaVukani! ESpeyin
A BAZALI ngokuqhelekileyo bachitha iminyaka engamashumi amabini bekhulisa umntwana. Kwelinye icala, izilwanyana ezininzi, zinenkqubo yokondla nokuqeqesha inzala yazo kwiinyanga nje ezimbalwa zehlobo. Sinemizekelo nje embalwa eza kusinceda sibone umsebenzi onzima izilwanyana ezijamelene nawo nyaka ngamnye.
1. Ingwamza Ingwamza esiyibona emfanekisweni ayinalo ixesha lokuphumla ehlotyeni. Le ntaka ngalo lonke ixesha iyahamba isiya kumachibi akufutshane ukuya kukhangelela amantshontsho ayo ukutya okunjengamasele, iintlanzi ezincinane, amacikilishe, okanye iintothoviyane, ngamanye amaxesha kuye kufuneke ilungise indlwane yazo. Ngalo lonke ixesha ebudeni bemini, imazi nenkunzi ziyeza ziphinde zihambe ukuza kujonga amantshontsho azo. La mantshontsho atya kakhulu. Kwiiveki nje ezimbalwa zokuqala, atya ukutya okulingana nesiqingatha sobunzima bomzimba wawo suku ngalunye! Naxa sele ekwazi ukubhabha, amantshontsho engwamza aqhubeka exhomekeke kubazali bawo kangangeeveki eziliqela.
2. Ingwenkala (cheetah) Idla ngokuba yimazi yengwenkala enyamekela amathole. Suku ngalunye, yile mazi ezingelayo ukuze itye ngokwaneleyo ukuze ikwazi ukwanyisa amathole ayo—mathole lawo adla ngokuba mathathu ukuya kutsho kwamahlanu. Kunzima ukuzingela yaye ngezinye imini imazi ikhe ibuye ingaphethanga nto. Ukongezelela, qho emva kweentsuku ezimbalwa, imazi iye ifuduke namathole ayo iye kwenye indawo efihlakeleyo kuba iingonyama zisoloko zikhangela amathuba okutya amathole ayo. Xa amathole eneenyanga ezisixhenxe, imazi iqalisa ukuwaqeqesha ukuze akwazi ukuzizingelela, inkqubo ethabatha unyaka wonke okanye nangaphezulu. Ngokuqhelekileyo amathole ahlala nemazi kangangonyaka ukusa konesiqingatha.
3. Unolwilwilwi (Little Grebe) Oonolwilwilwi basoloko bekunye namantshontsho abo. Kamsinya nje emva kokuba amaqanda eqandusele, ayayishiya indlwane yawo aze ahlale emqolo kanina okanye kayise. Amantshontsho agwencela phantsi kwamaphiko ukuze aye kufikelela apho emqolo. Kulapho aziva ekhuselekile kwaye efudumele ngoxa inkunzi okanye imazi intywila. Imazi nenkunzi ziyabolekisana ngokuntywila zikhangela ukutya ngoxa enye ithwele amantshontsho. Nangona amantshontsho aye akhawuleze akwazi ukuntywila aze akwazi nokuzifunela ukutya, ukusondelelana kwawo nonina noyise kuqhubeka kukho.
4. Indlulamthi Kwiindlulamthi yinto enqabileyo ukuba izale ngaphezu kwethole elinye, yaye kulula ukusiqonda isizathu soko. Indlulamthi esandul’ ukuzalwa njengale siyibona emfanekisweni, inobunzima obuziikhilogram ezingama-60 kwaye ubude zimitha ezi-2! Iyure emva kokuba izelwe iyakwazi ukuzimela yaye kungabanga thuba lide uya kuyibona incanca kunina. Imazi yendlulamthi iya kulanyisa ithole layo kangangeenyanga ezisithoba nakuba liye liqalise ukutya utyani emva kokuba lizelwe. Xa libona ingozi, ithole lendlulamthi lima phakathi kwemilenze kanina, ekubeni ukukhaba kwakhe ngamandla kusenokulikhusela kumarhamncwa.
5. Uxomoyi Kuye kufuneke uxomoyi azikhethe iintlanzi ondla ngazo amantshontsho akhe. Izazi ngeentaka ziye zafumanisa ukuba amantshontsho ondliwa yinkunzi nemazi ngentlanzi encinane ephakathi kwesentimitha enye nezimbini ubude. Inkunzi okanye imazi ithwala intlanzi ngomlomo wayo intloko yentlanzi ijonge phantsi. Oku kuwenzela lula amantshontsho kuba aqala aginye intloko. Njengokuba amantshontsho ekhula, imazi okanye inkunzi iye iwaphathele intlanzi enkulu. Ngokuthe ngcembe aye ondliwe ngokobudala bawo. Ekuqaleni intshontsho ngalinye litya qho emva kwemizuzu engama-45. Kodwa xa amantshontsho eneentsuku ezili-18 ubudala, ayakucacela ukutya, aze atye intlanzi epheleleyo qho emva kwemizuzu eli-15! Eli ntshontsho lentaka ulibona emfanekisweni alisahlali kwindlwane yeentaka yaye liyazilobela iintlanzi. Xa sele likwazi ukuzifunela ukutya usenokucinga ukuba imazi nenkunzi ziza kukhe ziphumle ekukhuliseni amantshontsho. Kodwa akunjalo ngooxomoyi! Bayiqala ekuqaleni kwakhona inkqubo yokukhulisa lingekapheli ihlobo.
Kambe ke, inkcazelo engakumbi ngendlela izilwanyana ezahlukahlukeneyo eziwakhulisa ngayo amathole azo ayikaziwa. Sekunjalo, izazi ngezilwanyana ziye zafumanisa ukuba, ithuku yeyona nto isebenzayo kwizilwanyana. Ukuba uThixo uye wenza izilwanyana zanethuku, ngokuqinisekileyo unqwenela ukuba abazali abangabantu babondle baze babakhulise abantwana babo.