Sada Savela Isicombululo Ekugqibeleni!
KHAWUBE nomfanekiso-ngqondweni apho wonke umntwana eziva efunwa ngokwenene, kwaye eziva ethandwa ngokwenene, yaye esikelelwe ngabazali abanenkathalo, abanothando nomnqweno onyanisekileyo wokunikela eyona nyameko isemgangathweni nolwalathiso emntwaneni wabo. Yiba nomfanekiso-ngqondweni wehlabathi apho mntwana ngamnye ephilile emzimbeni nasengqondweni, apho kungasekho bantwana bahlala ezitratweni, nalapho abantwana bengasayi kuhluthwa ubuntwana babo kuba kufuneka basebenze ngenxa yemeko yezoqoqosho!
Liyanqweneleka, akunjalo? Kambe ke, ngaba uyakukholelwa oko? AmaNgqina kaYehova ayakukholelwa, ngenxa yezizathu ezibini.
Inxalenye Yesi Sicombululo Ivela Kubazali
Ngaphandle kwamathandabuzo uya kulivuma elokuba abantu abakhulileyo banawo amandla okucombulula—maxa wambi kwanawokuzithintela—ezinye iingxaki zabantwana. Kambe ke, oku kuxhomekeke ekubeni aba sele bekhulile bazimisele ukwenjenjalo kusini na. Ewe, abazali banawo amandla okucombulula inxalenye yale ngxaki.
Ngokomzekelo, abantu abakhulileyo abazimiseleyo ukulandela isiluleko seBhayibhile sokuba “umfazi ufanele angemki endodeni yakhe . . . yaye indoda ayifanele imshiye umfazi wayo” abanabantwana babandezelekayo ngenxa yokuhlala kwikhaya eliqhekezwe kukwahlukana kwabo okanye luqhawulo-mtshato.—1 Korinte 7:10, 11.
Abantu abakhulileyo abazimiseleyo ukulandela isiluleko seBhayibhile ‘sokuhamba ngokundilisekileyo, kungekhona kwiziyunguma nasezindywaleni,’ abanabantwana baxinezelekileyo ngenxa yokuba nabazali abangamanxila okanye abangamakhoboka eziyobisi.—Roma 13:13; Efese 5:18.
Abantu abakhulileyo abazimiseleyo ukulandela isiluleko seBhayibhile ‘sokukhwebuka kuhenyuzo’ banciphisa ingxaki yabantwana abakhula bengafunwa, mhlawumbi kwintsapho enomzali omnye.—1 Tesalonika 4:3; Mateyu 19:9.
Abantu abakhulileyo abazimiseleyo ukulandela isiluleko seBhayibhile esithi, “Musani ukubacaphukisa abantwana benu, ukuze bangadakumbi,” nabo ‘babathandayo abantwana babo,’ abasayi kuba nabantwana ababa nentlungu emzimbeni okanye engqondweni ngenxa yokuxhatshazwa ngayo nayiphi na indlela.—Kolose 3:21; Tito 2:4.
Ngelishwankathelayo, ukuba bonke abantu abakhulileyo bebekulungele ukulandela isiluleko seBhayibhile esanikelwa nguYesu, esithi, “Zonke izinto, ngoko, enifuna abantu bazenze kuni, yenzani ngokunjalo nani kubo,” ngaba beziya kubakho izigidi zabantwana abaziva bengafunwa yaye bengathandwa?—Mateyu 7:12.
Okuvuyisayo kukuba, baninzi abantu abakhulileyo abazimiseleyo ukwenza konke oku kuchazwe ngasentla. Kodwa, okulusizi kukuba, abanjalo bonke, yaye ilapho ke ingxaki. Yaye nabo bazimiseleyo bafumanisa ukuba imigudu yabo isoloko iphazanyiswa kukungafezeki koluntu nezinto ezingaphaya kwamandla abo. Abantu banokucombulula inxalenye yeengxaki zabantwana, kodwa ngeliphandle nje abakwazi ukuzicombulula zonke.
Urhulumente KaThixo Uza Kuzicombulula Zonke
Umbhali uJohn Ruskin, okhankanywe kwinqaku elingaphambili, wayevakalelwa ngamandla kwelokuba “imbopheleleko ephambili kaRhulumente kukuqinisekisa ukuba mntwana ngamnye ozalelwe apho ufanele abe nekhaya elifanelekileyo, anxityiswe, ondliwe, aze afundiswe, de afikelele kwiminyaka aya kube ekwazi ukuzimela ngayo.” Noko ke, lo kaRuskin wavuma ukuba, “ukuze akwazi ukwenza oku uRhulumente umele abe negunya ebantwini nto leyo engekabikho xa kungoku.”
Kuphela ngurhulumente kaThixo onokuba negunya eliyingenelo awathetha ngalo lo kaRuskin. Yaye sele ethenjisiwe urhulumente ololo hlobo—lowo uYesu wathetha ngaye kuMateyu 6:9, 10. Esakuba lo rhulumente kaThixo eyilawula ngokupheleleyo imicimbi yomhlaba, uya kuba negunya kubo bonke abantu—uya kwakha amakhaya, anxibise, ondle aze afundise bonke abalawulwa bakhe, kuquka abantwana. (Isaya 65:17-25) Kodwa lo rhulumente ufezekileyo uya kwenza okungakumbi.
UBukumkani bukaThixo buya kubuyisela uluntu kwimeko yokufezeka, ize loo nto yenze ukuba lukhulise abantwana ngolungelelwano olugqibeleleyo. (Yobhi 33:24-26) Abantwana baya kukhuliswa ngoxolo naphakathi kobuzalwana bomhlaba wonke, solotya elo elibhalwe kwiSindululo Samalungelo Omntwana seZizwe Ezimanyeneyo. (INdumiso 46:8, 9) Akusayi kuphinde kubekho imfuneko yoNyaka Womntwana Ehlabathini Lonke okanye iNkomfa Yamalungelo Omntwana.
Ukubuyisela impilo efezekileyo ebazalini nakubantwana abangakwazi ukuzenzela nto kuya kuba yinto elula kuKristu Yesu, uKumkani walo rhulumente wasezulwini. Imimangaliso awayenzayo ngoxa wayesemhlabeni isenza siqiniseke. (Luka 6:17-19; Yohane 5:3-9; 9:1-7) Kwanokuvusa abantwana abafileyo nabazali abafileyo akusayi kumoyisa!—Mateyu 9:18-25.
Hayi indlela okuvuyisa ngayo ukwazi ukuba ixesha lokuba uThixo athabathe amanyathelo ngenxa yabantwana abasemhlabeni lisondele!
[Ibhokisi/Imifanekiso ekwiphepha 12]
Ukunceda Abantu Abaselula
AmaNgqina kaYehova anomdla ekuncedeni abantu abaselula ukuba baphephe iingxaki nasekubaboniseni indlela elunge ngakumbi yokujamelana neengxaki ezingaphephekiyo. Ukutyhubela iminyaka aye ngenxa yoko apapasha iincwadi eziliqela ezenzelwe ukuhlangabezana neemfuno zabantu abaselula—ukususela kwabo bangekayi esikolweni ukuya kutsho kwabakwishumi elivisayo. Ezi mpapasho ziquka incwadi ethi Incwadi Yam Yamabali EBhayibhile nethi Imibuzo Yabantu Abaselula—Iimpendulo Eziluncedo kwakunye nevidiyo enomxholo othi Young People Ask—How Can I Make Real Friends? Unokuzifumana kumaNgqina kaYehova ahlala kufutshane nawe okanye ngokubhalela abapapashi beli phephancwadi.
AmaNgqina kaYehova ayababonisa abantwana bawo ukuba bayafunwa yaye bayathandwa ngokuxubusha nabo rhoqo ngeengxaki zabo. Abazali badla ngokusebenzisa ingcombolo ekwezi ncwadi zokufunda zikhankanywe ngasentla njengesiseko senkqubo eluncedo nethe rhoqo yokuqeqeshwa kolutsha. Mhlawumbi nawe ungathanda ukwenza ngendlela efanayo kwabakho abantwana.