Ngaba Kuya Kuze Kuphinde Kubulawe Abantu Ngenkohlakalo?
NGUMBHALELI KAVUKANI! ESWEDEN
NGOJANUWARI 26-28, 2000, iinkulumbuso Zamazwe nabameli boorhulumente abangama-48 abasuka ehlabathini lonke bahlanganisana kwikomkhulu laseSweden beze kwiStockholm International Forum on the Holocaust. Iintetho ezawa kwelo qonga zabonisa ukuba iinkokeli zehlabathi zinxubile, zicinga ukuba ubuNazi busenokuvuselelwa. Owayesakuba yiNkulumbuso yakwaSirayeli uEhud Barak wathi: “Le ngqungquthela inomyalezo oya ehlabathini lonke: Ningaze ninyamezele namnye urhulumente apha emhlabeni osebenzisa inkohlakalo nokubulala nocalucalulo ebantwini ngenxa nje yonqulo, uhlanga okanye ibala labo.”
Akuxhalabisi AmaYuda Kuphela
Abantu abaninzi ehlabathini lonke badibanisa ibinzana elithi “Ukubulawa Kwabantu Ngenkohlakalo” namaYuda kuphela. Noko ke, akho namanye amaxhoba. Kwisikhumbuzo esasasazwa ngokubanzi sokuBulawa Ngenkohlakalo KwamaYuda esasibanjelwe eGreat Synagogue of Stockholm ebudeni bale ngqungquthela, umongameli waseSweden wacebisa esithi makuvulwe oovimba ehlabathini lonke ukuze kukhanyiselwe abantu ngokubanzi ngokuBulawa Kwabantu Ngenkohlakalo. Wathi: “Ngoku masikwazi oku kubulawa ngokumanyumnyezi kwamaRoma [iiGypsies], ukubulawa ngogonyamelo kwabantu abangenakuzenzela nto nokutshutshiswa nokubulawa kwamafanasini, nabachasi kwakunye namaNgqina kaYehova.”
Urhulumente waseSweden wavelisa incwadi ethetha ngokuBulawa Kwabantu Ngenkohlakalo ethi Tell Ye Your Children, eyasasazwa simahla kulo lonke elo kuzo zonke iintsapho ezinabantwana. Le mpapasho ithi amaNgqina kaYehova “ala ukwenza isifungo zokuzinikela kuHitler neJamani yamaNazi. Axhathisa ngendlela ekhethekileyo kuba ukutyikitya nje uxwebhu oluthi ayazinikela kwakuya kukunqumamisa ukutshutshiswa kwawo—kodwa ambalwa ayenzayo loo nto.”
Ukubulawa Kwabantu Ngenkohlakalo NamaNgqina KaYehova
Ngowe-1933, kwakukho amaNgqina kaYehova amalunga nama-25 000 eJamani. Amawakawaka kuwo aba ngabantu bokuqala ukuphoswa kwiinkampu neentolongo zamaNazi. Avakalisa ubundilele bawo njengamaKristu kuzo zonke iindidi zezobupolitika nezomkhosi. Awazange amkhahlele uHitler. Ala ukwamkela ingcamango yobuhlanga yamaNazi nokuba nenxaxheba kumkhosi kaHitler. Kwafa amalunga nama-2 000, angaphezu kwama-250 kuwo esifa ngokubulawa.
Ngaphezu koko, amabanjwa angamaNgqina anceda amanye amabanjwa awayevalelwe nawo, kuquka namaYuda, ukuba anyamezele. Akwenza oko ngokubethelela ithemba elisekelwe eBhayibhileni nangokwabelana ngayo yonke into awayenayo nabantu abagulayo nababuthathaka, de awaphe nesonka sawo sokugqibela. Kwiminyaka yokuqala yentshutshiso yamaNazi, akhupha inkcazelo ngondlela-mnyama ngobukho beenkampu zoxinaniso noko kwakuqhubeka kuzo. Ukususela ngoko, kumaphephancwadi awo asasazwa ehlabathini lonke, IMboniselo noVukani!, apapasha amanqaku awahlukahlukeneyo athetha ngezenzo zenkohlakalo zamaNazi kwakunye namabali abo basinda apho.
Uloyiko lokuba ubuNazi bungaphinda bubuye lwalubhaliwe ebusweni babameli ababekwiStockholm International Forum on the Holocaust. UNjingalwazi Yehuda Bauer, umalathisi weInternational Center for Holocaust Studies at the Institute of Contemporary Jewry, kwaSirayeli, wathi: “Ekubeni kwakukhe kwenzeka, kusenokuphinda kwenzeke, kungekhona ngendlela efanayo, kungeyomfuneko nokuba kwenzeke kubantu abafanayo, kungenziwa ngabantu abafanayo, kodwa kuye nabani na nangubani na. Kwakungenakufaniswa nanto, kodwa ngoku ikho into efana nako.”
[Umfanekiso okwiphepha 28]
AmaNgqina kaYehova ayesahlulwa ngophawu lwe-“purple triangle” ezinkampini
[Imifanekiso ekwiphepha 28, 29]
1. UJulius Engelhardt, owayengomnye wamaNgqina kaYehova, wabulawa ngamaNazi eBrandenburg ngoAgasti 14, 1944
2. AmaNgqina kaYehova amathathu abuyela emakhaya emva kokukhululwa eSachsenhausen, ngowe-1945
3. UElsa Abt, iNgqina elahlulwayo kwintwazana yalo laza lavalelwa malunga neminyaka emithathu
[Inkcazelo]
Nordrhein-Westfälisches Hauptstaatsarchiv, Düsseldorf
[Imifanekiso ekwiphepha 29]
AmaNgqina awasindayo ayaphefumla kwezi vidiyo