Yimani Ngokuqinileyo Ningahexi
Abagcini Bengqibelelo Abanenkalipho Boyisa Intshutshiso YamaNazi
“YIBA nobulumko, nyana wam, uze uyenze ibe nemihlali intliziyo yam, ukuze ndimphendule ondingcikivayo.” (IMizekeliso 27:11) Esi sibongozo sibonisa ukuba izidalwa zikaThixo ezikrelekrele ziyakwazi ukuvuyisa intliziyo kaYehova ngenxa yokuba zithembekile yaye zinyanisekile kuye. (Zefaniya 3:17) Noko ke, uSathana, umngcikivi, uzimisele ukwaphula ingqibelelo yabo bakhonza uYehova.—Yobhi 1:10, 11.
Ingakumbi ukususela kwinxalenye yokuqala yenkulungwane yama-20 xa wakhutshwa emazulwini waza waphoselwa emhlabeni, uSathana waba nomsindo omkhulu kubantu bakaYehova. (ISityhilelo 12:10, 12) Sekunjalo, amaKristu okwenyaniso aye ‘ema ngokuqinileyo engahexi’ yaye aye agcina ingqibelelo kuThixo. (Kolose 4:12) Makhe sithi gqabagqaba ngomzekelo omnye obalaseleyo wokugcina ingqibelelo enjalo—umzekelo wamaNgqina kaYehova eJamani ngaphambi kweMfazwe Yehlabathi II.
Umsebenzi Wenzondelelo Ukhokelela Ekuvavanyweni Kwengqibelelo
Kwiminyaka yee-1920 nasekuqaleni kweminyaka yee-1930, iBibelforscher (aBafundi BeBhayibhile), njengoko amaNgqina kaYehova ayesaziwa njalo eJamani, yasasaza uncwadi oluninzi lweBhayibhile. Phakathi kowe-1919 nowe1933, ngokomlinganiselo yayihambisa iincwadi, iincwadana, okanye amaphephancwadi asibhozo kwintsapho nganye eJamani.
Ngelo xesha, iJamani yayinabalandeli abaninzi abathanjisiweyo bakaKristu. Enyanisweni, kubantu abangama-83 941 abathabathayo kwiSidlo seNkosi Sangokuhlwa ngowe-1933 ehlabathini lonke, phantse abangama-30 ekhulwini babehlala eJamani. Kungabanga thuba lide, yavavanywa ngokuqatha ingqibelelo yala maNgqina aseJamani. (ISityhilelo 12:17; 14:12) Ukugxothwa emisebenzini, ukugqogqwa emakhaya, nokugxothwa ezikolweni ngokukhawuleza kwathi kratya kwaba kukubethwa, kukubanjwa nokufakwa entolongweni. (Umfanekiso 1) Ngenxa yoko, kwiminyaka eyayingaphambi kweMfazwe Yehlabathi II, amaNgqina kaYehova ayesisi-5 ukusa kwi-10 ekhulwini kwabo babevalelwe kwiinkampu zoxinaniso.
Isizathu Sokuba AmaNazi Atshutshise AmaNgqina
Noko ke, kwakutheni ukuze amaNgqina kaYehova axhokonxe umsindo wolawulo lwamaNazi? Kwincwadi yakhe ethi Hitler—1889-1936: Hubris, unjingalwazi wembali uIan Kershaw uthi amaNgqina aba lixhoba lentshutshiso kuba akwala “ukwenza oko kwakufunwa ngurhulumente wamaNazi.”
Incwadi ethi Betrayal—German Churches and the Holocaust, eyahlelwa ngunjingalwazi wembali uRobert P. Ericksen nonjingalwazi wezifundo zamaYuda uSusannah Heschel, yacacisa ukuba amaNgqina “ala ukuba nenxaxheba kugonyamelo okanye ukusebenzisa umkhosi. . . . AmaNgqina ayekholelwa kubundilele kwezobupolitika, okwakuthetha ukuba ayengenakuvotela uHitler okanye akhahlele uHitler.” Umthombo ofanayo wongezelela usithi, oku kwacaphukisa amaNazi kwaza kwabeka ubomi bamaNgqina esichengeni kuba “ubuSoshiyali beSizwe babungenakubunyamezela ukwala okunjalo.”
Uqhankqalazo Lwehlabathi Lonke Nohlaselo Olunamandla
Ngesigidimi esikhethekileyo, ngoFebruwari 9, 1934, uJoseph F. Rutherford, owayephambili kumsebenzi ngelo xesha, wathumelela uHitler ileta yoqhankqalazo ephendula ukunganyamezeli kwamaNazi. (Umfanekiso 2) Ngo-Oktobha 7, 1934, ileta kaRutherford yalandelwa ziileta neetelegram ezingama-20 000 zoqhankqalazo eziya kuHitler ezazivela kumaNgqina kaYehova kumazwe angama-50, kuquka neJamani.
AmaNazi aphendula ngokuwatshutshisa ngokuqatha. NgoAprili 1, 1935, amaNgqina avalwa umlomo kulo lonke ilizwe. Yaye ngoAgasti 28, 1936, iGestapo yawahlasela ngamandla. Sekunjalo, amaNgqina “aqhubeka esasaza amaphecana aza aqhubeka elondoloza ukholo lwawo,” itsho iBetrayal—German Churches and the Holocaust.
Ngokomzekelo, ijongile iGestapo, ngoDisemba 12, 1936, amaNgqina angama-3 500 asasaza amashumi amawaka emibhalo esigqibo esibhaliweyo ngokuphathelele indlela ababephathwa kakubi ngayo. Ngokuphathelele olu hlaselo, IMboniselo yathi: “Soyisile yaye silubulele utshaba, hayi uvuyo abanalo abasebenzi abathembekileyo.”—Roma 9:17.
Intshutshiso Ayiphumeleli!
AmaNazi aqhubeka efuna amaNgqina kaYehova. Ngowe-1939, angamawaka amathandathu ayesele evalelwe, yaye amawaka ayethunyelwe kwiinkampu zoxinaniso. (Umfanekiso 3) Yayinjani imeko ekupheleni kweMfazwe Yehlabathi II? Kwababevalelwe, kwakusele kufe amaNgqina angama-2 000, ngaphezu kwangama-250 abulawa. Sekunjalo, uNjingalwazi uEricksen noHeschel babhala besithi, “ubukhulu becala amaNgqina kaYehova abambelela kukholo lwawo ejamelene nenkathazo.” Ngenxa yoko, xa ulawulo lukaHitler lwawa, kwavela amaNgqina oyisileyo kwiinkampu angaphezu kwewaka.—Umfanekiso 4; IZenzo 5:38, 39; Roma 8:35-37.
Yintoni eyanika abantu bakaYehova amandla okunyamezela intshutshiso? Owasinda kwinkampu yoxinaniso uAdolphe Arnold wacacisa esithi: “Nditsho udandathekile, uYehova uyakubona, uyakwazi oko ujamelene nako, yaye uya kukunika amandla owafunayo ukuze woyise loo meko uze uhlale uthembekile. Asisifutshane isandla sakhe.”
Hayi indlela afaneleka ngayo amazwi omprofeti uZefaniya kuloo maKristu athembekileyo! Wathi: “UYehova uThixo wakho uphakathi kwakho. NjengaLowo unamandla, uya kusindisa. Uya kugcoba ngawe enemihlali.” (Zefaniya 3:17) Kwanga bonke abakhonzi bakaThixo oyinyaniso namhlanje bangaxelisa ukholo lwaloo maNgqina anyanisekileyo agcina ingqibelelo ejamelene nentshutshiso yamaNazi yaye ngokufanayo nabo benze intliziyo kaYehova ibe nemihlali.—Filipi 1:12-14.
[Inkcazelo Ngomfanekiso okwiphepha 8]
Państwowe Muzeum Oświȩcim-Brzezinka, courtesy of the USHMM Photo Archives