Akukho Ndawo Ingenamatsha-ntliziyo
UBAXTER, umfundi kwisikolo samabanga aphakamileyo oneminyaka eli-15 ubudala, uchitha iimvakwemini zangoMgqibelo ngendlela ebangela umdla. Utyelela iqela labantu abasele bekhulile, adlale umculo aze abhexeshe amaqela omculo kwindawo yabasele besidla umhlala-phantsi. Umfundisi-ntsapho kaBaxter uthi: “Uyabahlekisa aze abonwabise abantu abahlala apho.” ULucille, oneminyaka engama-78 ubudala, ubonisa ububele ngendlela efanayo. Wondla abasweleyo aze atyelele abaguli abangamalolo. Umhlobo kaLucille uthi ngaye: “Apho lufuneka khona uncedo lwakhe, uya kufika elapho.”
Ukuchazwa Kokuba Litsha-ntliziyo
Ehlabathini jikelele bazizigidi ngezigidi abantu abanesimo sengqondo sokuba, ‘Xa kufuneka uncedo ndimele nditsibe kuqala.’ Bancedisa ezakhiweni naseziofisini, kwimizi-mveliso, kumakhaya abo bangenakuzinyamekela, kumakhaya abo bagulela ukufa, kwiinkampu zeembacu, kumaziko abo bangenamakhaya, kumaziko omlilo, kumaziko eentlekele, kwiindawo zokugcina izilwanyana nezinye ezingakumbi. Akho kuyo yonke indawo! Basebenzisa ubuchule babo kwimisebenzi esusela ekwakheni ishedi, baqokelele imali, bakhulise iintsana ezilahliweyo baze bathuthuzele abagulela ukufa. Bangamatsha-ntliziyo—abantu abatshintsha ubomi babantu abasweleyo.
Ukuba litsha-ntliziyo kuthiwa “yinkcubeko eqheliselwayo.” Iquka izinto ezinjengokuzibophelela, umoya wokuzincama, ukungahlawulwa, nokuzinikela ngenxa yabanye. Amanye amatsha-ntliziyo amabini angamagqala athi: “Inkonzo yamatsha-ntliziyo kukunikela ngeziqu zethu: ngexesha lethu sisebenzisa izandla neenyawo zethu, iingcamango zethu, amandla ethu okunceda omnye umntu, ubuchule bethu bokucombulula iingxaki, ulwazi lwethu.” Okubangel’ umdla kukuba, ukupha okunjalo kuyawanceda namatsha-ntliziyo lawo.—Bona ibhokisi enomxholo othi “Namatsha-ntliziyo Ayangenelwa.”
Ayanda—Nemfuneko Yawo Iyanda
EUnited States, baqikelelwa kwizigidi ezili-100 abantu abangamatsha-ntliziyo—yaye bayanda. Kutshanje uKathleen Behrens, umlawuli oyintloko wombutho wamatsha-ntliziyo eNew York Cares, umxelele oku uVukani!: “Umbutho wethu uqhubeka ukhula ngendlela emangalisayo. Kulo nyaka nje uphelileyo, kukho amatsha-ntliziyo amatsha angaphezu kwama-5 000 aye asithelela.” Amaqela amatsha-ntliziyo aseYurophu akhula ngendlela efanayo. Ngokomzekelo, eFransi, inani lamatsha-ntliziyo belisanda ngesi-6 ekhulwini kumashumi amabini eminyaka edluleyo. Noko ke, asemaninzi amatsha-ntliziyo afunekayo. Kwelinye icala, iUnited Nations Volunteers (umbutho weZizwe Ezimanyeneyo) ithi ithe xa ibijonga imeko esehlabathini yafumanisa ukuba, “kufuneka amatsha-ntliziyo amaninzi namhlanje kunanini na ngaphambili.” Umphathi wenye imyuziyam wathi: “Thina apha simi ngamatsha-ntliziyo.”
Kodwa, kusekho umnqa. Nangona, abalathisi, abaphathi nabalawuli abaninzi abasebenza namatsha-ntliziyo bevakalelwa kukuba umsebenzi wawo “uxabiseke ngaphezu kwegolide,” umsebenzi omninzi owenziwa ngamatsha-ntliziyo awuphawulwa ngabantu. Ukuze zilungise loo nto, iZizwe Ezimanyeneyo ziye zagqiba kwelokuba zisebenzise unyaka wama-2001 njengonyaka wokuba kunikelwe ingqalelo kumatsha-ntliziyo. Ibhokisi enomxholo othi “Unyaka Wehlabathi Lonke Wamatsha-ntliziyo” ichaza ezinye izinto iZizwe Ezimanyeneyo ezinethemba lokuziphumeza.
Okwangoku, kukho iimeko ezilucelomngeni kumatsha-ntliziyo nakwabo balathisa umsebenzi wawo. Sekunjalo, kusekho abantu abaninzi ehlabathini lonke abasazimiseleyo ukuba ngamatsha-ntliziyo. Yintoni ebaqhubela kuloo nto? Yintoni abayiphumezayo? Yaye banokubuchaphazela njani ubomi bakho?
[Ibhokisi/Umfanekiso okwiphepha 14]
Namatsha-ntliziyo Ayangenelwa
UMichael olitsha-ntliziyo lokwexeshana uthi: “Ukwenza umgudu wokunceda abanye kuye kwandinika umvuzo ongaphaya novuyisayo, engendandingawufumananga ukuba ndandiqolozele kumsebenzi wam.” AsingoMichael yedwa ovakalelwa ngolo hlobo. USharon Capeling-Alakija, umalathisi oyintloko weUnited Nations Volunteers, uthi: “Ehlabathini lonke abantu . . . abangamatsha-ntliziyo bayazi kakuhle indlela abangenelwa ngayo kumava abawafumanayo.” UGqr. Douglas M. Lawson, ingcaphephe yomsebenzi wamatsha-ntliziyo, uqinisekisa ukuba abaphengululi baye bafumanisa ukuba “rhoqo emva nje kweeyure ezimbalwa zokwenza umsebenzi ngokuzithandela amandla engqondo ayavuseleleka kangangokuba lo msebenzi uye waphiwa igama elithi ‘Imincili Yetsha-ntliziyo.’” Yaye “imincili yetsha-ntliziyo” asiyomvakalelo idlulayo. Abaphengululi kwiCornell University eUnited States benza uhlolisiso kwiqela labantu ngaphezu kweminyaka engama-30 baza bafumanisa ukuba “abo babengamatsha-ntliziyo babonwabile yaye besempilweni kunabo babengakwenzi oko.” Okubangel’ umdla kukuba, iBhayibhile ithi: “Kunoyolo ngakumbi ukupha kunokwamkela.”—IZenzo 20:35; IMizekeliso 11:25.
[Ibhokisi/Umfanekiso okwiphepha 15]
Unyaka Wehlabathi Lonke Wamatsha-ntliziyo
NgoNovemba 20, 1997, iNgqungquthela YeZizwe Ezimanyeneyo yavakalisa unyaka wama-2001 ‘njengoNyaka Wehlabathi Lonke Wamatsha-Ntliziyo, [International Year of Volunteers]’ (IYV 2001). Ngokutsho kweZizwe Ezimanyeneyo, kumele kufezwe izinto ezine kulo nyaka.
Amele aqondwe ngakumbi Oorhulumente bakhuthazwa ukuba bakuqonde ngakumbi ukubaluleka kwamatsha-ntliziyo ngokuhlolisisa nokubhala phantsi izinto aziphumezileyo baze bawanike iimbasa lawo aye enza imisebenzi ebalaseleyo.
Amele akhuthazwe ngakumbi Amazwe ayabongozwa ukuba awakhuthaze ngakumbi amatsha-ntliziyo ngokuthi, ngokomzekelo, amkele inkonzo yamatsha-ntliziyo njengento enokuthabathela indawo inkonzo yomkhosi okanye ngokungawahlawulisi irhafu.
Ukusasazwa kwenkcazelo Amaziko eendaba ayacelwa ukuba afak’ isandla ekusasazeni indlela ophumelela ngayo umsebenzi wamatsha-ntliziyo. Loo nto iya kuphumela ekubeni, ezo nkqubo ziphinde zisetyenziswe, ngaloo ndlela “kusongiwa iindleko zokuqulunqa iinkqubo ezintsha ekuhlaleni.”
Imele ibhengezwe Imibutho yamatsha-ntliziyo ikhuthazwa ukuba yenze imiboniso yokwazisa uluntu ngokubanzi ngeengenelo ezifunyanwa libutho labantu ngomsebenzi wamatsha-ntliziyo.
IZizwe Ezimanyeneyo zinethemba lokuba i-IYV 2001 iya kubangela ukuba kwenziwe izicelo ezingakumbi zenkonzo yamatsha-ntliziyo, ibangele nabantu abangakumbi bazinikele kwinkonzo yamatsha-ntliziyo, ize ibangele abantu banikele ngakumbi ngemali nangezinye izinto ezininzi eziya kunceda imibutho yamatsha-ntliziyo ukuze kuhlangatyezwane neemfuneko ezinkulu zebutho labantu. Isimbuku soorhulumente abali-123 baye badibanisa izandla ekuxhaseni iinjongo zesi sindululo seZizwe Ezimanyeneyo.