Imbono YeBhayibhile
UThixo Unyamezela Ukusa Kuwuphi Umkhamo?
“UTHIXO, NANGONA EBENGATHANDA UKUBONAKALISA INGQUMBO YAKHE AZE ENZE NAMANDLA AKHE AZIWE, WAZINYAMEZELA NGOKUZEKA KADE UMSINDO OKUKHULU IZITYA ZENGQUMBO EZENZIWE ZAFANELEKELA INTSHABALALO.”—ROMA 9:22.
UKUTYHUBELA imbali uThixo uye wanyamezela ububi obuninzi nobungendawo obuphandle. Ngaphezu kweminyaka engama-3 000 eyadlulayo, uYobhi wakhalaza ngelithi: “Kutheni abangendawo beqhubeka bephila, besiba badala, besongama nangendyebo? Inzala yabo imiselwe ngokuqinileyo phambi kwabo, nabo baphuma kubo phambi kwamehlo abo. Izindlu zabo ziluxolo, azinkwantyi, yaye intonga kaThixo ayikho phezu kwabo.” (Yobhi 21:7-9) Abanye abathanda okusesikweni, abafana nomprofeti uYeremiya, nabo bavakalisa inkxalabo ngokunyamezela kukaThixo abantu ababi.—Yeremiya 12:1, 2.
Ucinga ntoni wena? Ngaba umangalisiwe kukuvumela kukaThixo ubungendawo? Ngaba maxa wambi uvakalelwa kukuba uThixo umele akhawulezise abatshabalalise bonke abantu abangendawo ngaphandle kokulibazisa? Khawuhlolisise oko iBhayibhile ithi ngumda wokunyamezela kukaThixo nezizathu zoko.
Kutheni UThixo Enyamezele?
Okokuqala, simele sibuze: Kutheni uThixo, onemilinganiselo ephakamileyo yobulungisa, kwasekuqaleni enyamezela ubungendawo? (Duteronomi 32:4; Habhakuki 1:13) Ngaba oku kuthetha ukuba uyabamkela ubungendawo? Nakanye! Cinga ngalo mzekelo ulandelayo: Yiba nomfanekiso-ngqondweni wogqirha wotyando ongayithobeliyo imigaqo yococeko yaye obavisa ubuhlungu obunganyamezelekiyo abantu abagulayo abaza kuye. Ukuba ebesebenza esibhedlele, ngaba ebengayi kugxothwa ngokukhawuleza? Kodwa kukho iimeko ezikhethekileyo apho ukunyamezela okungaqhelekanga bekuya kuba yimfuneko. Ngokomzekelo, kwimeko yongxamiseko lokwenene, mhlawumbi edabini, ngaba bekungayi kuba yimfuneko ukunyamezela oogqirha abasebenzisa iindlela zakudala neziyingozi, mhlawumbi bekwasebenzisa izixhobo zokutyanda ezigqalwa njengezingekho mgangathweni?
Ngokufanayo, namhlanje uThixo ngomonde unyamezele izinto ezininzi ezingamkelekanga ngokupheleleyo kuye. Nangona ebuthiyile ubungendawo, ubuvumele ukuba buqhubeke okwethutyana. Zikho izizathu ezifanelekileyo zokuba enjenjalo. Phakathi kwezinye, oku kuvul’ ithuba lokuba imibandela ebalulekileyo eyaphakanyiswa yimvukelo kaSathana emyezweni wase-Eden iqosheliswe ngokupheleleyo. Le yimibandela esekelwe kwindlela yobulungisa nokulunga kwendlela kaThixo yokulawula. Kwakhona, ukunyamezela ngomonde kwakhe ubungendawo kunik’ ixesha elaneleyo nethuba lokuba abo babandakanyeke ebubini baguquke.
UThixo Onobubele, Onyamezelayo
Abazali bethu bokuqala, uAdam noEva, bathelela uSathana ekuvukeleni uThixo. Ngokufanelekileyo, uThixo wayenokubatshabalalisa apho ngoko nangoko. Kunoko, waba nenceba nonyamezelo, ngothando wabavumela ukuba babe nabantwana. Kodwa abo bantwana, kunye nabo bonke abantu abayinzala yabo, bazalwa benesono.—Roma 5:12; 8:20-22.
UThixo wazimisela ukuluhlangula uluntu kwelo shwangusha. (Genesis 3:15) Noko ke, okwangoku, ngenxa yokuba eyiqonda indlela ukungafezeki okwafunyanwa njengelifa kuAdam okusichaphazela ngayo, uyanyamezela yaye ubonisa inceba engathethekiyo. (INdumiso 51:5; 103:13) ‘Unobubele bothando obuninzi’ yaye ukulungele kwaye uyakufuna ‘ukuxolela ngokukhulu.’—INdumiso 86:5, 15; Isaya 55:6, 7.
Imida Yokunyamezela KukaThixo
Noko ke, ibingayi kuba luthando yaye bekungayi kuba sengqiqweni ngoThixo ukuba avumele ububi buqhubeke ngonaphakade. Akakho ubawo onothando obeya kunyamezela ngokungapheliyo ububi obenziwa ngomnye woonyana bakhe oqhubeka evisa ubuhlungu amalungu entsapho ngabom. Ngoko ke, umonde kaThixo ngesono uya kusoloko uhambisana nezinye iimpawu ezifana nothando, ubulumko nokusesikweni. (Eksodus 34:6, 7) Xa injongo yakhe yokuzeka kade umsindo ifezekile, ukunyamezela kwakhe ubungendawo kuya kuphela.—Roma 9:22.
Umpostile uPawulos wakucacisa ngokucacileyo oku. Ngesinye isihlandlo wathi: “Kwizizukulwana ezidluleyo wazivumela zonke iintlanga ukuba zihambe ngeendlela zazo.” (IZenzo 14:16) Ngesinye isihlandlo uPawulos wathetha ngendlela ‘uThixo aye akawananza ngayo amaxesha okungazi okunjalo’ ngabantu abangakhange bayithobele imithetho nemigaqo yakhe. UPawulos wahlabela mgama esithi: “Ngoku [uThixo] uxelela uluntu ukuba lufanele lonke kuyo yonk’ indawo luguquke.” Ngoba? “Ngenxa yokuba umise imini anenjongo ngayo yokuba agwebe umhlaba omiweyo ngobulungisa.”—IZenzo 17:30, 31.
Ngenelwa Ngoku Kukunyamezela KukaThixo
Ngokuqinisekileyo ke ngoko, akakho omele acinge ukuba angayityeshela imithetho kaThixo aze ngamathub’ athile acele ukuxolelwa nguThixo xa efuna ukubaleka imiphumo yezenzo zakhe. (Yoshuwa 24:19) Uninzi lwamaSirayeli amandulo lwalucinga ukuba lungakwenza oko. Lwalungafuni ukuguquka. Lwalungayiqondi injongo yokunyamezela nomonde kaThixo. UThixo akazange abunyamezele ngonaphakade ububi balo.—Isaya 1:16-20.
IBhayibhile ibonisa ukuba ukuze umntu awuphephe umgwebo kaThixo wokugqibela, umele ‘aguquke’—oko kukuthi, akuvume ngokuphandle ukungafezeki nokuba nesono kwakhe phambi kukaThixo, aze asuke ebubini ngokupheleleyo. (IZenzo 3:19-21) Uya kwandula ke uYehova uThixo, amxolele ngesizinzi sedini likaKristu. (IZenzo 2:38; Efese 1:6, 7) Ngexesha lakhe elifanelekileyo, uThixo uya kuyilungisa yonke imiphumo ebuhlungu yesono sika-Adam. Kuya kubakho “izulu elitsha nomhlaba omtsha” apho angasayi kunyamezela ‘izinto ezifuna ukutshatyalaliswa.’ (ISityhilelo 21:1-5; Roma 9:22, Phillips) Onjani ukuncumisa umvuzo wokunyamezela kukaThixo okukhethekileyo, kodwa okunemida!
[Umfanekiso okwiphepha 29]
UThixo wavumela uAdam noEva ukuba babe nabantwana