Ukuhlangabezana Nale Ntlekele

“OKO KUSILE SIHAMBA. SIBALEKA NAMAGAMA ETHU. AKUKHO NALA KANONKALA AMANZI, KUNANI KONA UKUTYA. YONKE IMIZI IYINGQUSHU.”—UHARJIVAN, OWASINDA KWINYIKIMA ENOMKHAMO OSISI-7,9 EINDIYA.

UKUBONA indlela evunguza ngayo inyikima kuyoyikisa. Omnye owasinda kwinyikima yowe-1999 eTaiwan ukhumbula oku: “Kwakutaka iincwadi kwiwodrophu ekuphakama kuziinyawo ezisibhozo eyayingakumandlalo wam. Umnqwazi wesithuthuthu endandisandul’ ukuwuthenga wothuleka phezu kwewodrophu waza kuwa emandlalweni kanye ecaleni kwentloko yam.” Emangalisiwe, wongezelela ngelithi, ‘waphantsa wandibulala.’

Emva Kokusinda

Ukusinda kwinyikima kuyoyikisa, kodwa oko kusinda kusisiqalo nje. Kwiiyure nje emva kweso siganeko, abasebenzi abanikela uncedo bazama ukukhangela baze banyange abo benzakeleyo. Ngokufuthi, badla ngokuyenza loo nto benomothuko. Enye indoda eyayicinga ngokumba intaba yodaka eyayigqume ummandla ehlala kuwo emva kwenyikima yakutshanje e-El Salvador ithi: “Kufuneka silumke gqitha. Ukuba ngokukhawuleza umhlaba unokuphinda ushukume, yonke le nduli inokuphinda iwe.”

Maxa wambi abantu bazincama ngokukhethekileyo ngelokuzama ukufumana amaxhoba. Ngokomzekelo, xa inyikima enkulu yahlasela i-Indiya ebutsheni bowama-2001, uManu, indoda ekhulileyo ngoku ehlala eUnited States, wabuyela kwilizwe lakhe. Wagqiba kwelokuba: “Mandigoduke, ndingayi kunceda intsapho yakowethu nje kuphela, kodwa bonke abo basenkathazweni.” UManu wafika kukubi kwiindawo awayezityelele. Noko ke, wathi: “Abantu bakhaliphe ngendlela emangalisayo.” Enye intatheli yathi: “Bonke abantu endibaziyo banikela ngako konke ababenokukwazi ukwenjenjalo ngako—umvuzo wemini, oweveki okanye owenyanga, inxalenye yemali ababezongele yona okanye nantoni na ababenokuyinikela.”

Kambe ke, kunokuba lula ukususa ingqushu uze unyange abenzakeleyo kunokubuyisela kwisiqhelo ubomi obudlavulwe yimizuzu embalwa yentlekele. Cinga nje ngoDelores, ibhinqa elaphulukana nekhaya lalo kwinyikima yase-El Salvador. Uthi: “Kubhetele kwaimfazwe kunayo. Noko sasinayo indawo yokufihl’ intloko ngelo xesha.”

Njengoko kukhankanywe kwinqaku lokuqala, maxa wambi kudla ngokubakho imfuneko enkulu, kungekuphela nje eyoncedo lwezinto eziphathekayo kodwa neyenkxaso engokweemvakalelo. Ngokomzekelo, xa inyikima yadlavula isixeko saseArmenia kwintshona yeKholombiya ebutsheni bowe-1999, kwafa ngaphezu kwewaka, yaye abaninzi basala bothukile yaye bephelelwe lithemba. Omnye ugqirha wengqondo uRoberto Estefan, ondawo yakhe yokuhlala eyatshabalala kuloo ntlekele wathi: “Uba ngaya ngapha, ufike abantu bekhalela uncedo. Nokuba sendiye kuthenga i-hamburger, uninzi lwabantu aluphozisi maseko ukundixelela ngokungehli kobuthongo nokukhathazeka kwabo.”

Njengoko uGqr. Estefan esazi kakuhle, inyikima inokuzisa intlungu engokweemvakalelo. Elinye ibhinqa elazinikelayo ekuncediseni ekwakheni inkampu yeembacu lathi abanye abantu abaphangelayo abazikhathazi ngokuya kusebenza kuba bacinga ukuba baza kufa kungekudala.

Ukunikela Ithemba Kwimeko Enganiki Themba

Ngamaxesha eentlekele ezinjalo, amaNgqina kaYehova enza unako-nako wokunceda abo basindileyo kungekuphela nje ngeemfuno zenyama kodwa nangokomoya nangokweemvakalelo. Ngokomzekelo, ngokukhawuleza nje emva kwenyikima yaseKholombiya ekhankanywe ngaphambilana, iofisi yesebe yamaNgqina kaYehova yaseka ikomiti yasekuhlaleni yongxamiseko. Amawaka amatsha-ntliziyo angamaNgqina asuka kuzo zonke iinxalenye zelizwe anikela ngokutya nemali. Akuzange kube kudala, kwathunyelwa malunga neetoni ezingama-70 kwiindawo ezichaphazelekileyo.

Inkxaso yokomoya idla ngokubaluleka. Ngenye intsasa emva kwenyikima yaseKholombiya, omnye wamaNgqina kaYehova wabona ibhinqa elikhangeleka linomxhelo ophantsi lisehlisa isitrato kwisixeko esidlakadlaka saseArmenia. Waya kulo waza walinika iphecana elinomxholo othi Liyintoni Ithemba Ngabafileyo Obathandayo?a

Eli bhinqa lagoduka nalo eli phecana laza lalifunda ngenyameko. Kwathi xa elinye iNgqina likaYehova langena emzini walo, lalibalisela ngokwalehlelayo. Le nyikima yonakalisa izindlu ezininzi elalinazo kwesi sixeko nezazilingenisela imali eninzi. Ngoku lalihlwempuzekile. Kodwa kwakungaphelelanga apho. Kuloo nyikima, indlu elalihlala kuyo nonyana walo oneminyaka engama-25 yadilikela lo nyana yaza yambulala. Eli bhinqa laxelela eli Ngqina ukuba alizange libe nomdla kunqulo ngaphambili kodwa ngoku lalinemibuzo emininzi. Eli phecana lalinika ithemba lokwenene. Kungekudala kwaqaliswa isifundo seBhayibhile sekhaya kunye nalo.

AmaNgqina kaYehova aqinisekile ukuba kuya kubakho ixesha apho uluntu lungasayi kusongelwa ziintlekele zemvelo, kuquka iinyikima. Ingcombolo siya kuyifumana kwinqaku elilandelayo.

[Umbhalo osemazantsi]

[Ibhokisi ekwiphepha 20]

ZILUNGISELELE!

◼ Qiniseka ukuba izifudumezi ezisebenzisa amanzi zibotshelelwe phantsi yaye izinto ezinzima ziphantsi okanye zikwiishelufu ezingaphantsi.

◼ Fundisa amalungu entsapho indlela yokucima amandla ombane kwakunye negesi namanzi.

◼ Faka izicima-mlilo ekhayeni lakho kwakunye nezinto zoncedo olungxamisekileyo.

◼ Yiba nonomathotholo omncinane oneebhetri ezintsha.

◼ Ziqeqesheni njengentsapho, nize nibethelele imfuneko (1) yokuhlala nizolile, (2) nicime izitovu nezifudumezi, (3) nime ngasemnyango okanye ningene ngaphantsi kwetafile okanye ngaphantsi kwedesika, nize (4) nihlalele kude neefestile, izipili neetshimini.

[Ibhokisi/Umfanekiso okwiphepha 21]

IINYIKIMA KWASIRAYELI

UNjingalwazi Amos Nur ubhala athi, uSirayeli “unembali ende neqhubekayo yeenyikima emhlabeni.” Isizathu sikukuba inxalenye yoMwonyo Omkhulu—umngxuma ophakathi kwezixwexwe zomhlaba waseMeditera naseArabia—utyhubela uye kulo lonke elakwaSirayeli, ukusuka emantla ukuya kutsho emazantsi.

Okubangel’ umdla kukuba, abanye abembi bezinto zakudala bavakalelwa kukuba oononjineli bamandulo babesebenzisa ubuchule obukhethekileyo bokunciphisa umonakalo wenyikima. Oku kungqamana nendlela iBhayibhile eyichaza ngayo inkqubo kaSolomon yokwakha: “Ke intendelezo enkulu, yayijikelezwe zizintlu ezintathu zamatye aqingqiweyo noluhlu lwemiqadi yomsedare; kwaba njalo nangentendelezo engaphakathi yendlu kaYehova, neveranda yendlu.” (1 Kumkani 6:36; 7:12) Ubungqina bobu buchule bokudibanisa imithi kwizakhiwo zamatye buye bafunyaniswa kwiindawo ezahlukeneyo—kuquka isango laseMegido, ekucingelwa ukuba lalikho ngexesha likaSolomon okanye ngaphambi koko. Umphengululi uDavid M. Rohl ucinga ukuba le mithi “yafakelwa ukukhusela isakhiwo ekonakalisweni yinyikima.”

[Umfanekiso]

Amabhodlo enyikima eBet Sheʼan, kwaSirayeli

[Ibhokisi/Imifanekiso ekwiphepha 22]

INTLEKELE YEMIZUZU EMIBINI—IBALI LOMNYE OWASINDAYO

EAhmadabad, eIndiya, intsapho yethu yayilungiselela umtshato womzala wethu. NgoJanuwari 26, 2001, ndavuswa kungekhona kukukhala kwewotshi, kodwa kukushukuma okungathandekiyo. Ndeva ikhabhathi yentsimbi isiya emva naphambili ndaza ndaqonda ukuba kukho nto ingahambi kakuhle. Utat’ omncinci wakhwaza esithi, “Phumani endlwini!” Sithe sakuphuma sabona indlu isiya ngapha nangapha. Kwakubonakala ngathi ayisayi kuphela loo nto. Enyanisweni, yathabatha nje imizuzu emibini.

Kwabonakala kunzima gqitha ukuhlangabezana nale ntlekele kuba yenzeka ngokukhawuleza. Okokuqala, saqinisekisa ukuba amalungu entsapho yethu ayekhuselekile. Imfonomfono neenkonzo zombane zazingasebenzi, ngoko sasingenakwazi ngokukhawuleza ukuba ezinye izizalwane zethu kwiidolophu ezikufutshane zazikweyiphi imeko. Emva kweyure sixhalabile, safumanisa ukuba zazikhuselekile. Yayingenguye wonke umntu owayenethamsanqa. EAhmadabad, ngokomzekelo, kwadilika izakhiwo ezingaphezu kwekhulu yaye abantu abangaphezu kwama-500 baphulukana nobomi babo.

Wonke umntu wayesoyika kangangeeveki eziliqela. Abantu babelala mihla le besoyika enye inyikima ekwakuqikelelwe ukuba iyeza. Izinto azizange zilunge ngokukhawuleza yaye abaninzi bashiywa bengenamakhaya. Yonke le nto yenziwa yinyikima eyathabatha nje imizuzu emibini kodwa eya kuhlala ngonaphakade kwiinkumbulo zethu—Ngokubaliswa nguSamir Saraiya.

[Umfanekiso okwiphepha 20, 21]

Omnye owasinda kwinyikima kaJanuwari 2001 eIndiya uphethe umfanekiso kanina owafayo nosidumbu sakhe esatshiswayo

[Inkcazelo]

© Randolph Langenbach/UNESCO (www.conservationtech.com)