Inyikima!

NGUMBHALELI KAVUKANI! ETAIWAN

“Ndandingqengqile, ndifunda kwigumbi lam elikumgangatho wesithoba eTaipei xa kwaqalisa ukucima izibane. Emva koko igumbi laqalisa ukushukuma ngamandla. Kwakungathi isigebenga esithile siye sathi hlasi esi sakhiwo yaye sasisidlikidlela macala onke. Ndaziphosa ngaphantsi kwetafile njengoko kwakuvakala isithonga sokuwa kwezinto ezikumgangatho ongentla nto leyo eyandenza ndoyika ukuba isilingi iza kuwa. Oku kwabonakala kuqhubeka.”—Intatheli ehlala eTaiwan.

INYIKIMA. Ukuthetha nje ngelo gama kuzisa uloyiko, yaye kutshanje kusenokwenzeka ukuba uyive le nto ngokufuthi ngendlela eyothusayo. Ngokutsho kweU.S. Geological Survey, ngaphezu kwamanani aqhelekileyo eenyikima ezinkulu eziye zabakho ebudeni bowe-1999, umlinganiselo wonyaka wamanani abantu abaye bafa uye waphindwa kabini.

Eyona nyikima iye yankulu ngowe-1999 yayiseTaiwan, apho kudibana khona amazwekazi amakhulu amabini. Lilonke, kukho iintanda ezinkulu ezingama-51 ezaziwayo emhlabeni kulo lonke elaseTaiwan. Ngenxa yoko, akumangalisi ukuba nyaka ngamnye kunikelwa ingxelo yeenyikima ezingama-15 000. Noko ke, inkoliso yazo zincinane kakhulu ukuba ziviwe.

Kwakungenjalo ngoSeptemba 21, 1999. Ngeye-1:47 ekuseni, iTaiwan yadlakazwa yinyikima enkulu kangangokuba uMongameli uLee Teng-hui wathi “yeyona imbi kwesi siqithi kule nkulungwane.” Yathabatha imizuzwana engama-30 kodwa yayilinganiselwa kwisi-7,6 ngokwesikali sikaRichter.a Ubunzulu bale nyikima babungumgama ongaphezu kwekhilomitha nje enye, yaye ngenxa yoko imiphumo yayo yaviwa ngokupheleleyo. ULiu Xiu-Xia ohlala kufuphi nombindi walapho inyikima yenzeka khona uthi: “Ndavuswa kukungcangcazela okukhulu. Ifenitshala yawa, yaye nesibane esasisesilingini sathi phahla phantsi. Andizange ndikwazi ukuphuma kuba umnyango wawuvalwe zizinto eziwileyo neeglasi ezaphukileyo.” UHuang Shu-Hong, owakhutshwa ebhedini yinyikima, wayejamelene nocelomngeni olwahlukileyo. Uthi: “Kwangoko kwacima umbane, ngoko kwakumnyama kakhulu. Ndagxadazela ndaya phandle ndaza ndachitha ubusuku nabamelwane ecaleni kwendlela. Umhlaba wawushukuma ungayeki.”

Imigudu Yokuhlangula

Ngentsasa elandelayo umonakalo obangelwe yinyikima wawubonakala. Izakhiwo ezingama-12 000, ukususela kwizindlu ezinomgangatho omnye ukusa kwizakhiwo ezinemigangatho emininzi, zadilika. Njengoko kubaliswa ngale ntlekele, iingcali zokuhlangula ezivela kumazwe angama-23 zeza eTaiwan zize kunceda amatsha-ntliziyo asekuhlaleni. Amaxhoba amaninzi ayevaleleke kobo butyobo.

Iiyure ezingama-72 zokuqala emva kwale ntlekele zibalulekile ekufumaneni abo basindileyo, kodwa kule meko abasebenzi bokuhlangula bamangaliswa. Ngokomzekelo, inkwenkwe eneminyaka emithandathu ubudala yahlangulwa emva kokuvaleleka iiyure ezingama-87. Yaye eTaipei, nangona abasebenzi babesebenzisa ooganda-ganda abakhulu ukucoca ubutyobo besakhiwo esihlala abantu esinemigangatho eli-12, ngequbuliso kwathi gqi umfana oselula. Yena nomkhuluwa wakhe babevalelekile ngaphezu kweentsuku ezintlanu, yaye bobabini basinda kule ntlekele!

Noko ke, okubuhlungu kukuba asingabo bonke ekwakunokufikelelwa kubo, yaye abasebenzi abahlangulayo babona izinto ezibuhlungu. Ngokomzekelo, inkokeli yelinye iqela yathi: “Besisiva umntwana ekhala kwade kwaziiyure ezisibhozo ezidluleyo. Kodwa wayeka.” Ekugqibeleni, inani labantu abafayo eTaiwan lanyuka laya kutsho ngaphezu kwama-2 300, yaye abantu abangaphezu kwabangama-8 500 benzakala.

Ukujamelana Nemiphumo

Kwenziwa umgudu omkhulu wokunikela ikhusi kumakhulu amawaka ababeshiywe bengenamakhaya ngenxa yenyikima. Ekuqaleni, amanye amaxhoba ayemathidala ukubuyela ngaphakathi ezindlwini. Oku kuyaqondakala, kuba ebudeni bexesha leentsuku ezilishumi emva kwenyikima yokuqala, phantse kwanikelwa ingxelo yeenyikima ezincinane emva kwenkulu ezingama-10 000! Enye yezi yayinomlinganiselo wesi-6,8 ngokwesikali sikaRichter, ibangela izakhiwo ezingomelelanga ukuba zidilike.

Sekunjalo, umsebenzi wokuhlangula waqhubeka. Imibutho eliqela engeyiyo ekarhulumente—kuquka namaqela okuhlangula asemzini, iqela lamaBhuda iTzu Chi nabacimi-mlilo—bachitha ixesha labo besebenzisa nobuchule babo kulo msebenzi. Abanye abantu ababebandakanyekile kolu hlangulo yayingamaNgqina kaYehova. Ngenxa yesiluleko seBhayibhile esikumaGalati 6:10, ayeneenjongo ezimbini. Ayefuna (1) ukunceda abo bahlobene nawo elukholweni yaye (2) enze okulungileyo kubo bonke, kuquka nabo bangakholelwa kwiinkolelo zawo.

Ekupheleni kosuku lokuqala, amaNgqina kaYehova ayesiza neelori ezinokutya, amanzi, iintente nezinto zokuphekela ngaphandle. Ekubeni lonke unxibelelwano lwaluphelile, abadala bamabandla amathandathu kummandla ochaphazelekileyo benza umgudu wokufuna amanye amaNgqina nezalamane zawo kwakunye nezifundo zeBhayibhile nabo banomdla. AmaNgqina afunyanwa engenamakhaya akhuthazwa ukuba ahlale kunye ukuze anyanyekelwe kakuhle yaye kube lula ukuqhagamshelana nawo. Abaveleli abahambahambayo namalungu eKomiti yeSebe yaseTaiwan atyelela qela ngalinye nebandla ngalinye ukuze anikele ukhuthazo.

Inyathelo elalandelayo yayikukulungisa amakhaya neeHolo zoBukumkani ezazonakele. Bandla ngalinye lenza uludwe lwabo babefuna uncedo. Emva koko, phantsi kolwalathiso lweKomiti Yokwakha Yenqila, amaqela amatsha-ntliziyo athunyelwa ukuba alungise apho kuyimfuneko khona. Kwinyanga nje enye emva kwenyikima, lo msebenzi wawugqityiwe.

AmaNgqina kaYehova anikela uncedo nakubamelwane abangengawo amaNgqina. Ngokomzekelo, amaNgqina ayetyelela izibhedlele neendawo ezineentente ukuze anikele intuthuzelo. Kwakhona anikela imibhalo ekhutshelweyo yenqaku elithi “Iintlekele Zokwemvelo—Ukunceda Umntwana Wakho Ahlangabezane Nazo,” epapashwe kwinkupho kaVukani! kaJulayi 8, 1996. Abantu abaninzi baba nombulelo kakhulu bakufumana le ngxelo yaye baqalisa ukuyifunda ngoko nangoko. Njengoko iindlela zazivuliwe, amaNgqina kaYehova athumela izinto ngeelori kwimimandla ekwanti esezintabeni eye yachatshazelwa ngamandla yinyikima.

Abo bafundisisa iBhayibhile bayaqonda ukuba kwaxelwa kwangaphambili ukuba imihla yokugqibela yale nkqubo yezinto iya kuphawulwa ‘ziinyikima zomhlaba kwiindawo ngeendawo.’ (Mateyu 24:7) Kodwa iBhayibhile iyaqinisekisa ukuba kungekudala, phantsi kolawulo loxolo loBukumkani bukaThixo, uluntu alusayi koyika iintlekele zokwemvelo. Ngelo xesha, enyanisweni umhlaba uya kuba yiparadesi.—Isaya 65:17, 21, 23; Luka 23:43.

[Umbhalo osemazantsi]

[Imifanekiso ekwiphepha 27]

AmaNgqina kaYehova ayeqhuba iintlanganiso zawo ngoxa ayehlala ezinkampini

[Umfanekiso okwiphepha 28]

Inyikima yatshabalalisa iindlela ezininzi

[Inkcazelo]

San Hong R-C Picture Company

[Inkcazelo Ngomfanekiso okwiphepha 26]

San Hong R-C Picture Company

[Inkcazelo Ngomfanekiso okwiphepha 28]

Seismogram on pages 26-8: Figure courtesy of the Berkeley Seismological Laboratory