Ulwimi Lwasendle—Imfihlelo Yokunxibelelana Kwezilwanyana
NGUMBHALELI KAVUKANI! EKENYA
NGOKUNGATHANDABUZEKIYO, esinye sezona zipho zixabisekileyo umntu ajizekwe ngaso ngamandla okunxibelelana. Ngokusebenzisa sona siyakwazi ukudlulisela ulwazi olubalulekileyo komnye umntu sisebenzisa amazwi okanye ngaphandle kwamazwi, njengokusebenzisa izimbo zomzimba. Eneneni, inkululeko yokuthetha iseyimbambano enkulu emhlabeni wonke. Ngenxa yoko, bambi bade bacinga ukuba ngabantu kuphela abakwaziyo ukunxibelelana.
Sekunjalo, uphando lubonisa ukuba izilwanyana ziyakwazi ukudlulisela inkcazelo ngeendlela ezikhethekileyo ngokufuthi ezibadidayo abantu. Ewe, “ziyathetha,” kungekhona ngamazwi, kodwa ngezimbo ezibonakalayo njengokushukumisa umsila, ukushukumisa iindlebe, okanye ukuphephezelisa amaphiko. Ezinye iindlela zokunxibelelana zinokuquka ukusebenzisa isandi, njengokukhonkotha, ukugquma, ukuvungama okanye ukuntyiloza kwentaka. Ezinye “iilwimi” ziqondakala lula ebantwini, ngoxa ezinye zifuna ufundisiso lwezenzululwazi ukuze ziqondakale.
Amarhamncwa!
Kuphakathi kuJulayi. ESerengeti National Park enkulu eTanzania, amawaka ngamawaka eenqu (Connochaetes taurinus) asinge emantla ngakwiMasai Mara Game Reserve eseKenya efuna amadlelo aluhlaza. Ngeli thuba lale mfuduko yenzeka minyaka le kumathafa alapho kuvakala indili yesandi ebangelwa ziimpuphu zeenqu. Noko ke, kule ndlela kukho iingozi. Kule ndlela kukho amarhamncwa, anjengeengonyama, amahlosi, kunye namaxhwili. Kwakhona iinqu ziza kubeka ubomi bazo esichengeni xa zinqumla iMara River ezaliswe ziingwenya. Ezi nqu ziwaphepha njani la marhamncwa?
Ukuze idide utshaba, inqu okanye ignu, iza kubaleka umgama omfutshane ize ijike ijonge utshaba lwayo, ngalo lonke elo xesha ijika-jika intloko iyiphosa ngapha nangapha. Kwangaxeshanye iyakhabalaza ngokungathi ishiywa ziingqondo, isenza umboniso ongaqondakaliyo. Kwanerhamncwa elinesibindi liya kumangaliswa kukubona lo mngqungqo ungaqhelekanga. Ukuba liyaqhubeka lisiza, inqu iza kuphinda yenze lo mboniso wayo. Oku kuyaludida utshaba kangangokuba lunokude luyeke ukuzingela emva kokubona loo mboniso. Lo mngqungqo ungaqhelekanga wenze ukuba inqu yaziwe njengeqhula lasendle.
Abazala beenqu abancinane, ii-impala baziwa ngokwenza imitsi emide. Kubantu abaninzi, le mitsi mide inokubonisa umfaneleko namendu. Noko ke, ngamaxesha obunzima, le nyamakazi isebenzisa obu buchule bokuxhuma yenze ukuba kube nzima ngerhamncwa ukuba liyibambe ngemilenze. Le mitsi, enokuba ziimitha ezisi-9 ubude, idlulisela umyalezo ocacileyo kumhlaseli, umyalezo othi, “Landela ukuba nje uza kukwazi ukundileqa.” Ambalwa kakhulu amarhamncwa azimisele ukwenjenjalo ukuze nje abambe i-impala eneenkani!
Ixesha Lesidlo
Endle phayaa amarhamncwa amaninzi kufuneka afunde ubuchule bokuzingela ukuze akwazi ukuzingela. Amathole kufuneka anikel’ ingqalelo njengoko abazali bewabonisa amacebo okuzingela. Kwindawo yokugcina izilwanyana yaseAfrika, ihlosi elinguSaba labonwa lifundisa amathole alo amacebo okuziphilisa. Emva kokuzama ukubamba uhlobo oluthile lwebhadi elalisidla kwelo thafa isithuba esingaphezu kweyure, lenza umtsi wamnye laza laluthi xhakamfu olo sizana lwenyamakazi lalukrwitsha—kodwa alizange lilubulale. Kungabanga thuba lide emva koko, uSaba waphosa eso silwanyana sothukileyo phambi kwamathole akhe, awaba mathidala ukulichukumisa elo xhoba. La mahlosi mancinane asiqonda isizathu sokuba uNina aze nesilwanyana esiphilileyo. Wayefuna ukuba afunde indlela yokubulala ibhadi. Sihlandlo ngasinye ixhoba lizama ukuphakama lize libaleke, amathole anemincili ayeliwisa. Lidiniwe, ibhadi lanikezela kulo mlo. Ebukele emgama, uSaba wawayeka amathole akhe enza into ayithandayo.
Ezinye izilwanyana zidume ngokwenza ingxolo kangangoko kunokwenzeka xa zifuna ukutya. Iqela lamaxhwili amibalabala ayabhavuma, agragrame aze agigitheke ngoxa eleqa ixhoba. Emva kokulibulala, amema amanye amaxhwili ukuba eze kwesi sidlo sikhulu “ngokugigitheka” kwawo okungathandekiyo. Noko ke, amaxhwili akasoloko ezingela xa efuna ukutya. Endle phaya aphakathi kwezilwanyana ezithanda ukutya amaxhoba ezinye izilwanyana—asebenzisa zonke iindlela zokuhlasela amanye amarhamncwa ukuze afumane ixhoba elo. Kaloku, akwadume ngokukwazi ukugxotha iingonyama ekutyeni kwazo! Akwenza njani oko? Njengezilwanyana ezinengxolo, azama ngazo zonke iindlela ukuphazamisa iingonyama ngoxa zisitya. Ukuba ezi ngonyama azinikeli ngqalelo kuloo ngxolo, la maxhwili angxola ngakumbi yaye athi chatha ukudelela oku. Ngokufuthi zithi zakuphazanyiswa, iingonyama zilishiye elo xhoba zize zimke kuloo ndawo.
Kwiinyosi ukufuna ukutya ngumgudu onzima. Uhlolisiso olunzulu lwezenzululwazi lubonise ukuba ngokungqungqa, inyosi iyakwazi ukuxelela ezinye ezikwindlu yeenyosi indawo, nohlobo lokutya ekufumeneyo. Ngomzimba wayo inyosi ithwala uhlobo lokutya, okufana nencindi okanye umungu ikuse kwezinye iinyosi ezikwindlu yeenyosi. Ngokwenza umngqungqo ofana nokubhalwa kwenani elisisibhozo, ayipheleli nje ekukwazini ukubonisa ezinye indawo ukutya okufumaneka kuyo kodwa iyakwazi nokuxela umgama eziza kuwuhamba. Lumka! Kusenokwenzeka ukuba inyosi ebhuza kufuphi nawe iqokelela inkcazelo ebalulekileyo eza kuya nayo ekhaya. Ngempazamo inokuthabatha isiqholo sakho esinuka kamnandi njengesidlo sayo esilandelayo!
Ukugcina Unxibelelwano
Zimbalwa izandi ezinomtsalane njengokugquma kwengonyama kubusuku obuzolileyo. Kuqikelelwa ukuba zininzi izizathu ezenza ukuba kusetyenziswe le ndlela yonxibelelwano. Ukugquma okukhulu kwenkunzi kulumkisa ezinye ukuba ikho kuloo mmandla; ukuba zifuna ukugagana nayo zingasondela. Noko ke, njengoko iyikati enobuhlobo, ingonyama ikwagquma ukuze inxibelelane namanye amalungu eqela layo. Ngokufuthi idla ngokwenza umgqumo ophantsi, yaye ivakale ukuba ayinamsindo. Ngobunye ubusuku ingonyama yaviwa igquma sihlandlo ngasinye emva kwemizuzu eli-15 de ingonyama ehlobene nayo yaphendula mgama. Zaqhubeka “zincokola” kangangemizuzu eli-15 de ekugqibeleni zadibana. Zayeka ukugquma.
Ukuqhagamshelana ngolo hlobo akupheleli nje ekwakheni ubuhlobo obusenyongweni kodwa kukwakhusela nakwimozulu engentle. Isikhukukazi senza izandi eziliqela ezidlulisela imiyalezo eyahlukahlukeneyo kumantshontsho aso. Noko ke, esona sicacileyo sesithabatha ixesha elide, sitsholo ezantsi yaye sikwenza oku ngokuhlwa, ukubonisa ukuba sifikile ekhaya ukuza kuhlala namantshontsho aso. Ethobela ubizo lukaMama, amantshontsho athe saa aqokelelana ngaphantsi kwamaphiko akhe aze alale ebusuku.—Mateyu 23:37.
Ukufuna Iqabane
Ngaba wakha wathi nqumama waza waphulaphula ukuntyiloza kweentaka? Ngaba akumangaliswa yindlela ezintyiloza ngayo? Sekunjalo, ubusazi ukuba injongo yako ephambili asikuko ukonwabisa wena? Iingoma zazo yenye yeendlela zokudlulisela imiyalezo ebalulekileyo. Nangona maxa wambi ukucula iyindlela yokwazisa ummandla wayo, kukwasetyenziswa kakhulu njengendlela yokutsal’ ingqalelo yalawo angangamaqabane afanelekayo. Ngokutsho kweThe New Book of Knowledge, “umculo uhla ngama-90 ekhulwini” xa inkunzi nemazi zide zadibana.
Noko ke, maxa wambi ukufumana iqabane kubandakanya okungakumbi kunengoma nje emnandi. Ezinye iimazi zeentaka zifuna ukuba inkunzi ihlawule “ilobola” ngaphambi kokuba ziyivume. Ngoko ke, inkunzi yehobohobo ifanele iqale ibonakalise ubuchule bayo bokwakha indlwana ngaphambi kokuba ulwalamano lwayo nemazi luhambele phambili. Ezinye iintlobo zeenkunzi zizibonakalisa ukuba ziyakwazi ukunyamekela iintsapho zazo ngokutyisa imazi ngokoqobo.
Indlela enobugoci-goci ezinxibelelana ngayo izilwanyana ayipheleli nje ekwaneliseni iimfuno zazo zokwenyama kodwa ikwadambisa ukulwa ize yandise uxolo endle. Njengoko kusenziwa uphando olungakumbi ngokunxibelelana kwezilwanyana, siza kuva okungakumbi “ngokuncokola kwasendle.” Nangona kusenokwenzeka ukuba asikuqondi ngokupheleleyo, kuzukisa umyili wako, uYehova uThixo.
[Ibhokisi/Imifanekiso ekwiphepha 26, 27]
“Isandi Esiphantsi” Seendlovu
Ngemva kwemini eshushu kwiAmboseli National Park enkulu eKenya, umhlambi omkhulu weendlovu ubonakala ungaphazanyiswa kukufika kwabantu kwindawo yazo. Sekunjalo, kuyo yonk’ indawo kuvakala “ukuncokola kweendlovu,” okususela kwingxokozelo ephantsi kuse kwingxolo ephezulu yokugxalathelana, ukubhavuma, ukufutha, ukukhonkotha nokugragrama kwazo. Enye ingxolo ingaphantsi kwesandi esinokuviwa ngabantu kodwa inamandla kakhulu kangangokuba inokuviwa yindlovu ekumgama weekhilomitha eziliqela.
Iingcali ngokuphathelele indlela eziphila ngayo izilwanyana zisadidekile ziindlela ezinobugoci-goci iindlovu ezidlulisela ngazo imiyalezo ebalulekileyo. UJoyce Poole uchithe ngaphezu kweminyaka engama-20 efunda indlela yokunxibelelana kweendlovu zaseAfrika. Ugqibe ngelithi ezi zidalwa zikhulu, zidume ngamabamba azo athandwayo, zineemvakalelo ezifumaneka kwizilwanyana ezimbalwa kakhulu. UPoole uthi: “Uthi khamnqa xa ubukele oko kwenziwa yindlovu xa ibulisa amalungu entsapho yayo okanye ezinye iindlovu esondelelene kakhulu nazo [okanye] xa kuzalwa ilungu lentsapho elitsha . . . yaye ubani unokubona lula ukuba zineemvakalelo ezinzulu ezinokuchazwa ngamazwi anjengelithi, uvuyo, ukonwaba, uthando, ubuhlobo, imincili, ukumangaliswa, uvelwano, ukufumana isiqabu kunye nentlonelo.”
Xa zidibana emva kokwahlukana ixesha elide, zibulisana ngokwenza ingxokozelo enkulu, njengoko zigxalathelana zize zidibane ngeentloko eziziphakamisele phezulu yaye ziphaphazelisa iindlebe ezizigobileyo. Maxa wambi, indlovu ide ifake umboko wayo emlonyeni wenye. Oku kubulisana kweendlovu kubonakala kuzonwabisa kakhulu, ngokungathi zithi “Owu! Hayi indlela ekumnandi ngayo ukuphinda sidibane!” Amaqhina olwalamano anjalo aqinisa ubuhlobo nenkxaso ebaluleke gqitha ukuze ziqhubeke ziphila.
Kwakhona iindlovu zibonakala zinoburharha. UPoole uchaza into awayibonayo njengoko wayebukela iindlovu zilungisa imilomo yazo ime ngendlela awayichaza ngokuthi luncumo, zishukumisa iintloko zazo ngendlela ebonisa ukuba kukho into ethile ehlekisayo. Wakha waqalisa umdlalo ezawudlala zonke ezi zilwanyana, yaye kangangemizuzu eli-15 zenza izinto ezihlekisayo. Emva kweminyaka emibini, ezinye iindlovu ezazikho zabonakala ziphinda “zincuma” xa zimbona, mhlawumbi zikhumbula indima yakhe kuloo mdlalo. Iindlovu azipheleli nje ekonwabiseni ezinye ngokudlala kodwa zikwaxelisa nezandi ezithile. Kuphando awalenzayo, uPoole wava isandi esinomahluko kweso siqhele ukwenziwa ziindlovu. Xa wenza uphando ngoku, wafumanisa ukuba iindlovu zixelisa ingxolo eyenziwa ziilori ezidlula apho. Yaye zazisenza oku ukuze nje zizonwabise! Kubonakala ngathi iindlovu zizonwabisa nangantoni na.
Kuye kwathethwa izinto ezininzi ngendlela iindlovu ezizila ngazo xa ilungu lentsapho lisehlelwa yintlungu. UPoole wakha wabona imazi yendlovu ibukele imfambilini yayo kangangeentsuku ezintathu waza oku wakuchaza ngale ndlela: “Inkangeleko yobuso” bayo “yayifana naleyo yomntu owehlelwe lishwangusha, odakumbileyo: intloko neendlebe zayo zazithe nxokotho, ibonakala apha emlonyeni ukuba ithe khunubembe.”
Abo babulala iindlovu ukuze bafumane iimpondo zazo abacingi ‘ngonxunguphalo’ lweenkedama ezibone ukubulawa koonina. Aba bantwana bachitha iintsuku zokuqala eziliqela emva kweso siganeko kwikhaya lokugcina iinkedama bezama ukujamelana nale “ntlungu.” Omnye umgcini zilwanyana uthi wakha waziva ezi nkedama “zilila” kusasa. Intlungu enjalo inokubonakala nasemva kweminyaka eliqela oonina befile. UPoole uthi iindlovu ziyaqonda xa abantu bezingcungcuthekisa. Sijonge phambili kwixesha apho abantu nezilwanyana baya kuhlala kunye ngoxolo.—Isaya 11:6-9.
[Umfanekiso okwiphepha 24, 25]
Indlela yokubulisana kwemikholonjane
[Umfanekiso okwiphepha 25]
Inqu yenza umngqungqo ongaqondakaliyo ukuze idide utshaba
[Umfanekiso okwiphepha 25]
“Ukugigitheka” kwexhwili okungathandekiyo
[Inkcazelo]
© Joe McDonald
[Umfanekiso okwiphepha 26]
Ukungqungqa kweenyosi