Kukhenketho Lokubona Izilwanyana EGhana

NGUMBHALELI KAVUKANI! EGHANA

NJENGOKO kwakusithi qheke ukusa nenkungu ityhila, sathi chu kuloo ndlela yomhlaba eziikhilomitha ezingama-80 sisinge kwiMole National Park ekummandla okumantla eGhana. Ummandla esikuwo unengca, amatyholo kunye nemithi emifutshane. Ngamathuba athile, sidlula kwiidolophana ezincinane ezinezindlu ezakhiwe ngodaka zaza zafulelwa ngengca.

Onjani umahluko esawubonayo xa sifika eDamongo, idolophu yasemaphandleni eneevenkile, iindlela ezilungisiweyo neenqwelo-mafutha ezininzi! Abantwana abanxibe iyunifom enombala olubhelu-bungwevu namdaka baya esikolweni. Abafazi abanxibe iimpahla ezimibala-bala bathwele lonke uhlobo lomthwalo entloko—iinkuni, ukutya kunye nee-emele ezizele ngamanzi. Iinqwelo-mafutha kunye noogandaganda benza eyabo ingxolo, yaye abakhwele iibhayisikile bayadlula. Kusafuneka sihambe iikhilomitha ezingama-20 ukuze sifike apho siya khona.

KwiMole National Park

Ekugqibeleni sada safika kule paki. Ngokutsho komkhenkethisi wethu, uZechariah, uMzi Wezilwanyana waseMole wakhiwa ngowe-1971 yaye ugubungela ummandla oziiskwekhilomitha ezingama-4 840. Bekukho iintlobo zezilwanyana ezanyisayo ezingama-93, nezilwanyana ezisi-9 eziphila emhlabeni nasemanzini kunye nezilwanyana ezingama-33 ezirhubuluzayo ezikwingxelo yale paki. Ezi ziquka iingonyama, amahlosi, iingcuka ezinemibala, iingada, iindlovu, iimbabala ezineempondo ezivulekileyo, inyathi encinane yehlathi, iingulube, iimbabala, iimpunzi, iigenets, amaxhama, iimongoose, iimfene, iintlobontlobo zeenkawu, iintlobo ezahlukahlukeneyo zamaxhama, iincanda, iingwenya neenyoka kuquka neenamba. Ukongezelela, zingaphezu kwama-300 iintlobo-ntlobo zeentaka ezikhe zabonwa apha.

Njengoko sasihamba sihesha iimpukane ezimnyama kuloo ngca yayibetha emadolweni, kungekudala sada safika kumhlambi wohlobo oluthile lwamaxhama. Ekuqaleni, kunzima ukuwubona, kuba umbala wawo ufana nezinto eziwangqongileyo. Njengoko siwabukele ngomdla, nawo asithe ntsho ngomdla kangangokuba wawungenakwazi ukuba ngabaphi abakhenkethi. Njengoko sasithabatha imifanekiso, sothuswa kukufutha okwakuvela ngakwicala langasekunene. Inganelisekanga kukuyiphazamisa kwethu, inkunzi enkulu yembabala yabalekela kwityholo elikufutshane.

Emva koko, sabona iindlovu ezinkulu ezine zihleli phantsi komthi omkhulu. Zitsala amasebe ngemiboko yazo zize zitye amagqabi athambileyo. Siyasondela, kuthi kanye xa sikumgama oziimitha ezilishumi kuzo, uZechariah asikhuthaze ukuba sithabathe imifanekiso. Ubetha umva wombayimbayi wakhe, kuze kuvakale isandi sentsimbi esibangela ukuba iindlovu zibaleke phantsi komthi yaye oku kusinika ithuba lokuba sithabathe imifanekiso emihle. Kude kufuphi nje, iindlovu zifumana ichibi lamanzi anodaka zize ziqubhe kulo. UZechariah uyasicacisela ukuba umbala weendlovu uyatshintsha—ukusuka kumbala wazo wemvelo omnyama ukusa kumbala obomvu okanye omdaka—kuxhomekeke kumbala wodaka eziqubha kulo.

Sihamba umgama omfutshane size siwubone ngokupheleleyo loo mmandla wepaki. Izityalo ezikhoyo ziquka imithi yeacacia neyeshea. Endleleni ebuyayo, sihamba ngendlela iindlovu ebezihambe ngayo. Zisekumgama weemitha eziliqela kude, kodwa eyona ndlovu inkulu kwelo qela iphakamisa iindlebe zayo, ize ime ngokungathi iza kulwa, ingqale ngqo kuthi. Ngaba iza kusihlasela?

UZechariah usixelela ukuba singakhathazeki, kodwa kwangaxeshanye, uthula umpu wakhe egxalabeni waze wasikhokela sasuka kwindlela iindlovu ezihamba kuyo. Siyaqhubeka sihamba, umkhenkethisi nompu wakhe—thina neekhamera zethu—zilungele ukusebenza. Kungekudala iindlovu ziphel’ emehlweni.

UZechariah usichazela ukuba iindlovu zale paki zibaqhelile abantu yaye ezinye zide zisondele. Xa iindlovu zisoloko zibonwa, abakhenkethisi baqalisa ukuzinika amagama. Enye babeyibiza ngokuthi nguMaqhuma ngenxa yokuba yayineqhuma elikhulu emzimbeni. Enye indlovu bathi nguSityhuthutyhuthu ngenxa yokuba yayiboyikisa abakhenkethi.

Sandula ke sabona iqela leemfene. Sazibukela zijinga emithini okanye zibaleka phantsi. Umkhenkethisi wethu usibonisa imazi yemfene ephethe abantwana bayo ababini, omnye usemqolo omnye usesifubeni. Uyasixelela ukuba abo bantwana bangamawele.

Ngokwenene, sizibonile izilwanyana zasendle namhlanje. UZechariah usixelela ukuba ukuze ubani abone izilwanyana zasendle ngexesha lembalela—phakathi kuka-Aprili noJuni—kufuneka azilinde kumachibi amanzi kuba izilwanyana ziyeza zize kusela zihamba zingamaqela. Ukwathi xa ehamba ngenqwelo-mafutha etsala ngamavili amane, ubani unokubona ezinye izilwanyana ezininzi, kuquka nenyathi neengonyama.

Ngoku lixesha lesidlo sasemini. Ngoxa sisitya, imfene enkulu ihlala kwiveni emise ecaleni kwenqwelo-mafutha yethu ize ngesibindi ijonge ntsho ekutyeni kwam. Ezinye iimfene ziyadlula, kunye neenyamakazi eziliqela nengulube, ekugqibeleni kuvela iindlovu ezine phezu kwenduli ekufuphi nalapho. Mhlawumbi siyifumene indlela elula yokufota ezi zilwanyana!

Kwindawo Yentengiso

Ixesha esilichithe kwiMole National Park lincinane kakhulu, kodwa ngoku sithabatha uhambo lweeyure ezimbini sihamba kwindlela yomhlaba sisiya eSawla, idolophu yasemaphandleni ekuhlala kuyo amaLobi, isizwe sabalimi. Abafazi beli qela banesiko elingaqhelekanga lokwandisa imilebe yabo. Nangona eli siko lisiya liphela kule mihla siphila kuyo kuba amantombazana aselula sele ephenjelelwa yimpucuko yezi mini, amabhinqa amaninzi azingomb’ isifuba ngemilebe yawo emikhulu. Eneneni, kugqalwa njengesithuko ukuxelela ibhinqa elingumLobi ukuba linemilebe emincinane ngathi yeyendoda.

Xa sifika kule dolophana singena kwindawo yentengiso. Iindawo zokuthengisela zenziwe ngamasebe emithi zaza zafulelwa ngengca. Kwakukho indoda emhlophe emi kule ndawo yentengiso kunye nabantu abantsundu baseAfrika. Saya kuyo saza safumanisa ukuba ifike kutshanje ukuza kuguqulela iBhayibhile kulwimi lwesiLobi. Ihlala kwidolophana elandelayo kunye namaLobi ukuze ifunde ukuluthetha ngokutyibilikayo ulwimi lwabo. Yandikhumbuza uRobert Moffat, owasabela kuthumo lokuhlala phakathi kwabantu abathetha isiTswana eMzantsi Afrika ngenkulungwane ye-19 waza waguqulela iBhayibhile kulwimi lwabo.

Kukho ibhinqa elidala elingumLobi elinemilebe emikhulu, elihleli esitulweni kwenye indlwana yokuthengisela. Kukho amakhuni amabini amhlophe, anokuba ngangozipho lukabhontsi ubukhulu, afakwe kwimigqobho elapha emilebeni. Ndingathanda ukuthabatha ifoto yalo, kodwa ndithe ndakuphakamisa ikhamera yam, lajika lajonga ecaleni. Elinye lamaqabane am landicacisela ukuba amaLobi amadala anenkolo yokuba ukuthabatha ifoto kumzisela amashwa ubani nto leyo enokude iphazamise nomphefumlo wakhe.

Endleleni ebuyela eSawla, apho siza kulala khona ngobo busuku, ndicinga ngobulumko nendalo kaThixo eyahlukahlukeneyo esiyibonileyo. Wadala abantu nezilwanyana ngokumangalisayo. Kunjengokuba umdumisi watshoyo: “Hayi indlela emininzi ngayo imisebenzi yakho, Yehova! Yonke uyenze ngobulumko. Uzele umhlaba yimveliso yakho.”—INdumiso 104:24.

[Imaphu ekwiphepha 24, 25]

(Ukuba ufuna inkcazelo ehlahlelwe kakuhle, yiya kwimpapasho)

GHANA

[Umfanekiso okwiphepha 24]

Ingulube

[Umfanekiso okwiphepha 24]

Ingcuka enamabala

[Umfanekiso okwiphepha 25]

Indlovu

[Umfanekiso okwiphepha 25]

Iimvubu

[Umfanekiso okwiphepha 25]

Umhlambi weenyamakazi

[Umfanekiso okwiphepha 26]

Imazi yemfene ephethe abantwana ababini

[Umfanekiso okwiphepha 27]

Ixhama

[Umfanekiso okwiphepha 27]

Indawo yentengiso