Xa Kupheliswe Ubukhoboka!

INKULULEKO! Elo libinzana elithandwa gqitha ngabantu. Abantu balwe kwamdak’ iisali, bayiphilela baza bayifela inkululeko. Okubuhlungu kukuba, abaninzi babuye nemband’ esikhova kwelo phulo labo lokufuna inkululeko. Ngaba likho ithemba lokuba abantu baya kuze bakhululeke kubukhoboka—ithemba elingasokuze liphelele emoyeni? Ewe likho.

Umpostile uPawulos waphefumlelwa ukuba abhale esi sithembiso sikaThixo: “Indalo ngokwayo iya kukhululwa ekukhotyokisweni kukonakala ize ibe nenkululeko ezukileyo yabantwana bakaThixo.” (Roma 8:21) Kodwa sinokuqiniseka njani ukuba uThixo uya kuzisa ‘inkululeko ezuke’ ngolo hlobo? Enye into enokusinceda kukuhlolisisa indlela uThixo ebeqhubana ngayo noluntu ukutyhubela imbali.

IBhayibhile ithi: “Apho ukhoyo umoya kaYehova, kukho inkululeko.” (2 Korinte 3:17) Ewe, akukho nto inokoyisa umoya kaThixo, okanye amandla akhe asebenzayo. Ebesoloko ewasebenzisa ukuze akhulule abantu ngeendlela ezininzi kangangexesha elide. Ebekwenza njani oko? Kaloku, sifanele sikhumbule ukuba zininzi iindidi zobukhoboka. Sele sixubushe kakhulu ngodidi olunogonyamelo olugqithiseleyo, apho abanamandla bebecinezela ababuthathaka ngenkani okanye ngogonyamelo. Kodwa khawuhlolisise ezinye iindlela zobukhoboka.

Abantu banokuzifaka ngokwabo kuloo meko, ngokuzikhobokisa ngezinto abazithandayo kangangokuba kude kube nzima ukwahlukana nazo. Yaye abantu banokukhotyokiswa bubuxoki nokuqhathwa, baze bakhohliswe ngeemfundiso ezibaphilisa ubomi bentshontsho. Ngaphezu kwako konke, kukho uhlobo lobukhoboka olusichaphazela xa sisonke—sisazi okanye singazi—yaye luyabulala. Noko ke, sifuna ukuyenza icace into yokuba nangona iindidi zobukhoboka sizibopha ngeband’ elinye, asithi ziyafana. Zahluke kakhulu. Kodwa kukho isolotya elibalulekileyo elizidibanisayo. Yaye ekugqibeleni, uThixo wenkululeko uya kuqinisekisa ukuba intlungu ebangelwa zizo zonke ezo ndidi zobukhoboka iyapheliswa.

Xa Sikhotyokiswa Zizinto Esizithandayo

Khawuve indlela incwadi ethi When Luck Runs Out ekuchaza ngayo ukukhotyokiswa kukungcakaza: “Ngumnqweno ongalawulekiyo nonamandla wokufuna ukungcakaza. Lo mnqweno uyamnamathela umntu yaye ukhula ngokukhawuleza . . . de ekugqibeleni angakwazi ukwahlukana nawo ukusa kwinqaba lokonakalisa zonke iimpawu ezintle anazo.” Baninzi kakhulu abantu abaye baba ngamakhoboka okungcakaza. EUnited States nje kuphela, bamalunga nezigidi ezithandathu.

Ngokufanayo, ukukhotyokiswa butywala kwandile kwiindawo ezininzi yaye kunokuba yingozi okanye kube nemiphumo emibi nangakumbi. Kwilizwe nje elinye, malunga nesiqingatha samadoda alapho angamakhoboka otywala ngandlel’ ithile. URicardo owayelikhoboka lotywala kwiminyaka engama-20 eyadlulayo, uchaza imeko yomntu olikhoboka lotywala, uthi: “Uvuka nje, umzimba wakho sele ufuna utywala—ukuze upholise ingqondo, ulibale ngeentsizi zakho okanye ufumane isibindi sokujamelana neengxaki zobomi. Akukwazi kwenza nto ungakhange ufumane ithamo lotywala, yaye uye uzixelele ukuba akukho nto iphosakeleyo ngawe uzame nokweyisela abanye ukuba bacinge ngaloo ndlela.”

Asibotywala kuphela obukhobokisa abantu. Ehlabathini lonke bazizigidi ngezigidi abantu abasebenzisa kakubi iziyobisi ezingekho mthethweni. Kanti abamalunga nesi-1.1 lewaka lezigidi batshaya icuba—nto leyo ebachanaba kwesona siyobisi sikhobokisayo. Abantu abaninzi bakufuna ngamandla ukwahlukana nalo mkhwa, kodwa ubabophelele iinyawo nezandla. Ngaba uYehova ukwazile ukuba nguMkhululi wabantu kwiindlela ezinjalo zobukhoboka?a

Ngokomzekelo, khawucinge ngoRicardo. Uthi: “Malunga neminyaka elishumi eyadlulayo, ndafumanisa ukuba utywala bundithe nqo ngempumlo. Babundizisela iingxaki emtshatweni wam, emsebenzini, nakwintsapho yam, yaye ndandisazi kakuhle ukuba andinakuze ndizicombulule ezo ngxaki ngaphandle kokuba ndiyeke ukunxila. Ekufundisiseni kwam iBhayibhile, ndafumanisa ukuba xa uyindla-manzi uthwaxwa bubuhlwempu—bokoqobo nobokomoya. (IMizekeliso 23:20, 21) Ndandifuna ukuba nobuhlobo obusenyongweni noThixo, yaye ukuthandaza ngokunyanisekileyo ndicela inkxaso yakhe kwandinceda ndazimisela ukuphucula. Ndoda ithile yafundisisa iBhayibhile kunye nam kwaye saba ngabahlobo abasenyongweni. Noxa ndandikhe ndibuyele kulo mkhwa, yayinganikezeli, kodwa ngomonde yayindibonisa ikhondo uThixo afuna amaKristu okwenyaniso alilandele.”

Namhlanje, uRicardo uziva ekhululekile kubukhoboka awayekubo—ngomlinganiselo othile. Uyavuma ukuba ekuqaleni wayekhe abuyele kulo mkhwa. Uthi: “Nakuba kwakukhe kube njalo, umnqweno wam wokukhonza uYehova ngokunyaniseka, kwakunye nenkxaso yomfazi wam namanye amaKristu, undincedile ndakwazi ukumelana nale meko. Ndikhangele phambili kwixesha elithenjiswe nguThixo apho ‘kungayi kubakho mntu uthi, “Ndiyagula”’ nalapho ukukhotyokiswa butywala kuya kube kungasekho. Okwangoku mihla le ndiqhubeka ndisenza unako nako wokunikela umzimba wam ‘njengombingelelo ophilayo, ongcwele, owamkelekileyo kuThixo.’”—Isaya 33:24; Roma 12:1.

Ehlabathini lonke abantu abangamawakawaka baye bancedwa nguThixo njengoko besenza unako nako wokukhululeka kwiindidi ezahlukahlukeneyo zobukhoboka. Kuyavunywa ukuba, kusenokwenzeka bazifaka ngokwabo kobo bukhoboka, mhlawumbi ngokuyekelela kwiingcinezelo ezahlukeneyo okanye kwizilingo. Noko ke, baye bafumanisa ukuba uYehova unguMkhululi onomonde. Ukulungele ukunceda aze omeleze abo bakufuna ngokwenene ukumkhonza.

“Inyaniso Iya Kunikhulula”

Kuthekani ngokuba likhoboka lobuxoki nenkohliso? UYesu Kristu uyasiqinisekisa ukuba sinokukhululeka kwezo zinto. Uthi: “Ukuba nithe nahlala kulo izwi lam, ngokwenene ningabafundi bam, niya kuyazi inyaniso, yaye inyaniso iya kunikhulula.” (Yohane 8:31, 32) Xa wayethetha la mazwi, uninzi lwabo babemphulaphule lwalungamakhoboka emithetho enzima yabaFarisi. Ethetha ngeenkokeli zonqulo zomhla wakhe, uYesu wathi: ‘Zibopha imithwalo enzima zize ziyibeke emagxeni abantu, kodwa zona ngokwazo azivumi kuyishukumisa ngomnwe wazo.’ (Mateyu 23:4) Iimfundiso zikaYesu zabakhulula abantu kobo bukhoboka. Wabhenca ubuxoki bonqulo, echaza nemvelaphi yabo. (Yohane 8:44) Kunokuba axoke wathetha inyaniso, waza wakuchaza ngokucacileyo oko uThixo akufunayo kuluntu.—Mateyu 11:28-30.

Njengabafundi bakaYesu, amawakawaka abantu afumanisa ukuba ngoncedo lukaThixo anokukhululeka kubuxoki bonqulo nakwizithethe zobuxoki eziwakhobokisayo. Emva kokufunda inyaniso yeBhayibhile ehlaziyayo, aye akhululeka ekoyikeni abafi, ekoyikeni intuthumbo engunaphakade kwisihogo somlilo aza akhululeka nasekunyanzelekeni ukuba athabathe imali ayisebenzele nzima ayise kwiinkonzo zonqulo ezenziwa ngabefundisi abathi bamela uKristu—owathi: “Namkele ngesisa, yiphani ngesisa.” (Mateyu 10:8) Ngaphezu koko, sele isemnyango inkululeko ethe kratya.

Obona Bukhoboka Bufihlakeleyo

Phawula indlela uYesu aluchaza ngayo uhlobo lobukhoboka olufihlakeleyo, olukhankanywe ngaphambilana noluchaphazela onke amadoda, amabhinqa nabantwana abanyathela phezu komhlaba: “Inene, inene, ndithi kuni, Wonke umenzi wesono ulikhoboka lesono.” (Yohane 8:34) Ngubani onokuzingomb’ isifuba athi akoni? Nompostile uPawulos wavuma wathi: “Okulungileyo endikunqwenelayo andikwenzi, kodwa okubi endingakunqweneliyo kuko endikuqheliselayo.” (Roma 7:19) Nangona kungekho mntu ukhululeke ngokupheleleyo kumakhamandela esono, likho ithemba.

UYesu wabaqinisekisa ngelithi abafundi bakhe: “Ukuba uNyana uyanikhulula, okunene niya kukhululeka.” (Yohane 8:36) Ukuzaliseka kwesi sithembiso kuya kuthetha ukukhululeka ngokwenene kobona bukhoboka buyingozi. Ukuze sibone indlela yokukhululeka kobu bukhoboka, sifanele kuqala sibone indlela esangena ngayo kubo.

IBhayibhile isichazela ukuba uThixo wadala umntu wanenkululeko yokuzikhethela, engenalo utyekelo lwesono. Kodwa, unyana kaThixo ongumoya nozingcayo wafuna ukuba negunya phezu koluntu, kungakhathaliseki ukuba uluntu luza kubandezeleka kangakanani na ngenxa yoko. Ukuze ifikelele olo sukelo, le ngelosi inemvukelo, eyathi ekugqibeleni yabizwa ngokuba nguSathana uMtyholi, yenza ukuba abazali bethu bokuqala uAdam noEva bamshiye uThixo. Emva kokuba uAdam ethe ngabom akawuthobela umyalelo kaThixo ongqalileyo, akazange abe ngumoni nje kuphela, kodwa wadlulisela ukungafezeki nokufa kuyo yonke inzala yakhe. (Roma 5:12) Ekugqibeleni, uSathana waba ‘ngumlawuli weli hlabathi,’ yaye ‘isono siye salawula njengokumkani ngokufa.’—Yohane 12:31; Roma 5:21; ISityhilelo 12:9.

Sinokukhululeka njani? Ngokuba ngabafundi bakaYesu, sinokungenelwa kukufa kukaKristu okulidini, okunamandla ‘okutshitshisa lowo unamandla okubangela ukufa, oko kukuthi, uMtyholi, nawokukhulula bonke abo bebengamakhoboka okoyika ukufa ubomi babo bonke.’ (Hebhere 2:14, 15) Khawufan’ ucinge—ukukhululwa kubukhoboka besono nokufa! Ngaba akubangeli mdla ukucinga ngaloo nkululeko?

Noko ke, kuthekani ngohlobo lobukhoboka esixubushe ngalo ekuqaleni? Ngaba kuya kuze kuphele ukunyanzelwa kwabantu ukuba babe ngamakhoboka bengafuni?

Isiseko Sethemba Esiqinileyo

Ngoko ke, sinokuqiniseka ukuba ubukhoboka obulizothe ngolo hlobo buya kuphela. Siqinisekiswa yintoni? Khawucinge ngoku: NguYehova uThixo owakhokelela enkululekweni olona hlanga lukhulu ezimbalini. Mhlawumbi ukhe weva ngale ngxelo ingokwembali.

Uhlanga lakwaSirayeli lwalungamakhoboka eYiputa, lunyanzelwa ukuba lwenze umsebenzi wezandla onzima yaye ludlakazeliswa. Lwakhalela uncedo lukaThixo, yaye eqhutywa yinceba yakhe engenakulinganiswa nanto, waluva waza wenz’ into ngaloo nto. Esebenzisa uMoses noAron njengezithethi zakhe, uYehova wakhupha umyalelo wokuba uFaro waseYiputa akhulule amaSirayeli. Lo mlawuli unekratshi wala izihlandlo zilandelelana, kwanakuba uYehova wayesele ohlwaye elo lizwe ngothotho lwezibetho ezoyikekayo. Ekugqibeleni, uThixo wenza ukuba uFaro agob’ uphondo. Ngelingeni, amaSirayeli akhululeka!—Eksodus 12:29-32.

Ngaba le ngxelo ayichulumancisi? Kodwa ke, usenokuba uyazibuza ngesizathu sokuba uThixo angenzi okufanayo nanamhlanje. Kutheni engangeneleli kwimicimbi yabantu aze aphelise ubukhoboka? Kaloku khumbula ukuba, uYehova ‘akangomlawuli weli hlabathi’—nguSathana olawulayo. Ngenxa yocelomngeni olwaphakanyiswa emva phayaa e-Eden, uYehova uye waluvumela olu Tshaba lwakhe lukhohlakeleyo ukuba lukhe lulawule okwethutyana. Ubukhoboka, ingcinezelo nempatho-mbi zizinto ezibuhlungu ezize nolawulo lukaSathana. Ngenxa yempembelelo yakhe, ulawulo lwabantu belusoloko lububutyobo. IBhayibhile iyishwankathela kakuhle le nto xa isithi: ‘Umntu ulawule umntu yaba kukwenzakala kwakhe.’—INtshumayeli 8:9.

Kodwa kuya kude kube nini? IBhayibhile ithi siphila ‘kwimihla yokugqibela,’ ixesha elizaliswe kukuzingca nokubawa. (2 Timoti 3:1, 2) Loo nto ithetha ukuba kungekudala, uBukumkani bukaThixo, uYesu awasifundisa ukuba sibuthandazele, buya kuzilungisa izinto buze buphelise ubukhoboka. (Mateyu 6:9, 10) UYesu Kristu, uKumkani omiselwe nguThixo, uya kuphelisa naziphi na izinto ezibuhlungu ezibangelwe bubukhoboka, de ekugqibeleni abhangise olokugqibela utshaba, ukufa.—1 Korinte 15:25, 26.

Xa loo mini ide yafika, abantu abanyanisekileyo baya kubona ukuba ukukhululwa kwabantu bakaThixo kubukhoboka baseYiputa kwakusikrobisa nje kwinkululeko ethe kratya. Ewe, ekuhambeni kwexesha, “indalo ngokwayo iya kukhululwa ekukhotyokisweni kukonakala.” Ekugqibeleni bonke baya kunandipha ngokuzeleyo ‘inkululeko ezukileyo yabantwana bakaThixo.’—Roma 8:21.

[Umbhalo osemazantsi]

[Umfanekiso okwiphepha 23]

Kuqikelelwa ukuba eUnited States nje kuphela, bazizigidi ezithandathu abantu abangamakhoboka okungcakaza

[Imifanekiso ekwiphepha 23]

Amakhulu ezigidi angamakhoboka eziyobisi, utywala necuba

[Imifanekiso ekwiphepha 24, 25]

Kanye njengoRicardo, amawakawaka abantu aye akhululwa nguThixo kubukhoboka

[Imifanekiso ekwiphepha 26]

Njengoko amaSirayeli amandulo akhululwayo ebukhobokeni, kungekudala abakhonzi bakaThixo bokwenyaniso baya kufumana inkululeko ethe kratya