Wuphephe Umgibe Wokungcakaza
“Ukungcakaza akuzange kuyichaphazele impilo yam, yaye ndandingachithi mali ininzi ekungcakazeni. Kodwa ndimele ndivume ukuba ngalo lonke ixesha ndingcakaza, ndandikhetha amanani endikholelwa ukuba aya kundizisela ithamsanqa.”—ULinda.
ABANTU abaninzi abangcakazayo baba neenkolelo kumanani okanye kumakhubalo ethamsanqa. Basenokuvakalelwa kukuba ezo nkolelo azinamandla kubo, kodwa indlela abenza ngayo ibe ibonisa ukuba ziyabulawula ubomi babo.
Abanye abantu abangcakazayo bade bathandaze kuThixo, becela ukuba abancede baphumelele kuloo nto bayenzayo. Kodwa iBhayibhile ibonisa ukuba uThixo uyabagweba abo bathi bayamnqula kodwa babe ‘bemisela ngolungelelwano uthixo weThamsanqa itafile.’ (Isaya 65:11) Ewe, uThixo uyazicekisa izinto ezikhuthaza abantu ukuba bakholelwe kwithamsanqa. Ukungcakaza kukhuthaza ukuba abantu bathembele kuthixokazi weThamsanqa.
Kwakhona ukungcakaza kukhuthaza ngokuphandle ukuthanda imali. Kwihlabathi lanamhlanje elinabantu abaninzi abangazikhathalelanga izinto zokomoya, imali iye yagqalwa njengothixo, yaye banqula lo thixo ngokungcakaza. Iindawo zokungcakaza ezithandwa kakhulu ngabantu ziye zathabatha indawo yonqulo ebantwini, yaye inkolelo entsha abanayo abantu kukuba ukubawa yinto efanelekileyo. Abaphandi bafumanise ukuba inkoliso yabantu iya kwiindawo zokungcakaza ukuze ifumane “intywenka yemali” kungekhona ukuzonwabisa. Noko ke, iBhayibhile iyalumkisa: “Ukuthanda imali yingcambu yazo zonke iintlobo zobubi, yaye ngenxa yokusukelana nolo thando bambi baye balahlekana nokholo, bezingxwelerha ngeentlungu ezininzi.”—1 Timoti 6:10.
Kweyoku-1 kwabaseKorinte 6:9, 10, ngokucacileyo iBhayibhile ithi: ‘Ningalahlekiswa. Abanquli-zithixo nabantu ababawayo abayi kubudla ilifa ubukumkani bukaThixo.’ Ukubawa akusosifo nje sikhobozayo; sisifo esinokumbulala fi umntu ngokomoya—kodwa sinokunyangwa.
Bafumana Amandla Okutshintsha
UKazushige, ekuthethwe ngaye kwinqaku lokuqala uthi: “Ndazama izihlandlo eziliqela ukuyeka ukungcakaza. Ndafumanisa ukuba ukudlala amahashe kunye nabahlobo bam kuyayichitha intsapho yam. Imali endandiyizuza yayiphinda ityiwe. Ndada ndangcakaza nangemali eyayibekwe ngumfazi wam, eyayiza kunceda xa kuzalwa unyana wethu wesibini, yaye ndagqibela ngokungcakaza nangemali yomsebenzi. Loo nto yabangela ukuba ndizive ndiphelelwe sisidima. Umfazi wam wayesoloko enyembezana endicenga ukuba ndiyeke ukungcakaza, kodwa ndandingakwazi.”
Kuthe kusenjalo uKazushige waqalisa ukufundisisa iBhayibhile namaNgqina kaYehova. Uthi: “Njengoko ndandifundisisa iBhayibhile, ndaya ndisiba nentembelo yokuba uThixo ukho yaye ndaqonda ukuba xa ndimphulaphula, ndiya kuncedakala. Ndandiqinisekile ukuba amandla kaThixo, anokundinceda ndiyeke ukungcakaza. Eyona nto yandimangalisayo yeyokuba, andizange ndiyeke nje ukungcakaza, kodwa ndakuthiy’ egazini. Intliziyo yam iba lihlwili xa ndicinga ngendlela endandiyikhathaza ngayo intsapho yam xa ndingcakaza. Hayi indlela endimbulela ngayo uYehova uThixo ngokundinceda ndahlukane nokukhotyokiswa kukungcakaza, kwanangokundinceda ndiphile ubomi obunenjongo!”—Hebhere 4:12.
NoJohn, ekuthethwe ngaye kwinqaku lokuqala, waqalisa ukufundisisa iBhayibhile. Uthi: “Ukufundisisa iBhayibhile kwandinceda ndahlolisisa indlela endizenza ngayo izinto. Ndaqala ndayibona kakuhle indlela ekuyingozi ngayo ukungcakaza kum nakwintsapho yam. Ndaqonda ukuba ukungcakaza kukhuthaza isimo sengqondo sokuzingca nokubawa ebantwini—zinto ezo azithiyileyo uYehova. Njengoko ndandiqhubeka ndifundisisa, ukuthanda kwam uYehova kwandinika amandla okwahlukana nokungcakaza. Ukuqalisa kwam ukungcakaza ndandinomnqweno wokuphila ubomi obanelisayo. Njengokuba ngoku ndiyekile ukungcakaza yaye ndikhonza uYehova ngovuyo, loo mnqweno uzalisekile.”
Nomfazi kaJohn, uLinda wenza isigqibo sokwahlukana nokungcakaza. Uthi: “Kwakungeyondlwan’ iyanetha. Kodwa emva kokuba mna nomyeni wam siqalise ukufundisisa iBhayibhile namaNgqina kaYehova, ndafunda ukunikela ingqalelo kwezona zinto zibalulekileyo ebomini. Andizange ndifunde nje ukuthanda izinto ezithandwa nguThixo kodwa ndafunda nokuthiya ezo azithiyileyo, kuquka zonke iintlobo zokubawa. Yaye andinandiphi nje ubomi obunenjongo, kodwa ndinayo nemali ngoku.”—INdumiso 97:10.
Ngokwakha ubuhlobo noYehova uThixo, nawe unokufumana amandla nobulumko obuya kukunceda uphephe umgibe wokungcakaza. Loo nto iya kukunceda ube nemali, iphele nale nto yokuziva ungento ize iphucule nemeko yakho yokomoya. Uya kukuvuyela ukubona ukunyanisa kwamazwi eMizekeliso 10:22 athi: “Intsikelelo kaYehova—yiyo etyebisayo, yaye akongezi ntlungu kuyo.”
[Amagama acatshulweyo akwiphepha 11]
Ukubawa akusosifo nje sikhobozayo; sisifo esinokumbulala fi umntu ngokomoya
[Ibhokisi/Imifanekiso ekwiphepha 9]
Unxibelelwano Phakathi Kokungcakaza Namandla Angaphezu Kwawemvelo
Kwingxelo eyayisiya kwiNational Gambling Impact Study Commission, abaphandi beDuke University bathetha ngonxibelelwano olukhoyo phakathi kwezibhengezo zokungcakaza nokukholelwa kumandla angaphezu kwawemvelo. Le ngxelo ithi: “Izibhengezo ezininzi [ze-lottery] zikhuthaza ukuzifunela izinto eziphathekayo . . . Kanti ngokutsho kwazo, umntu unokuzifumana ezi zinto engakhange asebenze nzima okanye anyamezele kodwa unokuzifumana ngoncedo lwemimoya enamandla angaphezu kwawemvelo, nakwimilingo, esekelwe kwithemba, kumaphupha nakwiinkolelo. Yaye bonke abaphathi bamaziko e-lottery bayazi ukuba abona bathengi baphambili bathembele kwiinkolelo, kwiinkwenkwezi zemilingo, kubavumisi, ‘nakwiincwadi zamaphupha’ ezithandwayo ekudweliswe kuzo amanani angqamene namagama, imihla namaphupha. Kunokuba athi umntu unokukhetha naliphi na inani kwanokuba ukukhetha amanani athandwayo kunciphisa amathuba okuphumelela kwimidlalo yokungcakaza, amaziko e-lottery akhuthaza abo bangcakazayo ukuba bakhethe (baze babambelele) kumanani abawathandayo.”
[Imifanekiso ekwiphepha 10]
“Ukuthanda kwam uYehova kwandinika amandla okwahlukana nokungcakaza.”—UJohn
“Andinandiphi nje ubomi obunenjongo, kodwa ndinayo nemali ngoku.”—ULinda
[Imifanekiso ekwiphepha 10]
“Eyona nto yandimangalisayo yeyokuba, andizange ndiyeke nje ukungcakaza, kodwa ndakuthiy’ egazini.”—UKazushige