Imbono YeBhayibhile
UThixo Ulujonga Njani Ugonyamelo?
UGONYAMELO lwesamele yaye luziindidi ngeendidi. Ngaphandle kwemfazwe, ugonyamelo lukho kwezemidlalo, kukho olubangelwa kukusetyenziswa kakubi kweziyobisi, oluphakathi kwamaqela emigulukudu, olwasesikolweni, emsebenzini luphinde lubekho nakwezolonwabo. Nogonyamelo lwasekhaya luxhaphakile kumakhaya amaninzi. Ngokomzekelo, kuhlolisiso olusandul’ ukwenziwa kufunyaniswe ukuba eKhanada, amadoda namabhinqa asisi-1,2 sezigidi akhe ahlaselwa ngogonyamelo, ubuncinane kanye kwisithuba seminyaka emihlanu. Olunye uhlolisiso lubonise ukuba amadoda amalunga nama-50 ekhulwini abaphatha ngogonyamelo abafazi bawo, enjenjalo nakubantwana bawo.
Ngokuqinisekileyo, njengabanye abantu uvakalelwa kukuba olo gonyamelo lumasikizi. Sekunjalo, ugonyamelo luthandwa kakhulu kwezolonwabo namhlanje. Asiyomifanekiso ishukumayo nje kuphela ebangela ukuba ababukeli baluthande kangaka ugonyamelo, kodwa nogonyamelo lokoqobo abalubona kumabonwakude lunegalelo. Umdlalo wamanqindi neminye imidlalo enogonyamelo ithandwa kakhulu kumazwe amaninzi. Kodwa uThixo ulujonga njani ugonyamelo?
Ugonyamelo Kudala Lwabakho
Kudala lwabakho ugonyamelo. Umntu wokuqala owaba nogonyamelo kuthethwa ngaye eBhayibhileni kwiGenesis 4:2-15. UKayin, izibulo lika-Adam noEva, wammonela umntakwabo uAbheli waza wambulala ngabom. Wathini uThixo ngaloo nto? IBhayibhile ithi uYehova uThixo wamohlwaya kanobom uKayin ngokubulala umntakwabo.
KwiGenesis 6:11, sifunda ukuba kwiminyaka engaphezu kwe-1 500 emva kweso siganeko, umhlaba “wawuzaliswe lugonyamelo.” Wenza ntoni uThixo ngaloo nto? Wayalela uNowa owayelilungisa ukuba akhe umkhombe, owawuza kuba likhusi kuye nentsapho yakhe xa uYehova esizisa unogumbe emhlabeni, ukuze “onakalise” abo bantu babenogonyamelo. (Genesis 6:12-14, 17) Kodwa yintoni eyabangela ukuba abantu baluthande kangako ugonyamelo?
Impembelelo Yeedemon
Ingxelo yeGenesis isixelela ngoonyana bakaThixo, iingelosi ezingathobeliyo, ezazambathisa imizimba yabantu, zatshata namabhinqa zaza zazala abantwana. (Genesis 6:1-4) Inzala yabo, eyayibizwa ngokuba ziiNefili, yaba ziingxilimbela zamadoda awayedumile. Ngenxa yokuphenjelelwa ngooyise ababeziidemon, nawo loo madoda aba nogonyamelo. Xa amanzi kanogumbe awugubungelayo umhlaba, ezi ngxilimbela zingendawo zatshabalala. Kodwa kubonakala ngathi ezi demon zayilahla imizimba yenyama zaza zabuyela kummandla wokomoya.
IBhayibhile ikwenza kucace ukuba ukususela ngelo xesha, ezi ngelosi zinemvukelo bezisoloko zinempembelelo enamandla ebantwini. (Efese 6:12) Inkokeli yazo, uSathana, ibizwa ngokuba ‘sisibulala-mntu’ sokuqala. (Yohane 8:44) Ngenxa yoko, kunokuthiwa ugonyamelo olukhoyo namhlanje emhlabeni lolobudemon okanye lolobusathana.
IBhayibhile iyasilumkisa nxamnye nempembelelo elukuhlayo yogonyamelo. IMizekeliso 16:29 ithi: “Umntu onogonyamelo uyalilukuhla idlelane lakhe, aze ngokuqinisekileyo alihambise ngendlela engalunganga.” Abaninzi namhlanje baye balukuhlelwa ukuba baluqhwabel’ izandla, baluxhase okanye babandakanyeke kulo. Kwakhona, izigidi zabantu ziye zalukuhlelwa ukuba zithande iindlela zokuzonwabisa ezikhuthaza ugonyamelo. Amazwi akwiNdumiso 73:6 asichaza kakuhle isizukulwana sanamhlanje. Umdumisi uthi: “Ukuziphakamisa kwabo kusebenze njengentsimbi yomqala kubo; ugonyamelo lubagubungela njengesambatho.”
UThixo Uluthiyile Ugonyamelo
Afanele aziphathe njani amaKristu kweli hlabathi lizaliswe lugonyamelo? Kwingxelo yeBhayibhile ethetha ngoonyana bakaYakobi uSimeyon noLevi, sifumana isiluleko esihle. Udade wabo uDina wazinxulumanisa nabantu abaziphethe kakubi bakwaShekem. Oku kwabangela ukuba adlwengulwe yindoda yakwaShekem. Beziphindezela, uSimeyon noLevi babulala onke amadoda akwaShekem ngokungenanceba. Kamva, ephefumlelwe nguThixo, uYakobi wakuqalekisa ukugqajukelwa ngumsindo koonyana bakhe, wathi: “USimeyon ngumntakwabo Levi. Zizixhobo zogonyamelo izixhobo zabo zokuxhela. Uze ungangeni kwiqela lamakholwane abo, mphefumlo wam. Ungazibandakanyi kwigqugula labo.”—Genesis 49:5, 6.
Ngenxa yala mazwi, amaKristu akazinxulumanisi nabo banogonyamelo okanye abo balukhuthazayo. Ngokucacileyo, uThixo ubathiyile abo bakhuthaza ugonyamelo. IBhayibhile ithi: “UYehova uhlolisisa lowo ulilungisa kwanalowo ungendawo, yaye umphefumlo Wakhe umthiyile ngokuqinisekileyo nabani na othanda ugonyamelo.” (INdumiso 11:5) AmaKristu abongozwa ukuba aphephe ukugqajukelwa ngumsindo, kwanokuthuka.—Galati 5:19-21; Efese 4:31.
Ngaba Ugonyamelo Luya Kuze Luphele?
Umprofeti wamandulo, uHabhakuki wabuza uYehova uThixo: “Kuya kude kube nini na ndicela ukuba undincede kugonyamelo?” (Habhakuki 1:2) Mhlawumbi nawe ukhe wazibuza oko. UThixo wamphendula uHabhakuki, ethembisa ukuba uza kumshenxisa ‘ongendawo.’ (Habhakuki 3:13) Nencwadi yesiprofeto kaIsaya isinika ithemba. Kuyo uThixo usithembisa oku: “Akuyi kuba saviwa lugonyamelo elizweni lakho, ukuphangwa nokuwa phakathi kwemida yakho.”—Isaya 60:18.
AmaNgqina kaYehova aqinisekile ukuba kungekudala uThixo uya kushenxisa zonke iindidi zogonyamelo emhlabeni kwanabo balukhuthazayo. Ngelo xesha, endaweni yokuba uzaliswe lugonyamelo, “umhlaba uya kuzaliswa kukwazi uzuko lukaYehova njengamanzi egubungele ulwandle.”—Habhakuki 2:14.
[Umfanekiso okwiphepha 12]
Ugonyamelo lwaqala mhla uKayin wabulala uAbheli