Ukuthi Phithi Lugonyamelo
IHLABATHI lanamhlanje lithe tii lugonyamelo. Inyaniso kukuba ugonyamelo belusoloko luphambili kwiindlela zokuzonwabisa. Noko ke, iMedia Awareness Network ithi: “Kutshanje kuye kwenzeka utshintsho kugonyamelo oluboniswa kumajelo osasazo. Olo tshintsho kukuba, luye lwaqatsela. Ngoku lumasikizi ngakumbi, luthe chatha ekuboniseni iintlobano zesini, nokungcungcuthekiswa kwabanye.” Khawucinge ngezi nkalo zilandelayo.
Umculo: Lo mthombo uchazwe ngasentla uphinda uchaze ukuba “okukhona umculo uvakalisa ugonyamelo ngakumbi kokukhona nabantu bewuthanda.” Ezinye iingoma zinamazwi angcolileyo, azukisa ukubulala nokudlwengula, kuquka okwabafazi noomama.
Imidlalo yeevidiyo: Elinye iphephancwadi labathanda imidlalo yevidiyo eBritani lathi: “Into ebuhlungu kukuba, abantu abadlala le midlalo bathanda uphalazo-gazi. Longeza lathi: “Umntu othanda le midlalo umele aluthande ugonyamelo ukusa kumkhamo othile.” Ngokomzekelo, komnye umdlalo othandwayo, abadlali bayakwazi ukungomba abafazi bafe ngephini lokuqhokra ibaseball. Ekubeni umntu ebandakanyeka xa edlala imidlalo yevidiyo, abasemagunyeni bakholelwa ukuba le midlalo inokuba nempembelelo embi gqitha ebantwaneni ngaphezu komabonwakude.
Iimovie: Uphando lubonisa ukuba ugonyamelo, iintlobano zesini nokuziphatha kakubi kuye kwanda gqitha kwiimovie, yaye akunakuthenjelwa kwiminyaka yobudala babantu ezibafaneleyo eboniswa kuzo. Ngapha koko, ayibi “ngabantu ekuthiwa babi” abanogonyamelo. Ngokutsho kolunye uhlolisiso, phantse isiqingatha sogonyamelo lukamabonwakude, kwiimovie, nasemculweni lwenziwa “ngabantu ekuthiwa balungile.”
Iindaba: “Xa zibonisa ugonyamelo oluninzi, kokukhona zithandwa” ibe yiloo nto efunwa ngabavelisi beendaba. Iindaba zingenisa imali eninzi, ibe nabantu beendaba bayazi ukuba ugonyamelo lutsala abantu abaninzi yaye okukhona besiba baninzi ababukeli kokukhona besiba baninzi nabantu abafuna ukuthengisa izinto zabo kwelo jelo, ibe iinkqubo zikamabonwakude zixhomekeke kwimali yabo bakumazwe amaninzi.
IiWebhsayithi: Kwi-Intanethi kufumaneka imifanekiso eyenziweyo neyokoqobo yabantu abangcungcuthekiswayo, eyabaxhaxhiweyo, abanqunyulwe amalungu omzimba, neyababuleweyo. Abantwana abaninzi bayayibona le mifanekiso.
Ngaba Ugonyamelo Lwamajelo Osasazo Lunokuba Nempembelelo Kuwe?
Ngaba ugonyamelo oluboniswa kumabonwakude, kwiimovie, ezincwadini, emculweni nakwezinye iindlela zokuzonwabisa lunempembelelo ebantwini? Yinyaniso ukuba, abo baxhamlayo ngokusasaza olu gonyamelo bahlala beluthethelela ngelithi aluyongozi. Kodwa khawukhe ucinge ngoku: Ukuze baphembelele indlela abacinga ngayo abantu, oosomashishini bahlawula iibhiliyoni zeerandi kwintengiso, nalapho intengiso nganye idlala nje imizuzwana engama-30 kuphela. Ukuba kunjalo, ngaba kusengqiqweni, ukugqiba ekubeni imovie yemizuzu engama-90, enabadlali abaphambili abaziphethe kakubi nabanogonyamelo, ayiyi kuba nampembelelo ingako okanye ingabi nayo kwaphela, ngakumbi kwiingqondo zabantwana ezithabatheka yinto yonke?
UMdali wethu, uYehova uThixo ukwazi bhetele ukuyilwa kwabantu ngaphezu kokuba thina sizazi. Yintoni asixelela yona ngokunxulumana nabantu abanogonyamelo—esinokuthi baquka abo basingxixha ngalo kumajelo athandwayo? Khawucinge ngezi zibhalo zilandelayo zeBhayibhile:
● “UYehova uhlolisisa lowo ulilungisa kwanalowo ungendawo, yaye umphefumlo Wakhe umthiyile ngokuqinisekileyo nabani na othanda ugonyamelo.”—INdumiso 11:5.
● “Musa ukuba liqabane lakhe nabani na onomsindo; yaye ungahlali nomntu obhabhama ngumsindo, khon’ ukuze ungaqhelani nomendo wakhe kuze oko kube ngumgibe emphefumlweni wakho.”—IMizekeliso 22:24, 25.
Kakade ke, asinakukwazi ukuzikhusela singaziboni zonke izinto ezinempembelelo embi. Kodwa siyakwazi ukukhetha indlela yokuzonwabisa nabantu esifuna ukunxulumana nabo. Ngoko ke zibuze oku, ‘Ndifuna ukuba ngumntu onjani?’ Emva koko nxulumana nabantu abalolo hlobo ufuna ukuba lulo, abantu abanemilinganiselo nosukelo olufanayo nolo ulufunayo.—IMizekeliso 13:20.
Ngoxa indlela esikhetha ngayo abantu esinxulumana nabo nendlela yokuzonwabisa zinokuyiphembelela indlela esilujonga ngayo ugonyamelo, zikho nezinye izinto ezinokusiphembelela. Ziziphi ezo zinto?
[Umfanekiso okwiphepha 4]
Ukhetho esilwenzayo kwindlela yokuzonwabisa lunokuyiphembelela indlela esilujonga ngayo ugonyamelo