Iingozi Zeenqwelo-mafutha—Ngaba Ukhuselekile Kuzo?

“Ndaziwa ngokuqhuba kakuhle, ngoko akuyomfuneko ukuba ndizixhalabise ngengozi yenqwelo-mafutha.” “Iingozi zehlela abaqhubi abaselula nabangakhathaliyo.” Baninzi abantu abacinga ukuba abanakuze behlelwe yingozi yenqwelo-mafutha. Ngaba nawe uvakalelwa ngaloo ndlela? Ngaba wena akunakuze wehlelwe yingozi yenqwelo-mafutha?

UPHANDO lubonisa ukuba, xa uhlala kwilizwe elihambele phambili, usesichengeni sokwehlelwa yingozi yenqwelo-mafutha ubuncinane kanye ebomini bakho. Abaninzi bayafa kwezo ngozi. Ngoku ehlabathini lonke, bangaphezu kwesiqingatha sesigidi abantu abafa kwiingozi zeenqwelo-mafutha minyaka le. Kusenokwenzeka ukuba, uninzi lwabo bafe kunyaka odluleyo beluzixelele ukuba alunakuze lehlelwe yingozi lona. Unokuwanciphisa njani amathuba okubandakanyeka engozini? Undoqo kukuyithintela. Hlolisisa indlela onokuzithintela ngayo iingozi ezibangelwa kukozela nakukwaluphala.

Umqhubi Owozelayo

Ezinye iingcali zithi umqhubi owozelayo uyingozi ngendlela efanayo nomqhubi onxilileyo. Iingxelo zibonisa ukuba iingozi ezininzi zibangelwa kukozela. Kutshanje iFleet Maintenance & Safety Report ikhe yathi, kunyaka nje omnye, umntu om-1 kwabali-12 eNorway uyalala ngoxa eqhuba. Ukanti ngokutsho kwephephandaba laseJohannesburg, eMzantsi Afrika, iThe Star, ukozela kwabaqhubi kungunobangela wokungquzulana kwenqwelo-mafutha enye kwezintathu kwelo lizwe. Iingxelo ezivela kwamanye amazwe zibonisa ukuba le ngxaki ichaphazela abaqhubi kuzo zonke iindawo. Kutheni bebaninzi kangaka nje abantu abanengxaki yokozela ngoxa beqhuba?

Ukuxakeka kwale mihla kunegalelo kule ngxaki. Kutshanje iphephancwadi iNewsweek liye lathi kusenokwenzeka ukuba kubantu baseMerika, “ixesha abalichitha belele liye lancipha ngeyure enesiqingatha busuku ngabunye kunokuba kwakunjalo ekuqaleni kwenkulungwane edluleyo—yaye kubonakala ngathi le ngxaki iza kuthabath’ unyawo.” Kutheni kunjalo nje? Eli phephancwadi lacaphula uTerry Young, onolwazi ngeengxaki zobuthongo esithi: “Abantu bagqala ukulala njengento eqheleke gqitha kangangokuba bathi ukungalali akunakuba yingxaki. Ukusebenza nzima uze ungalali ngokwaneleyo kugqalwa njengokukhuthala.”

Kuthiwa ngokuqhelekileyo, umntu kufuneka alale malunga neeyure ezintandathu ezinesiqingatha ukuya kwezisithoba busuku ngabunye. Ukungalali ngokwaneleyo kubangela ukuba umntu “ahlale enobuthongo.” Ingxelo eyasasazwa yiAAA Foundation for Traffic Safety ithi: “Kwanokungalali ngokwaneleyo ngemizuzu engama-30 okanye engama-40 busuku ngabunye phakathi evekini, kunokwenza ukuba kuthi kufika impelaveki ube unqwenela ukulala iiyure ezi-3 ukuya kwezi-4 ezingakumbi, okanye kukwenze uhlale uyokotheka imini ezi.”

Maxa wambi, usenokungalali kakuhle ebusuku. Ukuphelelwa bubuthongo, ukunyamekela usana olugulayo okanye ezinye izinto ezingaphaya kwamandla akho, zinokukuphazamisa xa ulele. Ngemini elandelayo ungazibona sele unqwaleka ngoxa uqhuba. Ufanele wenze ntoni xa ukule meko?

Izinto ekuthiwa ziluncedo njengokusela izinto ezinecaffeine, ukuvula ifestile, ukuhlafuna itshungama okanye ukutya izinto eziqhwethayo zisenokungasebenzi. Akukho nanye into esebenzayo kwezi kuthiwa ziyanceda. Kufuneka nje ulale. Ngoko kutheni ungaziphi ithutyana nje lokuthi ngqwa? IThe New York Times yacebisa ngelithi: “Ukuze uzive uhlaziyekile, ufanele uthi ngqwa nje kangangemizuzu engama-30; ukulala ixesha elingakumbi kunokukwenza uzibone sele ukobentlombe ubuthongo, kube nzima ke ngoku ukuvuka.” Ukulala ithutyana kunokwenza ufike kade kwindawo oya kuyo, kodwa kunokubusindisa ubomi bakho.

Ubomi bakho bemihla ngemihla bunokuba negalelo ekozeleni ngoxa uqhuba. Ngaba uchitha iiyure ezininzi usebenzisa i-Internet okanye ngaba uhlala kude kube sezinzulwini zobusuku ubukele umabonwakude? Ngaba uhlala kwiimbutho zolonwabo de kube sekuseni? Musa ukuvumela ezo zinto ziphazamisane nokulala kwakho. UKumkani uSolomon osisilumko wabethelela ukubaluleka ‘kwesandla esizeleyo sokuphumla.’—INtshumayeli 4:6.

Banamava Kodwa Baluphele

Abaqhubi abasele bakhulile badla ngokuba ngabona banamava. Ngaphezu kwako konke, balumkile yaye abafane bazibeke esichengeni sokwehlelwa yingozi. Noko ke, naba baqhubi sele bekhulile bakhe babandakanyeke kungquzulwano lweenqwelo-mafutha. Enyanisweni, njengoko besiya bekhula banokuba sesichengeni seengozi zeenqwelo-mafutha. Iphephancwadi laseUnited States iCar & Travel lathi: “Kubantu abakhoyo, abantu abaneminyaka engaphezu kwengama-70 ubudala basisi-9 ekhulwini, kodwa iingozi zeendlela ezili-13 ekhulwini ekufa abantu kuzo, zibangelwa ngabo.” Okubuhlungu kukuba, ziya zisiba ninzi iingozi zeenqwelo-mafutha ezingquzulanayo, eziqhutywa ngabo sele bekhulile.

Khawucinge nje ngoMyrtle onama-80 eminyaka ubudala.a Waqalisa ukuqhuba kwiminyaka engaphezu kwama-60 eyadlulayo, kodwa akazange enze ngozi. Kodwa njengabantu bonke, sel’ ethande ukonganyelwa kukwaluphala—nto leyo embeka esichengeni sokwenza ingozi. Ebesandul’ ukuxelela uVukani! oku: “Xa usaluphala, yonk’ into le iba ngumgudu [kuquka ukuqhuba].”

Uye wenza ntoni ukuze athintele ingozi yenqwelo-mafutha? UMyrtle uthi: “Njengoko ndiya ndikhula, kuye kwafuneka ndenze uhlengahlengiso.” Ngokomzekelo, akasafane aqhube ixesha elide, ingakumbi ebusuku. Olu hlengahlengiso lungephi lwenza ukuba aqhube kakuhle, ngaloo ndlela kungabikho mfuneko yokuba ayeke ngokupheleleyo.

Nangona kusenokuba nzima ukuyamkela loo nto, sinokutshintsha ngendlela ephawulekayo xa sisaluphala. (INtshumayeli 12:1-7) Sikhathazwa yimpilo, senza izinto ngokucotha, siya singaboni kakuhle—zinto ezo ezinokwenza kube nzima ukuqhuba ngendlela ekhuselekileyo. Noko ke, ukwaluphala nje kukodwa, akunakumenza umntu angafaneleki njengomqhubi. Eyona nto ibalulekileyo yindlela umntu aqhuba ngayo. Ukuqonda ukuba sinezinto esingasakwaziyo ukuzenza ngenxa yokwaluphala nokwenza uhlengahlengiso olufanelekileyo kunokusinceda siqhube kakuhle.

Usenokuba akuqondi ukuba, uya ungaboni kakuhle. Njengoko usaluphala, ubona izinto ezikufutshane kuphela. Incwadana ethi The Older and Wiser Driver ithi: “Umqhubi oneminyaka engama-60 ubudala ufuna ukukhanya okuphindwe kathathu kunoko kufunwa ngumntu okwishumi elivisayo, yaye unokuthabatha ixesha eliphindwe kabini ukuqhelana nobumnyama xa esuka ekukhanyeni.” Utshintsho olunjalo emehlweni akho lunokwenza kube nzima ukuqhuba ebusuku.

UHenry, uneminyaka engama-72 ubudala yaye ebesoloko eqhuba kakuhle kangangeminyaka engaphezu kwama-50. Ngokuhamba kweminyaka, waphawula ukuba, kunzima ukuqhuba ebusuku, ngenxa yokuphandlwa zizibane zeenqwelo-mafutha eziza ngaphambili. Emva kokuba eye waxilongwa amehlo, waxelelwa ukuba athenge iiglasi zamehlo ezaziya kumnceda kwingxaki yokuphandlwa. UHenry uthi: “Ngoku andisenangxaki yokuqhuba ebusuku.” Ukwenza kwakhe olu hlengahlengiso lungephi kwayiphucula gqitha indlela aqhuba ngayo. Kwabanye abafana noMyrtle, ukuyeka nje kwaphela ukuqhuba ebusuku kunokuba sisicombululo.

Kwakhona xa usaluphala izinto uzenza ngokucotha. Abantu abakhulileyo banokulumka baze babe nengqiqo kunabaselula. Noko ke, njengoko besaluphala, abakwazi ukucinga baze benze ngokukhawuleza. Loo nto yenza kube nzima gqitha ukuqhuba, njengoko zininzi izinto eziphazamisayo endleleni. Ezo zinto zifanele ziphawulwe ngokukhawuleza kuze kuthatyathwe amanyathelo afanelekileyo.

Iphephancwadi iCar & Travel lithi “oyena nobangela wokufa kwabantu kungquzulwano lweenqwelo-mafutha eziqhutywa ngabo sele bekhulile, kukungena kwiirobhothi zibomvu.” Kubangelwa yintoni oko? Kwaeli phephancwadi lihlabela mgama lithi: “Kubonakala ngathi . . . eyona ngxaki kukungakwazi kwaba baqhubi sele bekhulile ukulaqaza ngaphambi kokungena ekudibaneni kweendlela.”

Unokuzithintela njani iingxaki ezibangelwa kukwenza izinto ngokucotha? Lumka xa usondela ekudibaneni kweendlela. Ziqhelise ukubhekabheka ngaphambi kokuba ungene. Kufuneka ulumke ngokukhethekileyo xa ujika. Ukujika ekudibaneni kweendlela kunokuba yingozi, ingakumbi xa uza kunqumla kwindlela yeenqwelo-mafutha eziza ngaphambili.

EUnited States, ama-40 ekhulwini eengozi ezibulalayo ezenziwa ngabantu abaneminyaka engaphezu kwama-75 ubudala, ekudibaneni kweendlela, zenzeka xa bejikela kwicala langasekhohlo. IAAA Foundation for Traffic Safety ithi xa icebisa abaqhubi balapho: “Maxa wambi kungabhetele ukuba uthabathe indlela ende ejikela ngasekunene ukuze uphephe ukujikela ngasekhohlo.” Unokulisebenzisa eli cebiso ngokweemeko zendawo ohlala kuyo. Ngokwenza uhlengahlengiso kusengaphambili, unokuziphepha iindlela ezinokuba yingozi nocelomngeni.

Isigqibo Omele Usenze

Unokuyihlola njani indlela oqhuba ngayo? Mhlawumbi unokucela umhlobo omthembayo okanye ilungu lentsapho ukuba lihambe nawe ukuze lihlole indlela oqhuba ngayo. Phulaphula ngenyameko njengoko ekuxelela oko akuphawuleyo. Kwakhona usenokugqiba kwelokuba uthabathe izifundo zokuqhuba ngokukhuselekileyo. Imibutho emininzi yabaqhubi iba nezifundo ezenzelwe ngokukhethekileyo abaqhubi abasele bekhulile. Ukubhungca kwiingozi eziliqela kunokuba luphawu lokuba ubuchule bakho bokuqhuba abusafani nakuqala.

Eneneni, kusenokufuneka uyeke ukuqhuba ekuhambeni kwexesha. Kusenokungabi lula ukwenza esi sigqibo. UMyrtle, okhankanywe ekuqaleni uyayiqonda into yokuba kungekudala kuza kufuneka ayeke ukuqhuba. Njengoko sele eza kuyeka ukuqhuba, sele eziqhelisa ukuhamba ngeenqwelo-mafutha zabanye abantu. Uvakalelwa njani ngokuqhutyelwa? Uthi: “Kumnandi gqitha ukuqhutyelwa kuba akuyomfuneko ukuzixakekisa ngokuqhubekayo endleleni.”

Emva kokuwuhlolisisa ngenyameko lo mbandela, nawe unokufikelela kwisigqibo esifanayo. Unokukunandipha gqitha ukuqhutyelwa ngumhlobo xa usiya ezivenkileni, uqhawulisa imicimbi ethile naxa usiya kubona abantu okanye usiya kwiintlanganiso. Mhlawumbi ninokusebenzisa inqwelo-mafutha yakho iqhutywa ngumhlobo. Ukwenjenjalo kunokukukhusela yaye unokukunandipha bhetele kunokuhamba wedwa. Enye indlela onokuyisebenzisa, kukuhamba ngezithuthi zikawonke-wonke xa zikho. Khumbula ukuba, ukukwazi ukuqhuba asikokuphela kwento ekwenza uxabiseke. Iimpawu ezintle onazo, zizo ezikwenza uxabiseke ngokwenene kwintsapho nakubahlobo bakho—nakuThixo.—IMizekeliso 12:2; Roma 14:18.

Enoba sele ukhulile okanye uselula, ungumqhubi onamava okanye usafunda, usesichengeni seengozi zeenqwelo-mafutha. Yiqonde into yokuba ukuqhuba kuyimbopheleleko enzulu. Qhuba ngononophelo ukuze uphephe ukungquzulana nezinye iinqwelo-mafutha. Ngokwenjenjalo, kuya kukhuseleka wena nabanye, ngalo lonke ixesha uqhuba.

[Umbhalo osemazantsi]

[Umfanekiso okwiphepha 12]

Qiniseka ukuba “uyawuhlaziya” umzimba wakho ngokulala ngokwaneleyo ebusuku

[Umfanekiso okwiphepha 13]

Ukuthi ngqwa nje ithutyana kunokulibazisa, kodwa kunokubusindisa ubomi

[Umfanekiso okwiphepha 13]

Abaqhubi abasele bekhulile ngabona banamava kodwa bajamelene nocelomngeni olukhethekileyo

[Umfanekiso okwiphepha 14]

Kunokukunceda ukuhamba nomhlobo