Indlela Yokuthintela Iingozi Zemoto

UKUKHALA kwamavili emoto, isandi seentsimbi, ukwaphuka kweefestile nokuvakala kwesijwili . . . Mhlawumbi abantu abakhe basengozini yemoto bayayazi le nto kuthethwa ngayo apha. IPopulation Reference Bureau ithi “kuqikelelwa ukuba abantu abazizigidi ezili-1.2 ehlabathini jikelele bafa kwiingozi zeemoto nyaka ngamnye yaye abazizigidi ezingama-50 bayenzakala.”

Sekunjalo, ukuluphaphela ukhuseleko nokusebenzisa ingqondo kunokukunceda uphephe iingozi ezininzi. Makhe sibone ukuba unokuyenza njani loo nto.

Isantya Oqhuba Ngaso, Ukubopha Ibhanti Nokuthumela Iisms

Kwezinye iindlela, umthetho usenokubonakala ngathi uthi masihambe ngesantya esiphantsi kakhulu. Kodwa ukubalekisa kudla ngokukongela ixesha nje elincinane. Ngokomzekelo, xa uhamba umgama weekhilomitha ezingama-80 ngesantya esiziikhilomitha ezili-130 endaweni yezili-100 ngeyure, wonga nje imizuzu engaphantsi kwesithoba. Ngaba ufanele ubeke ubomi bakho esichengeni kuba ufuna ukonga ixesha elincinane ngolo hlobo?

Ibhanti lemoto lenzelwe ukusikhusela. Urhulumente waseUnited States uthi, phakathi kowama-2005 nowama-2009 ukubopha ibhanti lemoto kwasindisa ubomi babantu abangaphezu kwama-72 000 kwelo lizwe nje kuphela. Ngaba iair bag ithath’ indawo yebhanti? Akunjalo. Iair bag incedisana nebhanti ukuze ikukhusele. Iair bag ayisebenzi kakuhle xa ungalibophanga ibhanti yaye inokude ibe yingozi. Ngoko ziqhelise ukubopha ibhanti uze uxelele nabo uhamba nabo ukuba benjenjalo. Nantsi enye into ofanele uyilumkele: Ungaze ufunde okanye ubhale isms ngoxa uqhuba.

Uhlobo Lwendlela Ohamba Kuyo Nemeko Yemoto Yakho

Imoto iyatyibilika xa kumanzi okanye indlela inothuli, isanti okanye amatye. Ukuba akubalekisi, imoto yakho ayiyi kutyibilika xa kufuneka umisile. Ukuba usoloko uqhuba kwiindlela ezinekhephu okanye umkhenkce kusenokufuneka uthenge amavili alungiselelwe ezo ndlela.

Iingozi zixhaphakile kwiindawo apho kudibana khona iindlela eziliqela. Enye ingcali ithi: Xa iirobhothi zivula, linda kancinane ngaphambi kokuba uhambe. Ngaloo ndlela unokuphepha ukutshayiswa yimoto engakhange ime kwiirobhothi.

Ukugcina imoto yakho ikwimeko entle kubalulekile ukuze uphephe iingozi. Cinga nje ngoko kunokwenzeka xa imoto yakho inokuphelelwa ziziqhoboshi endleleni. Ukuze baqiniseke ukuba imoto zabo azifane zonakale, abanye abantu bazisa rhoqo kumntu okwaziyo ukulungisa iimoto. Kwelinye icala, abanye abantu abanemoto bakhetha ukuzilungisa ngokwabo ezinye zeengxaki. Enoba ukhetha ukuyilungisa ngokwakho okanye ukuyisa komnye umntu, qiniseka ukuba imoto yakho ihlolwa ize ilungiswe rhoqo.

Ukuqhuba Ngoxa Usele Utywala

Nabantu abadla ngokuqhuba kakuhle basenokuzibeka esichengeni ngokuqhuba besele utywala. Ngowama-2008 bangama-37 000 abantu baseUnited States abaye bafa kwiingozi zemoto. Inkoliso yabo yafa kwiingozi ezazibandakanya abantu ababeqhuba besele. Nokusela utywala obuncinane kunokukwenza ungaqhubi kakuhle. Abanye abantu bakhetha ukungabuphathi kwaukubuphatha xa beza kuqhuba.

Ukuthobela imithetho yendlela, ukubopha ibhanti, ukuqiniseka ukuba imoto yakho ikwimeko entle nokungaqhubi xa usele kunokusindisa ubomi bakho nobabanye abantu. La macebiso aya kukunceda uphephe iingozi, kuphela ukuba uyawasebenzisa.

[Ibhokisi/Umfanekiso okwiphepha 11]

MUSA UKUQHUBA XA USOZELA

“Abantu kufuneka bakhumbule ukuba ukuqhuba usozela kuyafana nokuqhuba unxilile.” Loo mazwi awathethwa ligosa leU.S. National Sleep Foundation abonisa ingozi yokuqhuba usozela. Akubobulumko ukuba uqhube xa kusenzeka ezi zinto zilandelayo:a

● Xa kunzima ukugcina amehlo akho evulekile okanye xa uqhwanyaza rhoqo

● Xa ukufumanisa kunzima ukujonga indlela

● Xa usoloko uzamla

● Xa kunzima ukukhumbula izinto ezisandul’ ukwenzeka endleleni

● Xa udlula kwiindawo ofanele ujike kuzo okanye ungayithobeli imithetho yendlela

● Xa umane uphuma endleleni

Xa kusenzeka enye yezi zinto, cela omnye umntu ukuba aqhube okanye umise imoto uze ulale. Ukhuseleko lwakho nolwabanye lubalulekile!

[Umbhalo osemazantsi]