Ukufuna Izicombululo

EKUQALENI kowe-1972 amazwe angaphezu kwekhulu atyikitya isivumelwano samazwe ngamazwe esasisalela ukwenziwa nokufunjwa kwezixhobo ezenziwe ngemichiza. Esi sivumelwano, sasibizwa ngokuba yiBiological and Toxin Weapons Convention (BTWC) [Isivumelwano Ngezixhobo Ezenziwe Ngemichiza Neziyityhefu] yaba sesokuqala ukuphelisa ukwenziwa kwazo zonke izixhobo zohlobo oluthile. Ingxaki kukuba asizange siyichaze indlela yokuqinisekisa ukuba la mazwe enza ngokuvumelana naso.

Kunzima ukuqinisekisa enoba amazwe akazenzi kusini na izixhobo ezenziwe ngemichiza, ekubeni xa kusenziwa izixhobo zemichiza kunokusetyenziswa ubuchule nolwazi olufanayo nolo lusetyenziswa xa kusenziwa izinto eziluncedo. Ukusetyenziswa kobu “buchule” kubangela kube lula ukwenza izixhobo ngokufihlakeleyo kwimizi-mveliso nakwiindawo zokuxuba imichiza.

Ukuze kuconjululwe le ngxaki, ngowe-1995 abameli bamazwe ahlukahlukeneyo baqalisa ukuthethathethana ngenjongo yokuqinisekisa ukuba eso sivumelwano siyathotyelwa. Kangangesithuba esingaphezu kweminyaka emithandathu, baxubusha ngeendlela ezinokusetyenziswa ukuqinisekisa ukuba amazwe ayasithobela isivumelwano iBTWC. NgoDisemba 7, 2001, inkomfa eyathabatha iiveki ezintathu ekwakukho kuyo imibutho eli-144 yamazwe awayekho xa kwakusenziwa esi sivumelwano ngowe-1972 yaphela kungavunyelwananga. Ingxaki yaba kukuba iUnited States ayizange ivumelane nemigaqo eyintloko yokuqinisekisa ukuba amazwe ayasithobela isivumelwano iBTWC. Ngokutsho kweUnited States, ukuvumela abantu bamanye amazwe baze kuhlola amaziko ayo okugcina nokwenza izixhobo kwakuza kufana nokuzibizela iintlola.

Oko Kuza Kwenzeka Kwixa Elizayo

Ngenxa yobugcisa kwezamachiza kunokuphunyezwa izinto ezintle nezimbi. Obunye ubugcisa—njengokunyibilikisa isinyithi, ukwenza iziqhushumbisi, ukuxuba amachiza, ukwenza iinqwelo-moya ezinkulu nobe-elektroniki—buye basetyenziswa kungekuphela nje ukwenza izinto eziluncedo, kodwa nakwizenzo zenkohlakalo. Ngaba kuza kuba njalo nangobugcisa kwezamachiza? Abaninzi bacinga ukuba kuza kuba njalo.

Ingxelo yeU.S. Commission on National Security yowe-1999 yathi: “Abantu ngabanye kuquka amaqela . . . baza kuba namandla nempembelelo engakumbi, yaye abaninzi baza kuba nezixhobo eziyingozi. . . . Abantu baza kwenza izinto beqhutywa yintiyo ebangelwa yinzondelelo yonqulo, iinkolelo ezibonakala zingekho ngqiqweni okanye ingqumbo engathethekiyo. Ngoku abanqolobi basenokusebenzisa ubugcisa obabukade busetyenziswa ngoorhulumente bamazwe ahambele phambili baze bahlasele imimandla enabantu abaninzi.”

Nangona singakwazi oko kuza kwenzeka kwixa elizayo, siyayazi injongo kaThixo ngabantu. IBhayibhile ithembisa ukuba kuza ilixa apho abantu abasemhlabeni ‘beya kuhlala ngonqabiseko, kungekho bani ubangcangcazelisayo.’ (Hezekile 34:28) Ukuze wazi okungakumbi ngesi sithembiso sithuthuzelayo, qhagamshelana namaNgqina kaYehova akwindawo ohlala kuyo okanye ubhalele kwidilesi efanelekileyo kwezo zikwiphepha 5 leli phephancwadi.

[Umfanekiso okwiphepha 30]

Abaphandi bazama iindlela zokwenza i-“anthrax” iphelelwe ngamandla

[Inkcazelo]

Photo courtesy of Sandia National Laboratories

[Umfanekiso okwiphepha 30]

IBioweapons Conference, kaNovemba 19, 2001, eyaqhutyelwa eSwitzerland

[Inkcazelo]

AP Photo/Donald Stampfli

[Imifanekiso ekwiphepha 31]

IBhayibhile ithembisa ukuba kwixa elizayo bonke abantu baza “kuhlala ngonqabiseko”