Indlela Emangalisayo Abaphinda Badibana Ngayo Emva Kweminyaka Engama-30
ABAFANA ababini baqala ukwazana ngowe-1967. Bahlaliswa kwigumbi elinye eMichigan Technical University, eUnited States. Ngelo xesha, uDennis Sheets owayevela eLima eOhio, wayeneminyaka eli-18 ubudala, ekunyaka wakhe wokuqala eze kufunda indlela yokunyamekela amahlathi. UMark Ruge owayeneminyaka engama-20 ubudala wayevela eBuffalo, eNew York. Wayekunyaka wakhe wesithathu efundela ubunjineli.
Ngelo xesha, ubuhlobo babo babubonakala ibobethutyana. Bobabini aba bafana abazange baqhubeke nemfundo yabo yaseyunivesithi; emva koko bahlukana. Kwadlula iminyaka engaphezu kwamashumi amathathu. Ngenye imini la madoda aphinda adibana kwiDominican Republic. Adibana engalindelanga. Kodwa kukho nto ithile eyabangela ukuba aphinde adibane. Yintoni leyo? Ukuze sifumane impendulo, makhe sibone izinto ezenzekayo emva kokuba la madoda ahlukene.
UDennis Uya Emfazweni
Ekupheleni konyaka wakhe wokuqala eyunivesithi uDennis wagoduka. NgoDisemba 1967, wabizelwa kuMkhosi waseUnited States, waza ngoJuni 1968 wathunyelwa eVietnam. Apho wabona izinto ezimanyumnyezi ezazibangelwa yimfazwe. Lathi lakuphela ixesha lakhe emkhosini ngowe-1969, wabuyela eUnited States, wafumana umsebenzi kwenye inkampani enkulu yaseOhio. Noko ke, akazange aneliseke.
UDennis uthi: “Umnqweno endandinawo ndiseyinkwenkwe yayingowokufudukela eAlaska ndize ndibe ngumfama.” Ngoko ngowe-1971 yena nomnye umhlobo wakhe awayefunda naye kwisikolo samabanga aphakamileyo bazama ukufikelela olo sukelo. Noko ke, kunokuba abe ngumfama, wenza imisetyenzana eyahlukahlukeneyo yesingxungxo. Kangangethuba elithile wayehlala ententeni engumcimi-mlilo. Wayeka iindevu neenwele zakhe zande waza waqalisa ukutshaya intsangu.
Ngowe-1972, uDennis wafuduka eAnchorage ukuze aye kumsitho obizwa ngokuba yiMardi Gras owenziwa eNew Orleans, eLouisiana. Emva koko wazakhela ixhobongwana elenziwe ngamaplanga kwihlathi laseArkansas. Apho, wayesakha izindlu zamaplanga efaka nekonkile. NgoJuni 1973, uDennis walijikeleza lonke elo ezama ukufumana injongo yobomi.
UMark Kumzabalazo Nxamnye Nemfazwe
UMark waqhubeka nezifundo zakhe eyunivesithi ithutyana emva kokumka kukaDennis, kodwa wafikelela kwisigqibo sokuba akasafuni kuba negalelo ekuxhaseni imfazwe. Ngoko wabuyela eBuffalo waza wasebenza njengomphathi kwinkampani eyenza iintsimbi. Evakalelwa kukuba ngandlel’ ithile usabandakanyekile ekuxhaseni imfazwe, wayeka ukusebenza, wazithengela isithuthuthu waza waya eSan Francisco, eCalifornia. Nangona bona babengazi, uDennis noMark bakha baseSan Francisco ngaxeshanye.
NjengoDennis, uMark wayeka iindevu neenwele zakhe zande waza waqalisa ukutshaya intsangu. Kodwa uMark wayephambili kumzabalazo nxamnye nemfazwe, ebandakanyeke kwimingcelele yoqhankqalazo. Wayefunwa ngamagosa eFBI ukuze afakwe emkhosini, ngenxa yoko kangangeminyaka eliqela wayetshintshatshintsha amagama ebaleka ukubanjwa. ESan Francisco wafika walihippie. Ngoxa wayelapho, ngowe-1970 watyelelwa ngamaNgqina kaYehova amabini.
UMark uthi: “Mhlawumbi abona ngathi ndinomdla, aza abuya. Afika ndingekho, kodwa ashiya iBhayibhile eluhlaza neencwadi ezintathu.” Noko ke, uMark akazange azifunde ezo ncwadi kuba wayexakeke kakhulu yimicimbi yezobupolitika yaye ethe phithi lulonwabo. Namagosa eFBI ayemthe mbende. Ngoko waphinda wazitshintsha igama waza wafudukela eWashington, D.C. Wathi elapho, kwafika intombi awayethandana nayo uKathi Yaniskivis, awayedibene nayo eyunivesithi.
Ngowe-1971 amagosa eFBI ada ambamba uMark. Waphelekwa ngamagosa amabini eFBI ngenqwelo-moya eyayisuka eWashington, D.C., isiya eNew York aza aqinisekisa ukuba uye kufika eToronto, eKhanada. Kucacile ukuba amagosa eFBI ayengamgqali njengesisongelo eluntwini; ekuphela kwento awayeyifuna kukuba aphume aphele kwelo. Kunyaka olandela lowo, wazimanya ngeqhina lomtshato noKathi baza bafudukela kwiGabriola Island, eBritish Columbia, eKhanada. Babefuna ukuphila ubomi obuzolileyo, sekunjalo babevakalelwa kukuba ubomi bunayo injongo.
Baba NgamaNgqina
Uya kukhumbula ukuba, uDennis wayejikeleza ilizwe efuna injongo yobomi. Olo khenketho lwakhe lwaya kumphosa eMontana, apho wafumana umsebenzi ngaseChinook encedisa umfama othile ekuvuneni ukutya okuziinkozo. Inkosikazi nentombi yaloo mfama babengamaNgqina kaYehova. UDennis wanikwa iphephancwadi uVukani! ukuze alifunde. Kungekudala, weyiseka ukuba amaNgqina lunqulo lwenyaniso.
UDennis wathabatha iBhayibhile yakhe waza wemka kuloo fama waya eKalispell, eMontana. Ngoxa wayelapho, waya kwiintlanganiso zamaNgqina kaYehova okwesihlandlo sokuqala. Kwezo ntlanganiso, wacela ukuqhutyelwa isifundo seBhayibhile. Kungekudala emva koko, wacheba iinwele neendevu. NgoJanuwari 1974 waqalisa umsebenzi wokushumayela yaye wabhaptizwa kwiqula lamanzi ePolson, eMontana, ngoMatshi 3, 1974.
Ukanti uMark noKathi, ababehlala kwiGabriola Island, bafumanisa ukuba banalo ixesha, yaye bagqiba ekubeni bafunde iBhayibhile. Baqalisa ukufunda iKing James Version kodwa bafumanisa ukuba ibhalwe ngesiNgesi sakudala ababengasiqondi kakuhle. UMark wakhumbula ukuba kukho iBhayibhile neencwadi awayezinikwe ngamaNgqina kwiminyaka engaphambili. Bafunda iBhayibhile nencwadi ethi Inyaniso eKhokelela kuBomi obungunaPhakade nethi Is the Bible Really the Word of God? UMark noKathi bachukumiseka gqitha koko babekufunda.
UMark uthi: “Ndafunda kwincwadi ethi Inyaniso ukuba kukho iqela lamaKristu angabandakanyekiyo emfazweni yaye leyo yeyona nto yandichukumisa gqitha. Ndavakalelwa kukuba lawo yayingamaKristu enyaniso.” Kamsinya emva koko, uMark noKathi batyelela intsapho yakuloKathi eHoughton, eMichigan—nangona babezibeka esichengeni sokubanjwa. Besakhangeleka njengamahippie, baya kwiintlanganiso zamaNgqina. Bavuma ukuqhutyelwa isifundo seBhayibhile yaye ngaloo nyanga babeseMichigan babefunda.
Emva kokubuyela kwiGabriola Island, badibana neNgqina kwisitrato saseNanaimo, eBritish Columbia, yaye balichazela ukuba bafuna ukuqhutyelwa isifundo seBhayibhile. Kwangaloo mini kwagaleleka iqela lamaNgqina ngesikhephe kwaza kwaqaliswa isifundo seBhayibhile. Kwiinyanga ezintathu kamva, uMark noKathi baqalisa ukushumayela. Kwiinyanga ezintathu emva koko, ngoMatshi 10, 1974, babhaptizwa. Kwakusemva kweveki uDennis ebhaptiziwe!
UDennis Uqalisa Ubulungiseleli Bexesha Elizeleyo
UDennis waba nguvulindlela, okanye umlungiseleli wexesha elizeleyo, ngoSeptemba 1974. Uthi: “Ndandibunandipha ubuvulindlela, kodwa ndandifuna ukwandisa ubulungiseleli bam; ngoko ngoJulayi 1975, ndafaka isicelo sokuya kusebenza kwikomkhulu lamaNgqina kaYehova eBrooklyn, eNew York. Ndabizwa ngoDisemba waloo nyaka.”
Umsebenzi wokuqala owenziwa nguDennis yayingowokulungisa iTowers Hotel eyayiza kuhlala abasebenzi belo komkhulu. Wasebenza apho iminyaka eliqela, engumveleli kwiqela elifaka iithayile. Kuba wayenqwenela ukutshata, wafudukela eCalifornia. Ngowe-1984, ngoxa wayekhonza njengomdala kwibandla laseCathedral City, watshata noKathy Enz owayenguvulindlela.
UDennis noKathy babezimisele ukuphila ubomi obulula ukuze bahambisele phambili izilangazelelo zoBukumkani bukaThixo. Ngenxa yoko uDennis wayedla ngokungayamkeli imisebenzi awayeyinikwa kwishishini lokwakha elalinemali eninzi kumzantsi California. Ngowe-1988 yena noKathy bafaka isicelo sokuncedisa kumsebenzi wokwakha owenziwa ngamaNgqina kaYehova kumazwe ngamazwe. NgoDisemba waloo nyaka, bafumana isabelo sokuya kusebenza kwisakhiwo sesebe laseBuenos Aires, eArgentina.
Ngowe-1989, uDennis noKathy bamenyelwa ukusebenza ngokusisigxina kumsebenzi wokwakha owenziwa ngamaNgqina kaYehova. Ngoxa besenza le nkonzo ikhethekileyo yexesha elizeleyo, basebenza izihlandlo ezibini eSuriname naseColombia. Bakha basebenza nakwizakhiwo zesebe e-Ecuador, eMexico nakwiDominican Republic.
UMark Uqalisa Ubulungiseleli Bexesha Elizeleyo
Ngowe-1976, uMark nabanye abafana baseMerika abangamawaka ababebalekele eKhanada kuba bengafuni kungena emkhosini, baxolelwa ngurhulumente waseUnited States. Yena nenkosikazi yakhe uKathi babezimisele ukuphila ubomi obulula ukuze babe nexesha elininzi kubulungiseleli. Ngoko uMark wayesenza umsebenzi wesingxungxo ehlola iziza zezakhiwo, yaye ekugqibeleni yena noKathi bawahlawula bawagqiba amatyala ababewenze ngaphambi kokuba babhaptizwe.
Ngowe-1978 xa amaNgqina aseKhanada ayeceba ukwakha isakhiwo sesebe esitsha kufuphi naseToronto, eOntario, uMark noKathi bancedisa kuloo msebenzi. Ekubeni uMark wayenamava okuhlola iziza zezakhiwo, bacelwa ukuba bancedise kulo msebenzi wokwakha. Basebenza eGeorgetown de sagqitywa isakhiwo ngoJuni 1981. Emva koko, babuyela eBritish Columbia yaye kwiminyaka emine eyalandelayo bancedisa ekwakheni iHolo yeNdibano yamaNgqina kaYehova yalapho. Emva kokuba igqityiwe, baphinda babizelwa kumsebenzi wokwandisa isebe laseKhanada.
Emva kweenyanga ezimbalwa beseGeorgetown, ngowe-1986, uMark noKathi bamenywa ukuba bahlale ngokusisigxina njengamalungu esebe laseKhanada. Ukususela ngoko, baye bakhonza apho yaye baye banamathuba amaninzi okuncedisa kumsebenzi wokwakha kumazwe amaninzi. Ngenxa yokuba enamava kumsebenzi wokuhlola iziza zezakhiwo, uMark uye wasetyenziswa ekuhloleni iziza zezakhiwo zamasebe awahlukahlukeneyo nezeeHolo zeNdibano zamaNgqina kaYehova kuMzantsi nakuMbindi Merika nakwiziqithi zeCaribbean.
Kuyo yonke le minyaka, yena noKathi baye bakhonza eVenezuela, eNicaragua, eHaiti, eGuyana, eBarbados, kwiBahamas, eDominica, eUnited States (eFlorida) nakwiDominican Republic. Lolu hlobo lwenkonzo ekhethekileyo yexesha elizeleyo olwabangela ukuba uMark aphinde adibane noDennis.
Ukudibana Kwabo KwiDominican Republic
Bengazi, uMark noDennis babesebenza kumsebenzi ofanayo kwiDominican Republic. Ngenye imini badibana kwizakhiwo zesebe lamaNgqina kaYehova eSanto Domingo. Njengoko nawe unokucinga, bakuvuyela gqitha ukuphinda babonane. Kwakusemva kweminyaka engama-33 yaye zininzi izinto ababemele bazincokole. Bemangalisiwe, babaliselana ngezinto ezininzi osele ufunde ngazo. Kodwa eyona nto yabahlab’ umxhelo—bona, nabo bonke abo bakhe bababalisela amava abo—zizinto ezininzi ezifanayo eziye zenzeka ebomini babo.
Bobabini babengamahippie baza bafudukela kwiindawo ezikwanti kuba bengafuni ukuphila ubomi bobunewunewu bebaleka neengxaki ezihambisana nobo bomi. UDennis watshata nentombi egama linguKathy; uMark watshata nentombi egama linguKathi. Bobabini bavuma ukufundelwa iBhayibhile kwisihlandlo sokuqala beye kwiintlanganiso zamaNgqina kaYehova. Bobabini babhaptizwa ngoMatshi 1974. Bobabini bakhonza kumasebe amaNgqina kaYehova—uDennis wakhonza eUnited States uMark wakhonza eKhanada. Bobabini baye bazama ukuphila ubomi obulula ukuze bahambisele phambili izilangazelelo zokomoya. (Mateyu 6:22) Bobabini baye basebenza kumsebenzi wokwakha kumazwe ngamazwe yaye baye basebenza kumazwe aliqela. Ngaphambi kokuba badibane kwiDominican Republic, akukho namnye kubo owakha wadibana nomhlobo wangaphambili owamkele inyaniso yeBhayibhile.
Ngaba uMark noDennis bagqala ezi ziganeko njengezinto ezazimiselwe kwangaphambili? Akunjalo. Bayaqonda ukuba iBhayibhile inyanisile xa isithi ‘sonke sehlelwa lixesha nasisihlo esingenakubonwa kwangaphambili,’—yaye maxa wambi oku kwenzeka ngendlela ebangela umdla. (INtshumayeli 9:11) Noko ke, bayaqonda ukuba ikho nenye into eyabangela ukuba baphinde badibane: ukufuna kwabo injongo yobomi nokuthanda kwabo uYehova uThixo.
La mava kaDennis noMark abonisa ezinye zezinto abafana ngazo bonke abo bantliziyo zinyanisekileyo, abafunda inyaniso yeBhayibhile. UDennis uthi: “La mava am noMark abonisa ukuba uYehova uyazazi iimeko zabantu yaye xa iintliziyo zabo zinotyekelo olufanelekileyo ubatsalela kuye.”—2 Kronike 16:9; Yohane 6:44; IZenzo 13:48.
Yena uMark uthi: “Amava ethu aye asinceda saqonda ukuba xa umntu esenza iinguqulelo ngokuvisisana nemilinganiselo kaYehova, azahlulele aze azinikele kuye, uYehova unokumsebenzisa ekuhambiseleni phambili unqulo lokwenyaniso ukuze kungenelwe abantu bakhe.”—Efese 4:8.
Kwakhona la mava abonisa ukuba uYehova uThixo uyabasikelela abo bamkhonza ngomphefumlo uphela. Ngokuqinisekileyo uDennis noMark bazigqala njengabantu abasikelelekileyo. UDennis uthi: “Kulilungelo ukuhambisela phambili izilangazelelo zoBukumkani kwinkonzo ekhethekileyo yexesha elizeleyo. Kuye kwasinika ithuba lokukhuthazana nabazalwana noodade abangamaKristu esiye sasebenza nabo ehlabathini lonke.”
UMark wongezelela athi: “Ngokuqinisekileyo uYehova uyabasikelela abo babeka izilangazelelo zoBukumkani kuqala ebomini babo. Ndikugqala njengentsikelelo ukukhonza kunye nentsapho yesebe laseKhanada nokuba nenxaxheba kumsebenzi wokwakha owenziwa kumazwe ngamazwe.”
Ngaba kukho into emangalisayo kule ndlela baphinda badibana ngayo? Ewe, kuba uMark uthi; “Eyona nto yasichulumancisayo ukudibana kwethu, kukuba sobabini siye safunda ngoThixo obalaseleyo uYehova, samthanda saza samkhonza.”
[Umfanekiso okwiphepha 28]
UDennis, ngowe-1966
[Umfanekiso okwiphepha 28]
UMark, ngowe-1964
[Umfanekiso okwiphepha 30]
UDennis kuMzantsi Dakota, ngowe-1974
[Umfanekiso okwiphepha 30]
UMark eOntario, ngowe-1971
[Umfanekiso okwiphepha 31]
UDennis noMark, kunye nabafazi babo, emva kokudibana kwabo, ngowama-2001