“Uncedo Lwam Luvela KuYehova”

Iintsapho Zomelezwa Kukwazi UThixo

“UDONGA lwaseBerlin.” Leyo yindlela isibini saseArgentina esilubiza ngayo udonga esalwakhayo ukwahlula umzi waso kubini! Sasinezinto esingavumelaniyo kwaphela ngazo; sasithiyene gqitha.

Okubuhlungu kukuba, imeko yeso sibini asinto ingaqhelekanga. Kwiintsapho ezininzi kugquba iingxwabangxwaba, ukunganyaniseki nentiyo engathethekiyo. Ilusizi noko ke le meko, ekubeni intsapho ililungiselelo elamiselwa nguThixo. (Genesis 1:27, 28; 2:23, 24) Esi sipho sivela kuThixo lilungiselelo elihle lokubonakalisa uthando olunzulu. (Rute 1:9) Ngokuzalisekisa iimbopheleleko zawo azinikwe nguThixo, amalungu entsapho anokuzukisa uYehova aze abe yintsikelelo kwamanye.a

Ekubeni inguThixo owasungula ilungiselelo lomtshato, sifanele sivumele imbono yakhe iphembelele ulwazi lwethu ngendlela iintsapho ezimele zenze ngayo izinto. ILizwi lakhe lisinika iziluleko ezisebenzisekayo ezininzi ukunceda iintsapho ziphumelele, ingakumbi xa kuvela iingxaki. Kwindima yendoda, iBhayibhile ithi: “Amadoda afanele abathande abafazi bawo njengemizimba yawo.” Xa indoda ikwenza oku, ngovuyo umfazi wayo uba “nentlonelo enzulu ngendoda yakhe.”—Efese 5:25-29, 33.

Ngokuphathelele ulwalamano lwabazali nabantwana babo, umpostile uPawulos wabhala: “Boyise, musani ukubacaphukisa abantwana benu, kodwa qhubekani nibakhulisela kwingqeqesho nasekweyiselweni kwengqondo kuYehova.” (Efese 6:4) Oku kwenza intsapho ifudumale, nto leyo ebangela abantwana babathobele ngokulula abazali babo.—Efese 6:1.

Ezi ngongoma zikhankanyiweyo zingumzekelo wesiluleko seBhayibhile sobulumko kubomi bentsapho. Ngokusebenzisa imigaqo kaThixo, abaninzi bonwabile emakhayeni abo. Ngokomzekelo, khawucinge ngesiya sibini saseArgentina sikhankanywe ekuqaleni. Emva kokuba sifundisise iBhayibhile namaNgqina kaYehova kangangeenyanga ezintathu, saqalisa ukusebenzisa isiluleko sayo sobulumko ngomtshato. Sazibhokoxa ekubeni siphucule indlela esincokolisana ngayo, sibe novelwano omnye komnye size sixolelane. (IMizekeliso 15:22; 1 Petros 3:7; 4:8) Safunda ukuwulawula umsindo waso nokucela uncedo kuThixo xa izinto zibonakala zingalawuleki. (Kolose 3:19) Kungekudala, “Udonga lwaseBerlin” lwadilika!

UThixo Unokuyakha Intsapho

Ukuba nolwazi nokusebenzisa imilinganiselo kaThixo kunokomeleza intsapho ukuze imelane neengcinezelo. Oku kubalulekile, kuba kwaprofetwa ukuba ilungiselelo lentsapho liya kuhlaselwa ngenkohlakalo kumhla wethu. UPawulos waxela kwangaphambili ngokuphela kwemilinganiselo yokuziphatha ebantwini. Wathi ‘imihla yokugqibela’ iya kuzaliswa kukunganyaniseki, ukungabikho ‘komsa wemvelo’ nokungathotyelwa kwabazali nkqu nangabo ‘banembonakalo yozinikelo lobuthixo.’—2 Timoti 3:1-5.

Ukuzama ukukholisa uThixo kunokukhusela intsapho kwimiphumo eyingozi. Iintsapho ezininzi ziye zaqonda ukuba uncedo lukaThixo luyafuneka ukuze zikwazi ukuhlangabezana neengxaki ezininzi ezijamelana nazo. Ukuba amalungu entsapho anomnqweno wokugcina ulwalamano oluhle noThixo, afanele asebenzise imigaqo yeBhayibhile aze aqonde ukuba “ngaphandle kokuba uYehova uyayakha indlu, kulilize ukusebenza nzima kwabakhi bayo kuyo.” (INdumiso 127:1) Ukuze intsapho yonwabe imele ibeke uThixo kwindawo yokuqala ebomini bayo.—Efese 3:14, 15.

Enye indoda yaseHawaii, uDennis yakufumanisa kuyinyaniso oko. Nangona wayesithi ungumKristu, wayesoloko ethetha krwada yaye esilwa. Emva kokuba ebuye emkhosini, waba ndlongondlongo ngakumbi yaye enentiyo. Uthi: “Ndandingumnqay’ ulambile. Ndandingakukhathalele oko kwenzekayo kum, ndingakoyiki nokufa. Ndandikrwada yaye ndinguphuma-silwe. Umfazi wam owayeliNgqina likaYehova, wandikhuthaza ukuba ndifundisise iBhayibhile.”

UDennis wayichasa imigudu yomfazi wakhe. Noko ke, indlela awayeziphatha ngayo njengomKristu yamenza watshintsha isimo sakhe sengqondo esingafanelekanga. Ekugqibeleni uDennis waya kwintlanganiso yamaKristu nomfazi wakhe nabantwana. Emva koko, kwaqaliswa isifundo seBhayibhile naye yaye wenza inkqubela entle. Wayeka ukutshaya awayesele ekwenza kangangeminyaka engama-28 wayeka nokunxulumana nabahlobo ababesenza zonke izinto awayezama ukuziyeka. Enombulelo kuYehova, uDennis wathi: “Ubomi bentsapho yam baphucuka. Sasisiya kwiintlanganiso nasentsimini njengentsapho. Abantwana bam ababini bayeka ukundoyika, kuba ndafunda ukuwulawula umsindo wam ndaza ndayeka nokuthuka. Sasinokuncokola size sinandiphe iingxubusho zeBhayibhile. Ukuba ndandingafundisisanga iBhayibhile, ngendingekho apha namhlanje; ndandithanda ukulwa.”

Iintsapho zinokonwaba xa zizibhokoxa ekwenzeni ukuthanda kukaYehova. Amava abonisa ukuba enoba linye ilungu lentsapho elisebenzisa imigaqo yeBhayibhile, iimeko ziba bhetele kunaxa kungekho nelinye. Akulula ukwakha intsapho engamaKristu, kufuna ubuchule nexesha. Kodwa amalungu ezo ntsapho anentembelo yokuba uYehova uya kuwavuza kwimigudu yawo. Anokutsho amazwi afanayo nawomdumisi athi: “Uncedo lwam luvela kuYehova.”—INdumiso 121:2.

[Umbhalo osemazantsi]

[Amagama acatshulweyo akwiphepha 9]

UThixo “ebizwa ngaye yonke intsapho ezulwini nasemhlabeni.”—EFESE 3:15

[Ibhokisi ekwiphepha 8]

UYEHOVA ULIXABISA GQITHA ILUNGISELELO LENTSAPHO

“UThixo wabasikelela waza wathi kubo uThixo: ‘Qhamani, nande, niwuzalise umhlaba.’”—Genesis 1:28.

“Unoyolo wonk’ ubani omoyikayo uYehova . . . Umfazi wakho uya kuba njengomdiliya othwala isiqhamo kwezona nxalenye zingaphakathi zendlu yakho.”—INdumiso 128:1, 3.