Ukuba Nenkxalabo Ngokhuseleko

ABANYE basenokuba noloyiko xa behamba ngenqwelo-moya kumgama oziikhilomitha ezili-11 ukusuka emhlabeni. Oko kusenokubonakala kunxamnye nemithetho yemvelo. Njengoko kuye kwathatyathwa amanyathelo angakumbi ukuze kuqinisekiswe ukhuseleko lwabo bahamba ngenqwelo-moya, ziye zancipha iingozi zokuhamba ngenqwelo-moya. Noko ke, xa kusenzeka iingozi ezimanyumnyezi siye sikhumbule ukuba iingozi zinokwenzeka.

Ukuhlangabezana Noloyiko

Nangona besazi ukuba iingozi zinokwenzeka, kwamandulo phayaa abantu bebesoloko benomnqweno wokuhamba emoyeni. Kwiinkulungwane ezilishumi ngaphambi kokuzalwa kukaKristu, uKumkani uDavide wabhala wenjenje: “Owu akwaba bendinamaphiko njengehobe! Bendiya kuphaphazela ndimke.” (INdumiso 55:6) Njengoko sele kubonisiwe, ubugcisa bezi mini benze ukuhamba ngenqwelo-moya kwaba yenye yezona ndlela zikhuselekileyo zokuhamba. Sekunjalo, zisekho iingxaki. Akukho nto ingenangxaki zayo kulo mhlaba.

Kubalulekile ukuba sikukhumbule oku ngokukodwa ukuba sisoloko sinexhala xa into isenziwa ngomnye umntu. Abanye abantu basenokuqiqa ngelithi, ‘Ukuba bendiyenza ngokwam le nto, bendingayi koyika ngolu hlobo.’ Abantu abaqiqa ngolo hlobo basenokuba sengxakini xa kungekho nto ingako banokuyenza ngemeko ethile. Kuba njalo ke naxa kuhanjwa ngenqwelo-moya.

Nakuba kwenziwe imigudu yokuba abo bahamba ngenqwelo-moya bakhuseleke, oko akuthethi ukuba kumele kuyekelelwe umxakatho. Bonke abantu ababandakanyekileyo ekuhambeni ngenqwelo-moya banokusebenzisana ukuze kuncitshiswe iingozi. Sekunjalo, abasemagunyeni balumkisa abantu ngezisongelo ezithe gqolo. Umzekeliso weBhayibhile wobulumko uthi: “Onobuqili ubona intlekele isekude aze athabathe amanyathelo okuzikhusela.” (IMizekeliso 22:3, New Living Translation) Kububulumko ukuqonda ukuba ingozi inokubakho nakuyiphi na into. Ngoko ke, khumbula ukuba njengoko umele uzilumkele izinto eziyingozi kuzo zonke iimeko unokwenza okufanayo naxa uhamba ngenqwelo-moya.

Abantu abasoloko behamba ngenqwelo-moya bakwazi bhetele ukuzikhusela kula maxesha anzima. Oku kungenxa yokuba abantu abasoloko behamba ngenqwelo-moya baqhelene nale ndlela yokuhamba. Nawe unokuba njengabo ngokulandela amanyathelo alula achazwe kwiibhokisi ezikweli nqaku.

Ukungabi Naxhala Xa Uhamba Ngenqwelo-moya

Ngoxa kwiindawo ekuhlolwa kuzo imithwalo kusenziwa umsebenzi omhle, abanye abantu—ingakumbi abo bangxamileyo—badla ngokukugqala njengenkcitha-xesha oko. Njengoko ngoku ukhuseleko luluqilima ngakumbi kwizikhululo ezininzi zeenqwelo-moya, mhlawumbi ungathanda ukusebenzisa la macebiso alandelayo ukuze izinto zihambe lula:

◼ Fika kwangethuba. Ngokulungiselela ukuchitha ithuba elingakumbi kwisikhululo seenqwelo-moya, unokuba nethuba elaneleyo lokwenza yonke into ungangxamanga, uze uphephe ukudyuduzela xa izinto zinokungahambi kakuhle.

◼ Xa ukhetha inqwelo-moya oza kuhamba ngayo, khetha leyo isetyenziswa ngoosomashishini. Banamava, abaxhakazeli yimithwalo yaye bathanda izinto ezihamba ngokukhawuleza.

◼ Ngaphambi kokuba udlule kwindawo yokuhlola izinto eziyintsimbi, khupha nantoni na ocinga ukuba inokwenza i-alarm ikhale. Ezi zinto ziquka izitshixo, iingqekembe zemali, ijewelry necellular phone. Zigqithisele kumntu osebenza apho xa sele uza kudlula.

◼ Zibeke kakuhle iibhegi neminye imithwalo yakho kumabhanti ahambisa imithwalo; ukuba umntu ohlola imithwalo ubona umthwalo wakho ungapakishwanga kakuhle, usenokukucela ukuba uwuvule okanye uphinde uwudlulise ebhantini.

◼ Mxelele umlindi xa kukho into engaqhelekanga enokutsal’ ingqalelo yalowo uhlola imithwalo, njengesigingci owasiphiwa ngunyokokhulu. Ukuba wanelisekile yinkcazelo omnike yona, mhlawumbi akanakude afune ukuwuhlola umthwalo wakho kwakhona. Ukuba ungxame kakhulu, yikhuphe loo nto ingaqhelekanga kuselithuba uze ucele ukuba ihlolwe.

◼ Ukuba i-alarm iyakhala, sebenzisana nomlindi uze umchazele into ocinga ukuba yenza loo alarm ikhale. Ukuba umlindi uyazi ukuba ialarm ikhaliswa yintoni yaye kukho omnye umlindi asebenza naye onesixhobo sokuhlola imithwalo, uya kwenza umqondiso ukuze akudlulise.

◼ Ukwenza isiqhulo esifana nokuthi uze kuqweqwedisa inqwelo-moya okanye uphethe ibhombu kunokukwenza ushiywe yinqwelo-moya. Loo nto ayinakubangela nje ukuba ugocagocwe ngamagosa ezokhuseleko akwisikhululo seenqwelo-moya, kodwa usenokutyholwa ngokwaphul’ umthetho.

Uhambe Ngokukhuselekileyo!

Ngaba unako ukuhamba ngokukhuselekileyo ngenqwelo-moya? Ewe unako. Kungakhathaliseki ukuba ukhwele yiphi inqwelo-moya, maninzi amathuba okuba uhambe uye kufika kwindawo oya kuyo ukhuselekile. Ukuba unamathandabuzo, yenza uphando ngenqwelo-moya oceba ukuhamba ngayo. Khumbula ukuba nangona zibakho iingozi zeenqwelo-moya, ukuhamba ngenqwelo-moya kuseyeyona ndlela ikhuselekileyo yokuhamba.

Okwangoku, sonke sinokulindela ixesha laxa—uThixo eya kube elawula ihlabathi—kuya kube kukho uxolo nonqabiseko. Phakathi kwabantu aboyika uThixo, nabathanda uxolo, akuyi kubakho bantu babeka ubomi babanye esichengeni. Abantu ‘baya kuhlala ngonqabiseko bengankwantyiswa yintlekele.’—IMizekeliso 1:33.a

[Umbhalo osemazantsi]

[Ibhokisi/Umfanekiso okwiphepha 10, 11]

AMANYE AMACEBISO OKUZIKHUSELA

Khetha iinqwelo-moya ezingahambi zimisa. Iingozi ezininzi zenzeka xa inqwelo-moya induluka, inyuka, isihla okanye isima. Ukukhwela iinqwelo-moya ezingahambi zimisa kuyawanciphisa amathuba okwehlelwa yingozi.

Khetha iinqwelo-moya ezinkulu. Xa kusenziwa iinqwelo-moya ezikhwelisa abantu abangaphezu kwama-30 kudla ngokuqinisekiswa ukuba abantu baya kukhuseleka kuzo kunokuba kunjalo ngezo zincinane. Kwakhona, kwiingozi ezimanyumnyezi ezingafane zihle, kwiinqwelo-moya ezinkulu badla ngokusinda abantu.

Nikela ingqalelo kwimiyalelo edla ngokunikelwa ngaphambi kokunduluka kwenqwelo-moya. Nakuba kusenokubonakala ngathi kuphindaphindwa into enye, kusenokwenzeka ukuba iindawo zokuphuma xa kukho ingozi zahlukile kwinqwelo-moya nganye.

Musa ukufaka izinto ezinzima kwindawo yempahla esentla kwakho. Ukufaka umthwalo onzima kwindawo yempahla esentla kwakho kusenokubangela ingxaki xa kukho umoya omkhulu, ngoko ukuba umthwalo wakho unzima wuse kwindawo yokuhlola imithwalo kwangaphambili.

Zibophe ngebhanti. Ukuzibopha ngebhanti xa ukwinqwelo-moya kunokukunceda xa kuvela ingozi ngequbuliso.

Phulaphula imiyalelo yabo basebenza kwinqwelo-moya. Esona sizathu sokuba kubekho abasebenzi kwinqwelo-moya lukhuseleko, ngoko ukuba omnye wabo ucela ukuba wenze into ethile, qala ngokwenza loo nto uze ke ugqibele ngokubuza imibuzo.

Musa ukuphatha nantoni na eyingozi. Kukho uludwe lwezinto eziyingozi ezingavumelekanga, kodwa nawe unokuzicingela ukuba akumele uphathe ipetroli, izinto ezineasidi, iigesi ezinetyhefu nezinye izinto ezifana nezo kwinqwelo-moya ngaphandle kokuba kuvumelekile ukuziphatha yaye zifakwe kwinto efanelekileyo.

Ungaseli ngokugqithiseleyo. Utywala buba nempembelelo kakhulu xa uphezulu emoyeni kunaxa usemhlabeni. Ukusela ngobungcathu kubalulekile enoba uphi na.

Hlala uphaphile. Nakuba oko kungafane kwenzeke, xa kufuneka kuphunywe ngokungxamisekileyo, thobela ulwalathiso lwabo basebenza kwinqwelo-moya uze uphume ngokukhawuleza kangangoko kunokwenzeka.

[Inkcazelo]

Umthombo: AirSafe.com

[Ibhokisi/Umfanekiso okwiphepha 12]

NCEDA INTSAPHO YAKHO INGAXHALABI NGOKUGQITHISELEYO

Ukuba uza kuhamba, nanga amacebiso ngendlela onokunceda ngayo intsapho yakho ingaxhalabi ngokugqithiseleyo.

Thetha namalungu entsapho yakho. Ngaphambi kokuba uthabathe uhambo, chitha ixesha uxubusha nabo ubathandayo ngendlela oza kube ukhuseleke ngayo. Bacacisele ngemiqathango yokhuseleko emitsha uze ubachazele ngeengenelo zayo.

Wavumele azityand’ igila ngezinto eziwaxhalabisayo. Vumela amalungu entsapho yakho aphalaz’ imbilini ngezinto eziwaxhalabisayo. Ayakuthanda ngoko ekuphela kwento ayifunayo kukuba ukhuseleke. Phulaphula ngenyameko ungagxeki, uzithabathe nzulu zonke izinto eziwoyikisayo neziwaxhalabisayo.

Thetha nawo ngokunyanisekileyo. Wachazele ngamaziko ahlukahlukeneyo azabalazela ukuthintela uhlaselo lwabanqolobi. Imigudu eyenziwa ngala maziko iquka ukhuseleko oluluqilima kwizikhululo zeenqwelo-moya nangaphakathi kwiinqwelo-moya. Akunakufane kwenzeke ngozi xa ukwinqwelo-moya.

Qhagamshelana nawo rhoqo. Wathembise ukuba uza kuwatsalel’ umnxeba wakufika apho uya khona. Tsalela umnxeba rhoqo ekhaya xa ungekho. Kubalulekile ukuba intsapho ikwazi ukuqhagamshelana nawe xa kuvela ingozi.

[Inkcazelo]

Athatyathwe kwiUnited Behavioral Health Web site

[Imifanekiso ekwiphepha 10]

Sebenzisana namagosa ahlola imithwalo