Indlela Eyaqala Ngayo Imbambano
IDOLOPHANA YASESTRATTON, EOHIO, EU.S.A. yidolophana encinane ekufuphi neOhio River, umlambo owahlula iOhio kwiWest Virginia. Le dolophana inosodolophu wayo. Kule ndawo inabahlali abangaphantsana nje kwama-300 kwavuka imbambano ngowe-1999 xa abasemagunyeni balapho bazama ukunyanzela abantu abathile, ekwakukho amaNgqina kaYehova phakathi kwabo, ukuba xa betyelela abantu basekuhlaleni kumakhaya abo ngesigidimi sabo esisekelwe eBhayibhileni bafumane imvume emthethweni.
Kutheni le mbambano ibalulekile nje? Njengoko ufunda le ngxelo, uya kubona ukuba eneneni lo mthetho wawungayi kuchaphazela inkululeko yokuthetha yamaNgqina kaYehova kuphela kodwa wawuya kuchaphazela bonke abantu baseUnited States.
Indlela Eyaqala Ngayo Le Ngxwabangxwaba
Kangangeminyaka, abahlali baseStratton babetyelelwa ngabalungiseleli beBandla lamaNgqina kaYehova laseWellsville, yaye ukususela ngowe-1979 aba balungiseleli babesoloko bekhathazwa ngabasemagunyeni abathile ngokuphathelele ubulungiseleli babo bendlu ngendlu. Ngasekuqaleni kweminyaka yee-1990, elinye ipolisa lalapho lagxotha iqela lamaNgqina kuloo dolophu, lisithi: “Andinaxesha lamalungelo enu.”
Le meko yafikelela kuvutho-ndaba ngowe-1998 xa usodolophu waseStratton wadibana namaNgqina kaYehova amane. Ayephuma kuloo dolophana emva kokuba ethethe nabahlali balapho ababebonakalise umdla ekuxubusheni ngeBhayibhile. Ngokutsho kwelinye laloo mabhinqa adibana nosodolophu, lo sodolophu wathi ukuba babengamadoda wayeza kubavalela entolongweni.
Le ngxwabangxwaba yavuswa ngumthetho waloo dolophana ophathelele “Ukuya Emakhayeni Abantu Ngaphandle Kwemvume Ngenjongo Yokuthengisa Nokungqiba,” owawunyanzelisa ukuba nabani na ofuna ukubandakanyeka kumsebenzi wendlu ngendlu afumane imvume yokwenjenjalo kusodolophu ngaphandle kwentlawulo. AmaNgqina kaYehova awugqala lo mthetho njengophazamisana nenkululeko yawo yokuthetha, eyonqulo neyokusasazwa kweendaba. Ngenxa yoko, afaka isimangalo enkundleni emva kokuba abasemagunyeni baloo dolophana bengavumanga ukwenza uhlengahlengiso kulo mthetho.
NgoJulayi 27, 1999, eli tyala lathethwa phambi kwejaji yenkundla yesithili yaseUnited States, eSouthern District of Ohio. Yawuxhasa umthetho omiselwe yiloo dolophana ngelithi usekelwe kumgaqo-siseko. Emva koko, ngoFebruwari 20, 2001 neNkundla yesiBheno yaseUnited States emela iZiphaluka Ezithandathu yavumelana nalo mthetho ngelithi usekelwe kumgaqo-siseko.
Ukuze le mbambano izinziswe, iWatchtower Bible and Tract Society of New York neBandla lamaNgqina kaYehova laseWellsville yacela iNkundla Ephakamileyo yaseUnited States ukuba ilihlole kwakhona eli tyala.
[Imaphu/Umfanekiso okwiphepha 3]
(Ukuba ufuna inkcazelo ehlahlelwe kakuhle, yiya kwimpapasho)
Los Angeles
New York
OHIO
Stratton