‘Ulwaphulo-mthetho Lwenkohlakalo’
UMARIAa waba ngunongogo xa wayeneminyaka eli-14 ubudala. Waqala ukuphila obu bomi bumasikizi emva kokunyanzelwa ngunina owamxelela ukuba mhle yaye uza kuthandwa gqitha ngamadoda. Ngapha koko, wayeza kwamkela imali eninzi. Ngokuhlwa, unina wayedla ngokumsa kwihotele ethile apho babedibana khona namadoda. Unina wayelinda kufuphi ukuze afumane intlawulo. Busuku ngabunye, uMaria wayesiba neentlobano zesini namadoda amathathu okanye amane.
Kufuphi nakuloMaria, uCarina oneminyaka eli-13 ubudala naye wanyanzelwa ukuba abe ngunongogo. Njengezinye iintsapho ezininzi ezazihlala kuloo ndawo ihlala abantu abasebenza kumasimi ommoba, intsapho yakuloCarina, yamthengisa ukuba abe ngunongogo ukuze ifumane imali yokongezelela kuleyo incinane iyifumanayo. Ukanti kwenye indawo, uEstela wayeka isikolo esemncinane, engekakwazi nokufunda nokubhala, waza waba ngunongogo. Yena uDaisy wayemalunga neminyaka emithandathu ubudala xa waqala ukuxhatshazwa ngokwesini ngomnye umntakwabo—yaye emva koko zaba zininzi izihlandlo awanyazelwa ngazo ukuba enze umbulo. Waba ngunongogo xa wayeneminyaka eli-14 ubudala.
Kwiindawo ezininzi ehlabathini, ingxaki yokwenziwa kwabantwana oonongogo ixhomis’ amehlo. Imiphumo yayo ibuhlungu ngeyona ndlela. Abantwana abangoonongogo, enoba bakwenza oko ngamathub’ athile okanye bakwenza rhoqo, badla ngokubandakanyeka kulwaphulo-mthetho nasekusebenziseni kakubi iziyobisi. Uninzi lwabo ludimazekile yaye luziva lungento yanto, luzibona lungenayo indlela yokwahlukana nobu bomi budandathekisayo.
Abantu abanempembelelo eluntwini bayayibona imiphumo ebuhlungu yokwenziwa kwabantwana oonongogo. Owayesakuba nguMongameli waseBrazil uFernando Henrique Cardoso wayenyanisile xa esithi: “Ukwenziwa kwabantwana oonongogo lulwaphulo-mthetho lwenkohlakalo.” Iphephandaba laseBrazil lapapasha la mazwi athuthuzelayo ngokuphathelele ukwenziwa kwabantwana oonongogo: “Abantu abahlala kumazwe apho ukwenziwa kwabantwana oonongogo kuyinto eqhelekileyo, eyamkelekileyo nekhuthazwayo ngenxa [yemali], bayayibona imiphumo ebuhlungu yolu qheliselo. Iingxaki ezibangelwa lolu qheliselo zibangela ukuba oonongogo, iintsapho zabo nabantu ngokubanzi bangayiboni naloo ngeniso yemali.”
Kodwa, nakuba kusenziwa imigudu yokulwa nomkhwa wokwenziwa kwabantwana oonongogo, le ngxaki iyanda. Yintoni ebangela ukuba le ngxaki imanyumnyezi ngolu hlobo yande? Yintoni ebangela ukuba abantu abaninzi bakugqale njengento eyamkelekileyo oku bade bakukhuthaze?
[Umbhalo osemazantsi]
a Kolu ungcelele lwamanqaku, kusetyenziswe amagama angengawo.
[Amagama acatshulweyo akwiphepha 3]
“Ukwenziwa kwabantwana oonongogo lulwaphulo-mthetho lwenkohlakalo.”—OWAYESAKUBA NGUMONGAMELI WASEBRAZIL UFERNANDO HENRIQUE CARDOSO
[Amagama acatshulweyo akwiphepha 4]
“Kungakhathaliseki ukuba umntu mdala kangakanani, yindoda okanye libhinqa, ngowaluphi uhlanga, isizwe, okanye udidi, ukuxhatshazwa ngokwesini kwenza ukuba abantu bazive bephelelwe sisidima yaye akuvumelani nemithetho esisiseko yamalungelo abantu.”—IUNESCO SOURCES