Khawukhangele Le Mvubu Yomeleleyo!

NGUMBHALI KAVUKANI! EKENYA

XA ILANGA lisithi ndithenge, lidla ngokuthi qhashi kwichibi elikhulu elikuMzi Wezilwanyana oyiMasai Mara eKenya. Njengoko lisithela elundini phayaa, amanzi akhazimla njengegolide. Kude kufuphi nalapho imihlambi yamaqwarhashe neenqu ithe chu kuhle ukusinga ngakwelo qula. Ngequbuliso, le mihlambi ithi xum njengoko ithe nzo kwinto ebonakala ngathi sisiqobo esikhulu edada ngasekupheleni kwelo chibi. Emva kokuba sikhe sathi ukuwashukumisa kanobom amanzi, esi “siqobo” siyantywila singabonakali. Kuthe kanti esi siqobo sikweli chibi sisilo esikhohlakeleyo samanzi—imvubu.

Imvubu efumaneka kumachibi nakwimilambo yasempuma Afrika, yodlulwa yindlovu kuphela ngobukhulu. Xa ikhule yagqiba, imvubu ingafikelela kubude obungaphezu kweemitha ezi-4 nomphakamo oziimitha ezili-1,5. Inganobunzima obuziitoni ezine. Igama elithi “Bhehemote” elisetyenziswe kwincwadi yeBhayibhile kaYobhi, ngokuqhelekileyo ligqalwa njengelibhekisela kwimvubu. Ayothusi into yokuba iBhayibhile ibhekisele kweli rhamncwa lomeleleyo njengelinamathambo afana ‘nemibhobho yobhedu,’ iwathelekisa ‘nemivalo yentsimbi.’—Yobhi 40:15-18.

Njengoko inofele olulushica, ingenaboya, yaye ikhangeleka ixazalala, imvubu emile okwefatyi ayikho ntle tu kwaphela. Imilenze yayo izizijungqana, kangangokuba ungade uzibuze ukuba ilithwala njani ibhadlu-bhadlu lomzimba ongako. Kodwa ulumke ungayijongi ngezo zijungqana zemilenze. Kaloku xa ibaleka emhlabeni ingamshiy’ ancame umntu. Kanti emanzini inokulishiy’ ingaliboni iphenyane elibheqwayo, nditsho nesikhitshane.

Indlela Ephila Ngayo Emanzini

Iimvubu ziyathanda ukuba sisiqhu, zidla ngokuba li-10 ukuya kwi-15 zihambe nenkunzi enye, kodwa maxa wambi zikhe ziye kufikelela nakwi-150. Nangona zihlala emanzini, zikhe ziwashiye amanzi—ingakumbi ebusuku—ukuze zitye uhlaza olukufutshane nawo. Ngokuqhelekileyo azithandi kuba kude kakhulu namanzi. Noko ke, xa libalele ezinye iimvubu ziye zihambe kangangeekhilomitha ezilishumi, zikhangela ukutya.

Noko ke, ayikacaci indlela iimvubu eziyiphawula ngayo imimandla yazo. Abanye bacingela ukuba lo mhlola zidla ngokuwenza wokusasaza ubulongwe bazo ngomsila, yindlela yokutsala ingqalelo yeemazi okanye yokugxotha utshaba. Xa zihlaselwa zitsho ngesikhalo sehashe zize ke zigqume xa zisilwa. Uya kuziva ke zifuthela phezulu nakuba zingaphantsi kwamanzi. Inkunzi ekhokelayo uyibona ngokubhonga.

Imvubu iyakwazi ukuhlala imini yonke ithe gabhu okanye ingaphantsi kwamanzi, yaye umzimba wayo omkhulu uyayivumela yonke loo nto. Nangona ingeyondadi iphum’ izandla njengezinye izilwanyana eziphila emhlabeni nasemanzini, imvubu inokuntywila ngaphantsi kwamanzi kangangemizuzu eli-15! Amathatha, amehlo, neendlebe zayo zakhelwe phezulu, nto leyo eyenza kube lula ukuba esi silwanyana sikwazi ukufihla umzimba waso ngaphantsi kwamanzi. Ininzi into eyenziwa zezi mvubu phantsi kwamanzi—kuquka ukuthandana nokukhwelana.

Emva kokukhulelwa kangangeenyanga ezisibhozo, izala ithole elinye kwisidibi samanzi. Incancisela emhlabeni okanye kumanzi anokuma emaqatheni. Yomelele injalo, imvubu ayidlali ngethole layo, ingakumangalisa ngendlela elinyamekela ngayo. Ngenene, ukubukela imazi yemvubu idada ibeleke ithole layo ngumbono ongenakuze ufune ukuyeka ukuwubukela. Kambe ke, lo mdlezana ubonakala eyimvoco angalwel’ ukufa ukuba nje ungazama ukuchukumisa olo sana lusemqolo!

Ufele lwemvubu lwenzelwe kanye ukuhlala emanzini. Esi silwanyana sitshintsha ngokupheleleyo sakuphuma emanzini sithi cakatha emhlabeni. Amadlala angaphantsi kofele lwaso akhupha ulwelo olumdaka ngebala nolunetyuwa eninzi. Xa usijongele kude, esi silwanyana ungabona ngathi siyopha. Noko ke, olu lwelo lukhusela ufele lwaso emanzini nasemhlabeni. Phambili phayaa kwelaseAfrika, ufele lwemvubu belusakusikwa lube yimicu luze lufakwe kwioli. Ibisithi ke le micu ijijwe ize yomiswe kuze kulukwe isabhokhwe ebesisetyenziswa xa kusiliwa ngomhlaba.a IGrzimek’s Animal Life Encyclopedia ithi, emva kokuba lusukiwe—nto leyo ethabatha ubuncinane iminyaka emithandathu—ufele lwemvubu “luqina lube lilitye yaye luba ngqingqisholo kangangeesentimitha ezine ezinesiqingatha.”

Ungayithanda Xa Ikhama Kodwa Iphinda Yoyikise

Eyona nto ibangel’ umdla kwimvubu ngumlomo wayo. Xa sisitya kufutshane namanzi, esi silwanyana sisebenzisa imilebe yaso engangesiqingatha semitha ububanzi. Kodwa lo mlomo asingowokutya nje kuphela. Xa imvubu ivule imihlathi yayo kangangeedegrees ezili-150 ayisakhami nje kuphela, kodwa idla ngokuba sel’ ifuthekile ngumsindo. Xa sele ikhusela ummandla wayo, ongasekho mkhulu kangako, ilwa kuqhum’ uthuli. Ithi yakuvula loo mlomo wayo, kuthi gqi amagqajolo amabamba angezantsi. La mabamba ayo anokuba made kangangeesentimitha ezingama-30.

Lo mlomo wemvubu awuyongozi kwezinye iimvubu nje kuphela, kodwa uyingozi nasebantwini. Imizamo yabantu yokuhlala ngoxolo kunye neemvubu iye yawa phantsi. Esi silwanyana singakuhlasela nokuba akusenzanga nto, ukuba nje udlalela kufuphi nommandla waso. Ngaphezu koko, ukuba yenzakele, imvubu iba nongathethekiyo umsindo yaye ingamdlakaza nabani na onokusondela kuyo. Kwezinye iimeko, xa inomsindo imvubu ide iphequle namaphenyane ngemihlathi yayo emikhulu.

Isemhlabeni, isemanzini, imvubu iba ndlongondlongo ngendlela efanayo. Ngokomzekelo, ungazibeka kwembi ingozi ukuba ungema phakathi kwendawo etya kuyo namanzi. Kaloku, kwamanye amazwe aseAfrika, abahlali basezilalini abangacingelanga nto baye bahlaselwa ziimvubu ezibona ngathi bavale indlela yazo ebuyela emanzini. Esi silwanyana sisongela abantu namanye amarhamncwa sifanele silunyukelwe.

Ngaba Imvubu Iza Kuqhubeka Ikho?

Imvubu ehamba yodwa, iba sesichengeni sokuhlaselwa ziingonyama xa isitya emhlabeni. Kodwa ke, kubonakala ngathi olona tshaba lwayo ngumntu. IWorld Book Encyclopedia ithi: “Iimvubu ezininzi zigqitywe ngabantu baza baphungula nommandla wazo. Abazingeli baye babulala intw’ eninzi kuzo, kanti bona abalimi baye bacand’ amasimi kwiindawo ezininzi ezakha zayimimandla yeemvubu.”

Ewe, ukungena kwabantu kwimimandla yeemvubu kuye kwasiphang’ umhlaba esi silwanyana, nto leyo esenza singakwazi ukwanda. Kuluvuyo ukwazi ukuba, xa sele kulawula uBukumkani bukaThixo, uMdali uthembisa ukuba abantu nezilwanyana baya kuhlala kakuhle, yaye akusayi kubakho mntu uya ‘kuzenzakalisa okanye enze umonakalo’ kwiParadesi ebuyiselweyo emhlabeni.—Isaya 11:9.

[Umbhalo osemazantsi]

[Inkcazelo Ngomfanekiso okwiphepha 25]

Elizabeth DeLaney/Index Stock Photography