Ngaba Iya Kuze Ilunge Le Ngxaki?
NAMHLANJE iWorld Health Organization neminye imibutho yenza amatiletile okuthintela ukwanda kwezifo. Imibutho eyahlukahlukeneyo isasaza inkcazelo ephathelele izifo ezithile yaye ixhasa uphando ngamayeza neendlela ezintsha zokunyanga ezi zifo, yaye konke oku kwenziwa ngenjongo yokulwa nokwanda kwezifo ezisasazwa zizinambuzane. Nabantu banokuzama ukuba nolwazi baze bazikhusele kwizifo. Sekunjalo, ukukhusela abantu kwizifo akufani nokuphelisa izifo emhlabeni wonke.
Iingcali ezininzi zikholelwa ukuba abantu bafanele babambisane baze bathembane ukuze bakwazi ukulwa ngempumelelo nezifo. Kwincwadi yakhe ethi The Coming Plague—Newly Emerging Diseases in a World out of Balance, uLaurie Garrett, oyintatheli eyaphumelela iBhaso likaPulitzer uthi: “Ngenxa yokudityaniswa kwehlabathi okwenzeka ngokukhawuleza, abantu kufuneka bazi ukuba izinto ezenzeka kwezinye iindawo ehlabathini zinokwenzeka kubamelwane, kumaphondo nakumazwe abo. Akukho mida yenziwe ngabantu enokuthintela iintsholongwane nezinambuzane ezisasaza izifo zingangeni kwamanye amazwe.” Isifo esigqugqisa kwelinye ilizwe, sixhalabisa kungekuphela nje amazwe aselumelwaneni, kodwa nawo onke amazwe ehlabathi.
Abanye oorhulumente nemibutho ethile bamadolw’ anzima ukwamkela uncedo—kwanoncedo lokulwa nezifo—oluvela kwamanye amazwe. Ngapha koko, ukungabi nalwazi kwabezobupolitika nokuba ngoongxow’ ayizali koosomashishini kubangela ukuba imizamo yokulwa nezifo eyenziwa ehlabathini lonke ingabi nampumelelo. Ngaba kwiphulo lomntu lokulwa nezifo, kuza kuphumelela iintsholongwane? Umbhali uEugene Linden ocinga ukuba ziza kuphumelela uthi: “Ixesha lixhatshwe yinja.”
Isizathu Sokuba Nethemba
Inzululwazi nezobugcisa azikwazi ukumelana nokwanda kwezifo. Kakade ke zininzi izinto eziyibeka emngciphekweni impilo yabantu ngaphandle nje kwale yezifo ezisasazwa zizinambuzane. Kodwa sikho isizathu sokuba nethemba. Nangona izazinzulu zisandul’ ukuyiqonda intsebenziswano ekhoyo phakathi kwezinto eziphilayo, ziyazi ukuba indalo iyakwazi ukuphinda izilungelelanise ngokwayo izinto. Isijikelezi langa sethu sidalwe ngohlobo lokuba sikwazi ukulungisa umonakalo owenzeka kwindalo. Ngokomzekelo, amahlathi aphinda akhule nokuba ebegawulwe aphela, yaye iintsholongwane, izinambuzane nezilwanyana ziyakwazi ukusebenzisana yaye ekuhambeni kwexesha ziphinda zilungelelane izinto.
Okubaluleke ngakumbi kukuba, ukuntsonkotha kwendalo kubonisa ukuba kukho uMdali, uThixo awadala zonke izinto ezisemhlabeni. Nezazinzulu ezininzi ziyavuma ukuba kukho uthile onobulumko owadala izinto ezisemhlabeni. Ewe, abantu abasebenzisa ingqondo abanakukwazi ukubukhanyela ubukho bukaThixo. IBhayibhile ithi uMdali, uYehova uThixo unamandla yaye unothando. Ufuna ukuba sonwabe.
Kwakhona iBhayibhile ithi ngenxa yokona ngabom kwabantu bokuqala, abantu bazalwa bengafezekanga, bayagula yaye bayafa. Ngaba oku kuthetha ukuba abantu baya kubandezeleka ngonaphakade? Akunjalo! Injongo kaThixo kukwenza lo mhlaba ube yiparadesi, apho abantu baya kuhlala ngokukhululekileyo nezinye izidalwa. IBhayibhile ithetha ngehlabathi apho zonke izidalwa, enoba ngamarhamncwa amakhulu okanye izinambuzane ezincinane zingayi kuba yingozi ebantwini.—Isaya 11:6-9.
Kakade ke, kuza kufuneka ukuba abantu baqinisekise ukuba izinto zihamba ngendlela—kwibutho labantu nakwindalo. UThixo wayalela umntu ukuba ‘anyamekele’ umhlaba. (Genesis 2:15) Kwiparadesi ezayo, abantu baya kuyiphumeza ngokupheleleyo loo mbopheleleko ngokuthobela ulwalathiso loMdali. Ngoko sinokukhangela phambili kwixesha apho ‘kungayi kubakho mmi uthi: “Ndiyagula.”’—Isaya 33:24.