Isizathu Sokuba Imilinganiselo Yokuphila Itshintshe
“Yiyiphi eyona nto ibalulekileyo ebomini?”
Lo mbuzo wabuzwa kubantu abangama-50 000 abavela kumazwe angama-60. Abaphandi bakaGallup bathi eyona mpendulo yayixhaphakile phantse kuzo zonke iinxalenye zomhlaba yayisithi “kukuba nentsapho eyonwabileyo” nokuba “sempilweni.”
XA UWUKHA nje phezulu lo mba, kusenokubonakala ngathi ehlabathini lonke abantu banemilinganiselo ephakamileyo yokuphila. Kanti akunjalo. Mandulo, imilinganiselo yabantu yayisekelwe kwisithethe, kunqulo nakwimigaqo yokuziphatha. Noko ke, izinto ziguquka ngokukhawuleza. Xa ethetha ngelizwe laseItali, uMarisa Ferrari Occhionero ongumphandi uthi: “Abantu abaselula banemilinganiselo yabo yaye abayifumananga kubazali, kwisithethe nakunqulo.” Oku kunjalo—kubantu abaselula nabadala—ehlabathini lonke.
UNjingalwazi Ronald Inglehart ongumalathisi kwiphulo lophando elibizwa ngokuba yiWorld Values Survey, uthi: “Intaphane yobungqina esinabo ibonisa ukuba kukho utshintsho oluphawulekayo kwimilinganiselo yokuphila.” Yintoni unobangela wolu tshintsho? Lo kaInglehart uthi: “Olu tshintsho lubangelwa yinguqu ekhoyo kwezoqoqosho nakwezobugcisa.”
Ngokomzekelo, uphando lukaGallup lwabhenca ukuba kumazwe afumileyo ukuqeshwa “akugqalwa njengento ebalulekileyo” ebomini. Kodwa kumazwe asakhasayo, ukufumana umsebenzi wengqesho kugqalwa njengeyona nto ibalulekileyo! Ewe, xa abantu bengamahlwempu, eyona nto ibalulekileyo yindlela yokuziphilisa. Njengoko amazwe eya ehambela phambili kwezoqoqosho, abantu banikel’ ingqalelo kwizinto ezifana nempilo, ulonwabo lwentsapho nokufuna ukuba nguthile.
Ngenxa yenkqubela kwezobugcisa, le milinganiselo mitsha iza kubachaphazela nabantu abahlala kumazwe asakhasayo. Iphephancwadi elithi The Futurist lithi: “Iinkolelo nemilinganiselo esinayo iphenjelelwa koko sikubonayo noko sikuvayo.” Ngaloo ndlela, amajelo amakhulu eendaba aye anegalelo kakhulu ekutshintsheni kwemilinganiselo yokuphila kumazwe aseNtshona. IThe Futurist ithi: “La majelo eendaba aphembelela ihlabathi liphela.”
Ngoko, luluphi utshintsho olukhoyo kwisimo sengqondo nasekuziphatheni? Oku kutshintsha kwemilinganiselo yokuphila kukuchaphazela njani wena nentsapho yakho?