Ukutshintsha Kwemilinganiselo Yokuphila—Ngaba Uyayibona Ilahleko Ebangelwa Koko?

“YIYIPHI eyona ngxaki elijamelene nayo eli lizwe?” Kubantu abaninzi baseUnited States ababuzwa lo mbuzo kwaphawuleka ukuba eyona nto bayixhalabele kakhulu kukuqhekeka kweentsapho nokuwohloka kwemilinganiselo yokuziphatha. Asingabo kuphela abavakalelwa ngale ndlela.

Ngokomzekelo, i-International Herald Tribune yaseParis yathi: “Abantu, ngokukodwa ulutsha, balangazelela, ukuba kwixesha elizayo kubekho imigaqo enokusetyenziswa ukuze kuliwe nokubawa, ukuzingca, ukungabikho komanyano nto ezo zibonakala zixhaphakile ehlabathini. . . . Isibakala sokuba emhlabeni wonke abantu beyibona imfuneko yokuba kubekho imilinganiselo yokuziphatha emele ilandelwe, bubungqina bokuba kukho nto ithile isilelayo.”

Ngaba uvakalelwa kukuba oorhulumente neenkokeli zehlabathi, kuquka oosomashishini, banayo imilinganiselo yokuziphatha enokusikhokelela kwikamva elonwabisayo, elikhuselekileyo nelinqabisekileyo? Ngaba uvakalelwa kukuba kukho nto ithile isilelayo, ukusa kumlinganiselo othile, ngenxa yokutshintsha okubonayo kwimilinganiselo yokuziphatha?

Enye into exhalabisa kakhulu lukhuseleko lwakho siqu. Ngaba kwindawo ohlala kuyo ungakwazi ukushiya indlu yakho ingatshixwanga? Ngaba uziva unqabisekile xa uhamba-hamba ebusuku kwizitrato ezikwindawo ohlala kuyo? Ukuba unethamsanqa lokuhlala kwindawo ekungaliwayo kuyo, engenazidubedube zobuhlanga, okanye ukubulalana kwamaqela emigulukudu, kusenokwenzeka ukuba woyika ukuhlaselwa zizikrelemnqa, izaphuli-mthetho, ukuhlaselwa ekhayeni lakho ngabaphangi, okanye amasela. Ngokucacileyo, oku kunokubangela unxunguphalo noloyiko.

Ukongezelela, kusenokwenzeka ukuba uye waphelelwa—ukusa kumlinganiselo othile—yintembelo obunayo kubantu abathile. Ngenxa yamava oye wanawo, mhlawumbi emsebenzini nakubomi bakho, kusenokwenzeka ukuba uye waphawula ukuba ngandlel’ ithile abantu bayakuxhaphaza xa befuna ukuphumeza eyabo iminqweno, enoba baza kufumana iingenelo nje ezingephi.

Kufuneka Urhulumente Abe Ngumzekelo

Ukutyhubela imbali, kuye kwakho unxibelelwano phakathi kwemilinganiselo esetyenziswa ngabantu ngabanye naleyo isetyenziswa ngurhulumente. UCalvin Coolidge lowo kamva waba ngumongameli waseUnited States wathi: “Abantu bathi banamalungelo emvelo, kodwa ndifuna kubekho umntu oza kundixelela ngelungelo lemvelo elingagunyaziswanga okanye elingakhuselwanga luludwe lwemithetho emiselwe ngurhulumente.”

Ekugqibeleni, ngurhulumente olawulayo—kungakhathaliseki ukuba umiselwe njani—onokuxhasa okanye athintele amalungelo afana nenkululeko yokusasaza iindaba, inkululeko yokuhlanganisana, inkululeko yonqulo nenkululeko yokuthetha esidlangalaleni, unokukukhusela ekubanjweni ngokungekho mthethweni okanye ekuhlaselweni yaye unokufak’ isandla ekuthethweni kwetyala lakho ngokusesikweni.

UAbraham Lincoln, lowo kamva waba ngumongameli waseUnited States, wakha wathi: “Injongo karhulumente kukwenzela abantu nantoni na abayifunayo, abangakwaziyo ukuzenzela yona okanye abangenabuchule bakuyenza.” Xa oorhulumente bezabalazela ukuziphumeza ezo njongo, abantu baba nentembelo kwabo basemagunyeni.

Noko ke, namhlanje kubonakala ngathi endaweni yokuba abantu babe naloo ntembelo, banamathandabuzo yaye ababathembi abasemagunyeni. Ngokutsho kolunye uhlolisiso olusandul’ ukwenziwa eUnited States, abangama-68 ekhulwini kwabo kwathethwa nabo, bathi imilinganiselo yamagosa karhulumente iphantsi okanye ayifanelekanga. Kumazwe amaninzi abantu baye bothuka kakhulu zizigigaba zokunyoba nobuqhetseba obenziwa ngamagosa karhulumente. Yaye oku kuye kwabangela ilahleko kubantu abaninzi.

Umzekelo Omhle KaKumkani USolomon

Omnye umzekelo wamandulo ubonisa indlela enokuba nempembelelo ngayo imilinganiselo esetyenziswa ngabalawuli. UKumkani uSolomon wayelawula izizwe ezili-12 zakwaSirayeli ukususela ngowe-1037 ukusa kowama-998 B.C.E. Uyise, uKumkani uDavide wayengomnye wookumkani bakwaSirayeli ababebalasele. IBhayibhile ithi uDavide wayethanda inyaniso nobulungisa yaye ngaphezu koko ithi wayekholose yaye ethembele ngokupheleleyo ngoThixo wakhe uYehova. UDavide wafundisa uSolomon imilinganiselo efanayo.

USomandla uThixo wabonakala kuSolomon ephupheni waza wathi kuye: “Cela! Ndingakupha ntoni na?” (2 Kronike 1:7) Kunokuba acele ubutyebi, uzuko, okanye impumelelo kwezobupolitika, yabonakala imilinganiselo uSolomon awayenoxabiso ngayo, ngokucela intliziyo enobulumko, enokuqonda nethobekileyo ukuze aphumelele njengokumkani wohlanga lwakwaSirayeli.

Lwabachaphazela njani abantu ulawulo lukaSolomon? UThixo wamsikelela wamnika ubulumko, uzuko nobutyebi—logama nje wayebambelele kwimilinganiselo yokomoya yolo hlanga. Ubungqina obufunyenwe ngabembi bezinto zakudala bubonisa ukuba ngexesha lokulawula kwakhe, uSolomon wayenentabalala yezinto eziphathekayo. Incwadi ethi The Archaeology of the Land of Israel ithi: “Ubutyebi basebhotwe obabuvela nxa zonke nempumelelo kwezorhwebo . . . yabangela ukuba kubekho iinguqulelo eziphawulekayo kulo lonke elo.”

Ewe, ukulawula kukaSolomon ngendlela efanelekileyo kwabangela ukuba abalawulwa bakhe babe seluxolweni, banqabiseke yaye bonwabe. “UYuda noSirayeli baqhubeka behleli ngonqabiseko, wonk’ ubani phantsi komdiliya wakhe naphantsi komkhiwane wakhe, ukusuka kwaDan kuse eBher-shebha, yonke imihla kaSolomon.”—1 Kumkani 4:20, 25.

Umzekelo Ombi KaKumkani USolomon

Noko ke okubuhlungu kukuba, ngokufanayo neenkokeli ezininzi zanamhlanje, ekugqibeleni imilinganiselo kaSolomon yatshintsha. Ingxelo yeBhayibhile ifundeka ngolu hlobo: “Waba nabafazi abangamakhulu asixhenxe, amakhosazana, namashweshwe angamakhulu amathathu; kwaye abafazi bakhe bayityekisa intliziyo yakhe. Kwathi ngexesha lokuba mdala kukaSolomon abafazi bakhe bayenza intliziyo yakhe yatyekela ekulandeleni abanye oothixo; kwaye intliziyo yakhe ayizange iphelele kuYehova uThixo wakhe njengentliziyo kaDavide uyise.”—1 Kumkani 11:3, 4.

Ukutshintsha kwemilinganiselo kaKumkani uSolomon kwabachaphazela njani abantu? Nangona wayenobuchule nobulumko obuninzi, ngasekupheleni kolawulo lwakhe uSolomon waqalisa ukulawula ngegqudu. Iindleko ezinkulu ezazisenziwa ngurhulumente wakhe zabangela ukuba elo lizwe libe nelahleko eninzi kwezoqoqosho. Kwabakho ukunganeliseki kubasebenzi. Eminye imibutho yezobupolitika yayisukuzana nokumkani yaye yazama indlela yokumbhukuqa. Olo hlanga lwaba ziintlaba-zahlukane. Into emangalisayo kukuba uSolomon wabhala la mazwi: “Xa esiba maninzi amalungisa, abantu baba nemihlali; kodwa xa kulawula ongendawo, abantu bayancwina.”—IMizekeliso 29:2.

Kungekudala emva kokufa kukaSolomon, ngenxa yezidubedube zezobupolitika nokungathembani, uhlanga lwaba ziintlaba-zahlukane yaye oko kwabangela ubunzima, ukungamanyani yaye neemeko zaba maxongo. Oko kwabangela ilahleko enkulu kumaSirayeli. Urhulumente wawo wayitshintsha imilinganiselo yokuphila, yaye akazange azikhathaze ngezilangazelelo zabantu. Isizekabani sasikukuba iinkokeli zolo hlanga zamgatya uYehova nemithetho yakhe. Ngeso sizathu, uhlanga luphela lwabandezeleka.

Ukwanda Kokungathembani Namhlanje

Namhlanje, amagosa karhulumente, oosomashishini namalungu onqulo akakhange azikhathaze ngokulondoloza imilinganiselo ephakamileyo yokuziphatha. Yaye oku kuye kwabangela ukulambatha kwiingqondo neentliziyo zoluntu ngokubanzi. Ngaphezulu, amagosa karhulumente nezinye iinkokeli azikwazi ukucombulula iingxaki ezisisiseko ezikhoyo kumazwe azo.

Ngokomzekelo, azikwazi ukuphelisa imfazwe okanye ukuhlisa amaxabiso aphezulu ezonyango okanye ukulawula imiphumo emibi yokurhweba ngeziyobisi ngokungekho mthethweni. Yaye kuye kwakho ukuwohloka nakwinkqubo yemfundo esetyenziswayo. Oorhulumente abaliqela baxhasa ukungcakaza. Oosomashishini neenkokeli zonqulo ezininzi baye babadanisa abaninzi ngenxa yokunganyaniseki nokuziphatha kakubi. Akumangalisi ke ngoko ukuba, abantu bengenantembelo kwiinkokeli zabo.

Ngaba ukho urhulumente onokukhusela nonokuba ngumzekelo ekuhloneleni amalungelo abantu nasekulondolozeni imilinganiselo yokuziphatha? Ewe ukho. Kwinqaku lethu lokugqibela siza kuchaza indlela okunokwenzeka ngayo oku.

[Amagama acatshulweyo akwiphepha 7]

‘Ukubawa, ukuzingca nokungamanyani kwabantu kuxhaphake gqitha ehlabathini lonke.’—I-INTERNATIONAL HERALD TRIBUNE

[Imifanekiso ekwiphepha 8]

Ukuthobela kukaKumkani uSolomon imithetho kaThixo, kwabangela ukuba abalawulwa bakhe babe nemilinganiselo ephakamileyo yokuziphatha