Urhulumente Oza Kuxhasa Imilinganiselo Yobuthixo
KHAWUBE nomfanekiso-ngqondweni wehlabathi elinorhulumente omnye olawula abantu bazo zonke iintlanga neelwimi. Khawucinge ngorhulumente oxhasa eyona milinganiselo iphakamileyo, ophelisa imfazwe, intiyo, ulwaphulo-mthetho, ubuhlwempu, ukungcoliswa komhlaba, ukugula kwanokufa!
Mhlawumbi usenokuthi, ‘Inokuba mnandi gqitha loo nto kodwa ayinakwenzeka.’ Inako ukwenzeka. Enyanisweni, iza kwenzeka ngokuqinisekileyo. UYesu Kristu wathembisa ngorhulumente onjalo. Wafundisa abalandeli bakhe ukuba bathandazele urhulumente onjalo: “Ngoko ke, nina nize nithandaze ngale ndlela: ‘Bawo wethu osemazulwini, malingcwaliswe igama lakho. Mabufike ubukumkani bakho. Makwenzeke ukuthanda kwakho nasemhlabeni, njengasezulwini.’”—Mateyu 6:9, 10.
Mhlawumbi uqhelene namazwi aloo mthandazo, kuba izigidi zabantu abasemhlabeni ziyawazi okanye zakha zeva ngawo. Kodwa ngaba wakha wacingisisa ngentsingiselo yaloo mazwi? Phawula ukuba uBukumkani bunxulunyaniswa nokwenziwa kokuthanda kukaThixo emhlabeni. Ngoko, buyintoni uBukumkani bukaThixo? Yaye kuyintoni ukuthanda kukaThixo ngomhlaba?
Oko UBukumkani BukaThixo Bukuko
Ubukumkani ngurhulumente olawulwa ngukumkani. UBukumkani bukaThixo yindlela uYehova uThixo aza kubonakalisa ngayo ulongamo lwakhe kwindalo iphela. Ngurhulumente wakhe owongamileyo okhokelwa nguNyana wakhe, uYesu Kristu. Ukuthanda kukaThixo ngomhlaba kuchazwe ngokucacileyo kwiNdumiso 37:10, 11: “Kusele ithutyana, angabikho ongendawo; uya kuyikhangela indawo yakhe, abe engekho. Kodwa abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo.”
Ngoko, ukuba uziva udimazekile ngenxa yemilinganiselo yeli hlabathi ewohlokayo, ungalahl’ ithemba. IBhayibhile ithembisa ukuba kungekudala kuza kubakho inguqulelo ephawulekayo kwiimeko nakwimilinganiselo yehlabathi. Isithembiso sokuba kungekudala uBukumkani bukaThixo buza kulawula ihlabathi ukuze kumiselwe imilinganiselo kaThixo, sisithembiso esiqinisekileyo.
Ukukholosa ngezithembiso zoko kuya kwenziwa buBukumkani bukaThixo kunokusenza sizive sinqabisekile. Khawucinge nje ngemilinganiselo enxulunyaniswa nolawulo lobo Bukumkani: “Yizani, nibone imisebenzi kaYehova, indlela amise iziganeko ezikhwankqisayo ngayo emhlabeni. Uphelisa iimfazwe kuse esiphelweni somhlaba.” (INdumiso 46:8, 9) Elinjani lona ithemba loxolo nonqabiseko!
Kwisiprofeto esiphathelele uKumkani woBukumkani bukaThixo, uYesu Kristu, iNdumiso 72:12-14 ithi: “Uya kumhlangula lowo ulihlwempu ukhalela uncedo, kwanalowo uxhwalekileyo nabani na ongenamncedi. Uya kuba nosizi ngesisweli nangehlwempu, nemiphefumlo yabangamahlwempu uya kuyisindisa. Uya kuwukhulula umphefumlo wabo kwingcinezelo nakugonyamelo, negazi labo liya kuxabiseka emehlweni akhe.”
Imilinganiselo EseBhayibhileni
Khawuqwalasele eminye imilinganiselo ekhuthazwa yiBhayibhile: “Banoyolo abo bayiphapheleyo intswelo yabo yokomoya.” (Mateyu 5:3) Omnye uthi: “Kholosa ngoYehova ngayo yonke intliziyo yakho, ungayami ngokwakho ukuqonda. Uze umgqale yena ezindleleni zakho zonke, kwaye uya kuwenza uthi tye umendo wakho.”—IMizekeliso 3:5, 6.
IBhayibhile ithi sonke siya kuziphendulela ngemilinganiselo esikhetha ukuphila ngayo. Phawula oko kuthethwa kwiNtshumayeli 11:9: “Yiba nemihlali, mfana, ebutsheni bakho, uyenzele okulungileyo intliziyo yakho ngemihla yobufana bakho, uze uhambe ngeendlela zentliziyo yakho nangokubona kwamehlo akho. Kodwa yazi ukuba ngenxa yezi zinto zonke uThixo oyinyaniso uya kukusa ekugwetyweni.” Imbopheleleko esinayo ngezenzo zethu ichazwe ngokungqalileyo kwiMizekeliso 2:21, 22: “Abathe tye bona baya kuhlala emhlabeni, nabangenakusoleka baya kusala kuwo. Bona ke abangendawo, baya kunqunyulwa emhlabeni; ke wona amaqhophololo, aya kuncothulwa kuwo.”
Ekubeni sineli themba likhuthazayo lorhulumente wobulungisa, hayi indlela ekuyingenelo ngayo ukuhlakulela ukuba nobuhlobo obusondeleyo noThixo! Ukunxulumana nabantu abanomnqweno wokuba ngabalawulwa boBukumkani bukaThixo kuya kusinceda siphile ngendlela eya kusenza sinandiphe ulawulo loBukumkani bakhe obuzukileyo nemiphumo yemilinganiselo ephakamileyo obuya kuyixhasa.
[Umfanekiso okwiphepha 10]
Abalulamileyo “baya kuwudla ilifa umhlaba” baze “baziyolise ngokugqibeleleyo ngobuninzi boxolo.”—INDUMISO 37:11.