Amanyala—Izimvo Ziyabethabethana Ngokuphathelele Wona

“Avuselela iminqweno engeyoyamvelo, nenkanuko engenakuze yaneliswe.”—UTony Parsons, ongumbhali wemihlathi yamaphephandaba.

UJOHN wayengenazinjongo zakuba likhoboka ‘lesini esiboniswa kwi-Internet.’a Njengoninzi lwabantu abazibona sele bekumajelo eInternet ekuncokolwa ngamanyala nesini kuwo, ngenye imini wayesebenzisa i-Internet, xa wazibona sele ekwelo jelo. Akuzange kuthabathe thuba lide, wazibona sele ezithanda izenzo zesini eziboniswa kwi-Internet. Uthi: “Ndandilinda nje umfazi wam aye emsebenzini, ndiphakame ndikhawulezile ebhedini ndize ndichithe iiyure ndiqolozele ikhompyutha.” Ngalo lonke elo xesha, wayengakufaki ukutya emlonyeni, kunani kona ukusela. Uthi: “Kwakungabikho nto ithi thiki xa ndilambile.” Waqala ngoku waxokisa inkosikazi yakhe eyifihlela ngalo mkhwa wakhe. Le nto yawuphazamisa nomsebenzi wakhe, waza wangenwa kukungathembi mntu. Umtshato wakhe waqalisa ukuhexa, yaye kuthe ngemini awayenze amalungiselelo okudibana ubuso ngobuso nomnye wabo wayencokola nabo ngesini ekhompyutheni, yabhaqwa loo nto ngumfazi wakhe. Sithethanje uJohn uphantsi koncedo oluza kumenza ahlukane nalo mkhwa.

Abo bawathiy’ egazini amanyala badla ngokubhekisela kumabali anjengala xa bebonisa indlela amanyala asithoba ngayo isidima. Bathi onakalisa ulwalamano phakathi kwabantu, awathob’ isidima amabhinqa, axhaphaza abantwana yaye abethelela imbono egqwethekileyo neyingozi ngesini. Kwelinye icala, abo bawaxhasayo bathi ayinto yomntu wonke, yaye bathi abo bangawathandiyo banochuku neentliziyo ezithambileyo. Omnye owameleyo amanyala ubhala athi: “Abantu abamele babe neentloni yindlela abavakalelwa ngayo ngesini nangeminqweno yabo. Le yinto enokusetyenziswa njengendlela yokuqalisa nokukhuthaza ukuncokola ngokukhululekileyo ngesini.” Abanye abantu bathi ukusasazwa ngokukhawuleza kwamanyala kubangela abantu bakhululeke baze bavuleke ingqondo. Umbhali uBrian McNair uthi: “Ibutho labantu elikwaziyo ukunyamezela ukuboniswa ngokuphandle kweentlobano zesini ezenziwa ngabantu abakhulileyo abavumeleneyo, lisenokude liyamkele into yokuba abantu baneminqweno eyahlukahlukeneyo yesini kwanokuba amabhinqa ayalingana nomntu wonke.”

Ngaba ukubethabethana kwezimvo ngokuphathelele amanyala kuwenza amkeleke? Kutheni esasazeke kangaka? Ngaba ngokwenene amanyala ayingozi? Le mibuzo iza kuphendulwa kumanqaku alandelayo.

[Umbhalo osemazantsi]