Uluthi Olucoca Amazinyo
NGUMBHALI KAVUKANI! EZAMBIA
IAFRIKA—ilizwekazi elinabantu abanamazinyo amahle kodwa elineendawo ezimbalwa zokwenza iibrashi zamazinyo! Kwenzeka njani oko? Kwabaninzi imfihlelo yokuhlala benamazinyo amahle kukusebenzisa nje uluthi oluncinane oluhlafunwayo!
Izinti ezihlafunwayo zazikhe zasetyenziswa ngabantu baseBhabhiloni yaye kamva ngamaYiputa, amaGrike namaRoma. Ezi “brashi zamazinyo” zazisetyenziswa eArabhiya ngaphambi kokuqalisa kobuSilamsi. Olu luthi luhlafunwayo layekwa ukusetyenziswa ngabemi baseYurophu malungu neminyaka engama-300 eyadlulayo, noko ke lusasetyenziswa kweminye imimandla yaseAfrika, eAsia nakuMbindi Mpuma.
KuMbindi Mpuma, owona mthi zikhiwa kuwo ezi zinti yisaltbush. ENtshona Afrika, kusetyenziswa umthi welime noweorenji, ngoxa kummandla omkhulu waseIndiya kusetyenziswa oweeneem. EMpuma Afrika kusetyenziswa iintlobo zemithi eyahlukahlukeneyo eziphantse zibe ngama-300 ukwenza ezi zinti. Olu luthi luwacoca njani amazinyo?
Xa uluhlafuna olu luthi, imicu engasencamini yalo iyakhululeka, ize ibe “yibrashi.” Ngokuqhubeka uluhlafuna lukhupha izinto eziphakathi kwamazinyo lize igazi lihambe kakuhle kwiintsini. Kwakhona ukuluhlafuna kwenza ube namathe amaninzi, aye acoce umlomo namazinyo angabi neentsholongwane.a
Kodwa olu luthi aluncedi nje ekuhlambeni amazinyo kuphela. Amasetyana neengcambu zezinye iintlobo zezityalo anemichiza enza amazinyo angakhawulezi ukuba neplaque. Incindi yezinye izinti kuthiwa ithintela iintsholongwane nokubola. Amasetyana omthi webrashi yamazinyo okhankanywe ngaphambilana, anokuba luncedo ekuthinteleni izilonda. ENamibia, ezi zinti zithatyathwa kwisityalo esaziwa ngokuba yimuthala esithintela iintsholongwane ezibangela ukubola kwamazinyo, isifo seentsini nomqala obuhlungu. Esi sixhobo sokwemvelo sokuhlamba amazinyo siyawakhusela angabi nemingxuma size siqinise neentsini. Ngoku kukho imizi-mveliso eyenza intlama yamazinyo enemicu nentlaka efumaneka kwezi zityalo.
Kakade ke, bambi bakhetha ukusebenzisa ibrashi yamazinyo eqhelekileyo. Enoba ukhetha ukwenjenjalo okanye ukusebenzisa uluthi, njengoko abantu bamandulo babesenjenjalo, inye kuphela into eqinisekileyo: Ukucoca amazinyo kubalulekile empilweni.
[Umbhalo osemazantsi]
a Kakade ke, ukutya esikutyayo nako kubalulekile. Abantu abaninzi basemaphandleni eAfrika badla ngokutya kakhulu ukutya okuziinkozo nemifuno ngokungafaniyo nabo bahlala ezidolophini. Kwakhona abayityi kakhulu iswekile, ukutya okucoliweyo, neziselo ezihlwahlwazayo—nto ezo ezaziwa njengezibolisa amazinyo.
[Umfanekiso okwiphepha 21]
Ineem yenye yemithi eyenza izinti ezihlafunwayo
[Inkcazelo]
William M. Ciesla, Forest Health Management International, www.forestryimages.org