IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • g03 12/8 iphe. 19-20
  • Wonakaliswe Kangakanani Umhlaba?

No video available for this selection.

Sorry, there was an error loading the video.

  • Wonakaliswe Kangakanani Umhlaba?
  • Vukani!—2003
  • Amanqaku Afanayo
  • Umntu Uwenza Ntoni Umhlaba?
    IMboniselo Evakalisa UBukumkani BukaYehova—1990
  • Ngaba Eli Dabi Liyaphunyelelwa?
    Vukani!—1996
  • Ukonakaliswa Komhlaba Wethu—Intlaselo Ethwaxa Imimandla Emininzi
    Vukani!—1993
  • Ukuhlangula Imekobume—Kumaxa Siphi Kwilinge Lokuphumelela Eli Dabi?
    Vukani!—2003
Khangela Okunye
Vukani!—2003
g03 12/8 iphe. 19-20

Wonakaliswe Kangakanani Umhlaba?

NGUMBHALI KAVUKANI! KWIIPHILIPPINES

Isigulana sikwimeko engaginyisi mathe. Sihlaselwa zizigulo ezahlukahlukeneyo. Nomphefumlo waso uyanuka. Sihlaselwe ngumkhuhlane ongazange ubonwe ngaphambili. Onke amalinge enziwayo awa phantsi. Ityhefu seyiwutyhutyhe wonke umzimba. Kuthi xa kunyangwa le, kube kuvela leya. Ukuba esi sigulana besingumntu, oogqirha bebeya kuthi sinesifo esinganyangekiyo. Bengazi ukuba bathini na, bebeya kuzama ukusiphatha kakuhle kangangoko de sife.

KODWA, esi isigulana asingomntu. Likhaya lethu—umhlaba. Imeko yesi sigulana kuthethwe ngaso ngasentla ikufanekisela kakuhle oko kwenzeka kulo mhlaba. Umoya ongcolileyo, ukufudumala komhlaba, amanzi angcolileyo, nenkunkuma enetyhefu yimbinana nje kwizifo eziphethe olu dwayi lomhlaba. Njengoogqirha ekuthethwe ngabo ngasentla, iingcali zime nematha azazi nokuba ziqale ngaphi.

Amajelo eendaba asoloko ethetha ngokonakaliswa komhlaba ngeengongoma eziphambili nemixholo ethi: “Ukusetyenziswa kweziqhushumbisi xa kulotywa kuguqula umgangatho wolwandle ube lithafa lokufa.” “Abantu abaliwaka Lezigidi BaseAsia Banokuphelelwa Ngamanzi Acocekileyo Kwiminyaka Engama-24.” “Kwihlabathi lonke, zingamashumi amane ezigidi iitoni zenkunkuma enetyhefu ethuthelwa kwamanye amazwe ngonyaka.” “Kumaqula ali-1 800 aseJapan, phantse amabini kwamathathu angcoliswe yityhefu.” “Ukwanda Komngxuma OkwiOzone Phezu KweAntartiki Kuba Sisisongelo Kwakhona.”

Ezi zilumkiso seziqhelekile kwabanye abantu, kangangokuba banokude bacinge ukuba, ‘Oko akubalulekanga kangako logama nje kungabachaphazeli.’ Noko ke, enoba oko siyakuqonda okanye asikuqondi, ukonakaliswa kwemekobume yomhlaba kuchaphazela inkoliso yabantu. Ekubeni ungcoliswa kangaka umhlaba, kusenokwenzeka ukuba oko kuchaphazela iinkalo ezininzi zobomi bethu. Ngoko ke, sonke sifanele siyixhalabele impilo-ntle nokulondolozwa kweli khaya lethu. Ngapha koko, yiyiphi enye indawo esinokuhlala kuyo?

Yande kangakanani le ngxaki? Wonakaliswe kangakanani umhlaba? Oku kubuchaphazela njani ubomi babantu? Makhe siqwalasele izinto ezimbalwa eziza kusinceda siqonde ukuba umhlaba awonakaliswanga nje kancinane, kodwa ukwimeko emaxongo.

◼ IILWANDLE: Kukho imimandla emikhulu yolwandle ekuye kwalotywa kakhulu kuyo. Ingxelo yeUnited Nations Environment Programme ithi “zingama-70 ekhulwini iindawo ekuye kwalotywa kuzo ngokugqithiseleyo kangangokuba iintlanzi azisakwazi kuzala apho kuba zilotywa kungasali kwanto.” Ngokomzekelo, iintlanzi zohlobo lwecod, ihake, ihaddock, neflounder ezikuMntla weAtlantiki zancipha phantse ngomlinganiselo wama-95 ekhulwini phakathi kowe-1989 nowe-1994. Ukuba oku kuyaqhubeka, kuya kuzichaphazela njani izigidi zabantu abaxhomekeke kulwandle ukuze bafumane ukutya?

Ukongezelela koko, kuqikelelwa ukuba nyaka ngamnye ziitoni zezigidi ezingama-20 ukusa kuma-40 zezinto eziphila elwandle ezibanjiswayo zize ziphinde ziphoswe khona—ngokuqhelekileyo ziyenzakala okanye zife. Kutheni zibuyiselwa elwandle? Zibanjiswa xa kulotywa iintlanzi ezithile kungafunwa zona.

◼ AMAHLATHI: Ukugawulwa ngokugqithiseleyo kwamahlathi kubangela iingxaki ezininzi. Ukuphela kwemithi kwenza umhlaba ungakwazi ukufunxa ikhaborn diokside, yaye kuthiwa oko kubangela ukufudumala komhlaba. Izityalo ezithile ziyatshabalala, mhlawumbi ezingowona mthombo wamayeza asindisa ubomi. Sekunjalo, ukutshatyalaliswa kwamahlathi kusaqhubeka ngendlela engathethekiyo. Enyanisweni uye wanda gqitha umkhamo atshatyalaliswa ngawo kule minyaka yakutshanje. Amanye amagosa avakalelwa ukuba, ukuba oku kuyaqhubeka, amahlathi amakhulu aya kube engasekho kwiminyaka emalunga nama-20.

◼ INKUNKUMA ENETYHEFU: Ukulahlwa kwezinto eziyingozi emhlabeni naselwandle yingxaki enkulu enokubangela umonakalo ongathethekiyo kwizigidi zabantu. Inkunkuma yezinto zenyukliya, izinto zesinyithi nezinto zeplastiki zizinto ezinokubangela iingozi, ukugula okanye ukufa kwabantu nezilwanyana.

◼ IMICHIZA: Kule minyaka ili-100 idluleyo, phantse ili-100 000 imichiza emitsha eye yaveliswa. Ekugqibeleni le michiza iphelela emoyeni, emhlabeni, emanzini nasekutyeni kwethu. Imbalwa gqitha eye yahlolwa ukuze kubonwe imiphumo enayo kwimpilo yabantu. Noko ke, kuleyo ihloliweyo, iliqela efunyaniswe ibangela umhlaza okanye izifo ngandlel’ ithile.

Zininzi izinto ezisisisongelo kwimekobume yomhlaba: umoya ongcolileyo, ukungabikho kweenkonzo zogutyulo, imvula eneasidi, ukunqongophala kwamanzi acocekileyo. Le mbinana yezinto ikhankanyiweyo inikela ubungqina obaneleyo bokuba umhlaba wonakele ngokwenene. Ngaba unako ukuhlangulwa, okanye sesishiywe lixesha?

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share