Imbono YeBhayibhile

Unokuyixhathisa Njani Iminqweno Engafanelekanga?

“Xa ndinqwenela ukwenza okulungileyo, kusuke kubekho okubi kum.”—ROMA 7:21.

UPAWULOS ocatshulwe ngasentla, mhlawumbi ngoyena wayebalasele kunabo bonke abapostile ekukhuthazeni ukugcinwa kwemigaqo ephakamileyo yobuKristu. (1 Korinte 15:9, 10) Sekunjalo, wayivuma ngokuphandle imeko yakhe njengoko kuboniswa ngala mazwi angasentla. Ingqondo yakhe yayisoloko ilwisana neminqweno engafanelekanga. Ngaba wakha wavakalelwa ngale ndlela wayevakalelwa ngayo uPawulos? Eneneni, njengezidalwa ezingafezekanga, ngubani ongazange avakalelwe ngale ndlela?

Kwabaninzi, ukuzama ukoyisa iminqweno engafanelekanga ngumlo onzima kakhulu. Abanye balwisana neminqweno yokufuna ukuzanelisa ngokwesini. Bambi bangamakhoboka okungcakaza, ecuba, iziyobisi ezingekho mthethweni okanye utywala. Ukuba sisoloko sineminqweno engcolileyo, sinokuyixhathisa njani? Luluphi uncedo olufumanekayo? Ngaba uya kuze uphele umlo nxamnye neminqweno engafanelekanga?

Uthando—Oyena Ndoqo Wokuxhathisa Iminqweno Engafanelekanga

UYesu wathetha ngemithetho emibini eyeyona mikhulu kuMthetho kaMoses. Owokuqala ngulo: “Uze umthande uYehova uThixo wakho ngentliziyo yakho iphela nangomphefumlo wakho uphela nangengqondo yakho iphela.” (Mateyu 22:37) Ukuba sithanda uThixo ngendlela uYesu awathi simele simthande ngayo, ngaba ukumkholisa akufanele kube ngowona mnqweno wethu uphambili? Ukuba kunjalo, loo mnqweno sinawo wobulungisa unokusinceda kumlo wethu kwanaxa sisilwa neyona minqweno inamandla! Le asiyongcamango nje ithelekelelwayo. Izigidi zamaKristu ziyaphumelela kumlo wamihla le wokuxhathisa iminqweno engafanelekanga. Unokuluhlakulela njani ulwalamano oluqine kangako noThixo? Ngokucamngca ngokulunga kwakhe njengoko kubonakala kwindalo yakhe, eBhayibhileni nakwindlela aqhubana ngayo nathi.—INdumiso 116:12, 14; 119:7, 9; Roma 1:20.

Umthetho wesibini kweyona mikhulu owacatshulwa nguYesu ngulo: “Uze umthande ummelwane wakho njengawe siqu.” (Mateyu 22:39) Umpostile uPawulos wathi uthando “aluziphathi ngokungandilisekanga” yaye “alufuni ezalo izilangazelelo.” Ngoko uthando olunjalo lokungazingci lusinceda siphephe nayiphi na ihambo enokubenza buhlungu abanye. (1 Korinte 13:4-8) Lunokuhlakulelwa njani? Ngokuzithabatha uzibeke kwindawo yomnye uze ngokunyanisekileyo ube nenkxalabo ngeemvakalelo zakhe nangempilo-ntle yakhe kanaphakade.—Filipi 2:4.

Luluphi Uncedo Olufumanekayo?

Ngenxa yokuba uThixo eyiqonda indlela ekunzima ngayo kuthi ukwenza okulungileyo, uye walungiselela ukuba sifumane uncedo ngeendlela ezahlukahlukeneyo. NgeLizwi lakhe elibhaliweyo eliyiBhayibhile, usifundisa ukuba sithiye okubi size sihlakulele ukumhlonela. (INdumiso 86:11; 97:10) IBhayibhile iqulethe iingxelo ezibonisa intlungu ebangelwa kukunikezela kwiminqweno engafanelekanga. Ukongezelela, uYesu wathi ukuba siyamcela uThixo, uya kusinika umoya wakhe oyingcwele ukuze usomeleze, moya lowo ungamandla abalaseleyo kwindalo yonke. (Luka 11:13) Unokusomeleza kwisigqibo sethu sokwenza oko kulungileyo. Elinye ilungiselelo alenzileyo yinkxaso nokhuthazo esinokulufumana kwamanye amaKristu nawo alwisana neminqweno engafanelekanga. (Hebhere 10:24, 25) Le mpembelelo yakhayo ithabathel’ indawo iminqweno engafanelekanga, yaye oko kuyasinceda kumlo wethu wokwenza oko kulungileyo. (Filipi 4:8) Ngaba oku kuluncedo ngokwenene?

Ngokomzekelo, khawucinge ngoFidel owayesaziwa njengenxila kwindawo ahlala kuyo. Wayenxila, etshaya, engcakaza, esilwa nabantu. Ukufundisisa iBhayibhile nokunxulumana namaNgqina kaYehova kwamnceda wahlukana naloo mikhwa. Ngoku uphila kamnandi nenkosikazi yakhe nabantwana bakhe ababini.

Omnye umntu usenokubuza, ‘Kodwa kuthekani ukuba ndibuyela kulaa mikhwa midala?’ Umpostile uYohane wayifikelela loo nkalo. Wabhala: “Bantwana bam abancinane, ndinibhalela ezi zinto ukuze ningenzi sono. Ukanti, ukuba nabani na uthi enze isono, sinaye umncedi kuBawo, uYesu Kristu, lowo ulilungisa. Yena ungumbingelelo wokucamagushela izono zethu, kanti kungekhona ezethu kuphela kodwa kwanezehlabathi liphela.” (1 Yohane 2:1, 2) Ewe, idini likaYesu liyazigubungela iziphoso zomntu oguqukayo aze ngokunyanisekileyo azabalazele ukwenza iinguqulelo ukuze akholise uThixo. Ekubeni kukho ilungiselelo elinjalo, ngaba kukho umntu onesizathu esivakalayo sokunikezela kumlo wokwenza okulungileyo?

Iminqweno Engafanelekanga Iya Koyiswa

Ukuba sihlakulela ukuthanda uThixo nommelwane size sisebenzise uncedo oluvela kuThixo, kwanangoku sinokuphumelela kumlo wethu nxamnye neminqweno engafanelekanga. Ngapha koko, iLizwi likaThixo liyasiqinisekisa ukuba lo mlo awuyi kuqhubeka ukho ngonaphakade. Kungekudala, abo bawasebenzisayo amalungiselelo okomoya kaThixo baya kuphiliswa ngokupheleleyo, ngokwenyama nangokomoya. (ISityhilelo 21:3-5; 22:1, 2) Baya kukhululwa esonweni nasekufeni okubangelwa sisono. (Roma 6:23) Kwelinye icala, abo bazimisele ukuqhubeka neminqweno engacocekanga neyingozi abayi kuzifumana ezo ntsikelelo.—ISityhilelo 22:15.

Hayi indlela ekuthuthuzela ngayo ukwazi ukuba asiyi kuqhubeka sisilwa neminqweno engafanelekanga ngonaphakade. Iya kushenxiswa ngokupheleleyo nangokusisigxina. Kuya kutsho kuthi qabu uNoqolomb’ efile nje!