Ukuzalelwa Kwihlabathi Elingenaluthando!

USANA luzalelwa kwihlabathi elinenkohlakalo, elingenaluthando nelizele ziimbandezelo. Nangona usana lungenakuyichaza indlela oluvakalelwa ngayo, ezinye izazinzulu zikholelwa ukuba kwanangaphambi kokuba izalwe imveku iyakuva oko kwenzekayo.

Incwadi ethi The Secret Life of the Unborn Child ithi: “Ngoku siyazi ukuba ukususela kwinyanga yesithandathu (mhlawumbi nangaphambi koko) imveku engekazalwa iyakuqonda konke okuqhubekayo yaye inazo iimvakalelo.” Nangona usana lusenongakukhumbuli oko, ezinye izazinzulu zicinga ukuba intlungu ebakho xa umama ebeleka iyaluchaphazela naxa sele lukhulile.

Emva kokuba luzelwe, iingxaki ziyanda. Lwakuba luphumile esibelekweni, ukutya alukufumani kunina ngokuzenzekelayo. Olu sana alusafumani ioksijini nezondlo ngenkaba kanina. Ukuze luphile, kufuneka luqalise ukuphefumla luze luzityele. Lufuna umntu oza kulutyisa anyamekele nezinye iintswelo zalo.

Le mveku isandul’ ukuzalwa kufuneka ikhule engqondweni, ngokweemvakalelo nangokomoya. Ngoko kufuneka kubekho umntu oza kunyamekela olu sana. Ngubani oyena mntu uwufaneleyo lo msebenzi? Yintoni efunwa lusana kubazali balo? Zinokwaneliswa njani ezi ntswelo? Iimpendulo zale mibuzo siya kuzifumana kumanqaku alandelayo.