Imibuzo Evela Kubafundi

Ngaba likho ithemba lovuko ngosana olufa lusesesibelekweni?

Umntu ongazange azale imfambilini, usenokungayazi ncam indlela abavakalelwa ngayo abo baye behlelwa leli shwangusha. Abanye abazali baye baxheleka kakhulu yiloo lahleko. Omnye umama walahlekelwa ngabantwana abahlanu ngaphambi kokuba bazalwe. Ekuhambeni kwexesha waziva esikelelekile ngokuzala oonyana ababini abasempilweni. Sekunjalo, yayisamhleli ilahleko awayifumanayo. Ngalo lonke ixesha lokuphila kwakhe, wayesakhumbula ukuba sana ngalunye kwezo zafayo, ngelungakanani ukuba belusaphila. Ngaba amaKristu anjalo anesizathu sokuba nethemba lovuko eliza kubuyisa ilahleko yawo?

Ngokulula nje sinokuphendula sithi asazi. IBhayibhile ayizange khe ithethe ngokungqalileyo ngombandela wovuko lweentsana ezizelwe sele zifile okanye ezife ngenxa yokuphuma kwezisu. Noko ke, iLizwi likaThixo linemigaqo ephendula lo mbuzo nenokuba yintuthuzelo ngandlel’ ithile.

Makhe sihlolisise imibuzo emibini ehlobeneyo. Okokuqala, ngokwembono kaYehova, buqala nini ubomi bomntu—ngexesha lokukhawulwa okanye xa ezalwa? Okwesibini, uYehova ulujonga njani usana olungekazalwa—njengomntu okanye njengengqokelela nje yeeseli ezikwisibeleko sikanina? Imigaqo yeBhayibhile iyiphendula ngokucacileyo le mibuzo.

UMthetho kaMoses watsho ngokucacileyo ukuba ubomi abuqali xa umntu ezalwa kodwa buqala ngaphambi koko. Yenzeka njani loo nto? Wabonisa ukuba umntu obulala usana olungekazalwa wayenokufumana isigwebo sokufa. Phawula lo mthetho: “Uze unikele umphefumlo ngomphefumlo.”a (Eks. 21:22, 23) Ngenxa yoko, usana olusesesibelekweni luyaphila yaye lungumphefumlo ophilayo. Ukuqonda loo nyaniso ibalulekileyo kuye kwanceda amaKristu azizigidi ngezigidi ukuba angaqhomfi, agqala eso senzo njengesono esinzulu kuThixo.

Siyavuma ukuba, usana olungekazalwa luyaphila, kodwa ubomi balo buxabiseke kangakanani kuYehova? Umthetho okhankanywe ngasentla wayalela ukuba umntu omdala makabulawe xa ebulele usana olungekazalwa. Ngoko, izicacele into yokuba ubomi bosana olungekazalwa buxabisekile emehlweni kaThixo. Ukongezelela, iZibhalo eziliqela zityhila ukuba uYehova ujonga iintsana ezingekazalwa njengabantu. Ngokomzekelo, uKumkani uDavide waphefumlelwa ukuba athi ngoYehova: “Wandibiyela esiswini sikama. . . . Amehlo akho andibona ndiseyimbumba, yaye zonke iinxalenye zam zazibhalwe phantsi encwadini yakho, ngokubhekisele kwiimini ezayilwa ngazo.”—INdu. 139:13-16; Yobhi 31:14, 15.

Kanti uYehova uyazibona iimpawu zeentsana ezingekazalwa nezinokuba negalelo elikhulu kwixa elizayo. Ngoxa umfazi kaIsake, uRebheka wayekhulelwe amawele, uYehova wavakalisa isiprofeto esiphathelele ukusukuzana kwala makhwenkwe mabini esibelekweni sakhe, wayitsho nento yokuba sele ebone iimpawu ezithile kuwo eziza kuba negalelo elikhulu kwixesha elizayo.—Gen. 25:22, 23; Roma 9:10-13.

Enye imeko ebangela umdla yekaYohane umBhaptizi. Ingxelo yeVangeli ithi: “Njengoko uElizabhete weva umbuliso kaMariya, usana olusesibelekweni sakhe lwaxhuma; yaye uElizabhete wazaliswa ngumoya oyingcwele.” (Luka 1:41) Xa wayechaza esi siganeko, ugqirha onguLuka wasebenzisa igama lesiGrike elinokubhekisela kusana olungekazalwa okanye kusana olusandul’ ukuzalwa. Wasebenzisa kwaigama elifanayo xa wayebhekisela kusana olunguYesu olulele emkhumbini.—Luka 2:12, 16; 18:15.

Lilonke, ngaba iBhayibhile isinika isizathu sokwahlula phakathi kosana olusesibelekweni nolo lusandul’ ukuqala ukuphefumla? Akubonakali kunjalo. Oko kuvisisana nento efunyaniswe zizazinzulu kutshanje. Ngokomzekelo, abaphengululi bafumanise ukuba usana olusesibelekweni luyakwazi ukuva luze lusabele kwizinto ezenzeka ngaphandle kwesibeleko. Ngenxa yoko, ayimangalisi into yokuba umama okhulelweyo abe nolwalamano olusenyongweni nosana olukhula ngaphakathi kuye.

Ixesha lokuzalwa kosana liyaxhomekeka. Nanku umzekelo: Omnye umama uzala usana ngaphambi kwexesha lube lusaphila, luze lufe emva kweentsuku ezimbalwa. Kanti omnye uthwala usana lwakhe zonke iinyanga ezisithoba, luze lufe kanye ngaphambi kokuba luzalwe. Ngaba umama wokuqala unethemba lokuba usana lwakhe luya kuvuswa ngenxa nje yokuba luye lwazalwa ngaphambi kwexesha, logama umama wesibini engenalo yena elo themba?

Xa sishwankathela, iBhayibhile ifundisa ngokucacileyo ukuba ubomi buqala ekukhawulweni yaye uYehova ugqala usana olungekazalwa njengomntu oxabisekileyo. Ngenxa yaloo nyaniso isuka eZibhalweni, abanye basenokukubona kungekho ngqiqweni ukuthi usana olungekazalwa oluthe lwafa alunathemba lovuko. Eneneni basenokuqiqa ngelithi loo nto ikukuthandabuza oko sikukholelwayo kuseZibhalweni ngokuphathelele ukuqhomfa, nokusekelwe kakhulu kuloo nyaniso.

Ngaphambili, eli phephancwadi lakha labuza imibuzo esengqiqweni ebibonakala ithandabuza ukuba iintsana ezife ngaphambi kokuba zizalwe ziya kuvuka. Ngokomzekelo, ngaba uThixo uya kubuyisela imveku esandul’ ukukhawulwa kwisibeleko sikanina eParadesi? Noko ke, ukufunda, ukucamngca nokuthandaza kuye kwabangela iQumrhu Elilawulayo ukuba ligqibe kwelokuba oko eneneni akunanto yakwenza nethemba lovuko. UYesu wathi: “Zonke izinto zinokwenzeka kuThixo.” (Marko 10:27) Okwenzeka kuYesu kwabonisa ukuba yinyaniso kwaloo mazwi; ubomi bakhe bathunyelwa ukusuka ezulwini ukuya kutsho kwisibeleko sentombi enyulu eselula—nto leyo ngokuqinisekileyo ebonakala ingenakwenzeka ebantwini.

Ngaba yonke le nto ibonisa ukuba, iBhayibhile ifundisa ukuba iintsana ezifa zingekazalwa ziya kuvuswa? Sifuna ukuyibethelela into yokuba iBhayibhile ayiwuphenduli ngokungqalileyo loo mbuzo, ngoko asikho isizathu sokubetha ngenqindi phantsi, sithi ziza kuvuswa. Lo mba unokubangela imibuzo engapheliyo. Noko ke, enyanisweni okona kubhetele kukuba singafuniseli. Nantsi into esiyaziyo: Lo mba uxhomekeke kuYehova uThixo, onobubele bothando obuninzi nenceba. (INdu. 86:15) Asiyithandabuzi into yokuba, ukufuna ngokwenene ukulungisa umonakalo owenziwe kukufa ngokuvusa abantu. (Yobhi 14:14, 15) Sinokuqiniseka ukuba usoloko esenza oko kulungileyo. Uya kuphilisa amanxeba amaninzi esiwafumene ngoxa siphila kule nkqubo ingendawo yezinto njengoko esalathisa ngothando uNyana wakhe ukuba “ayichithe imisebenzi kaMtyholi.”—1 Yoh. 3:8.

[Umbhalo osemazantsi]

[Umfanekiso okwiphepha 13]

UYehova uya kuziphelisa zonke izinto ezibuhlungu eziye zasehlela