Ukunandipha Ukuhlala Nezilwanyana Ngonaphakade
HAYI indlela ezininzi ngayo iintlobo zezilwanyana yaye hlobo ngalunye luneempawu zalo ezahlukileyo! Ukuzithanda kunokwenza ubani asondele kuMdali wazo. Oku kunokubonwa kwinto eyenzeka kuMaria.
Malunga neminyaka emithathu eyadlulayo, ngoxa wayehlala eLisbon, ePortugal uMaria walahlekelwa yinja yakhe ayithandayo yaye oku kwabhengezwa kunomathotholo. Elinye iNgqina likaYehova elaliqinisekile ukuba likhe layibona le nja kwakuthethwa ngayo laqhagamshelana noMaria. Bayifumana le nja, yaye eli Ngqina lathi ekubeni uMaria wayezithanda ngolo hlobo izilwanyana, ngokuqinisekileyo wayenokukuthanda ukuphila kwihlabathi elitsha elithenjiswe nguThixo. Eli Ngqina lamcacisela ukuba kwelo hlabathi, abantu baya kuhlala ngoxolo nezilwanyana.
UMaria wasamkela isimemo sokuya kwintlanganiso yamaNgqina. Into awayiva nawayibona apho yamenza wanomdla gqitha kangangokuba wafuna ukuqhutyelwa isifundo seBhayibhile. Njengoko sasiqhubeka isifundo, uMaria wachukumiseka gqitha zizinto awayezifunda ngoYehova uThixo nesithembiso sakhe sobomi obungunaphakade kwihlabathi elitsha elizaliswe bubulungisa. (INdumiso 37:29; Yohane 17:3) Ekugqibeleni, ngoFebruwari 16, 2002, wafuzisela uzahlulelo lwakhe kuYehova ngokubhaptizwa emanzini.
Injongo KaThixo Yantlandlolo
NjengoMaria, abaninzi baye bachukumiseka bakuva ukuba injongo kaThixo yantlandlolo yokuba abantu baphile ngonaphakade emhlabeni oyiparadesi baze banyamekele izilwanyana iza kuzaliseka. (Genesis 1:28) IBhayibhile ithi uThixo ‘akawudalelanga ilize umhlaba kodwa wawubumba ukuba umiwe.’ Ngoko abantu babeza kunandipha ubuhlobo nezilwanyana baze bahlale kulo mhlaba ngonaphakade.—Isaya 45:18.
Kwakhona, iBhayibhile igxininisa ukuba uThixo uzimisele ukuzalisekisa injongo yakhe yokuba umhlaba ube yiparadesi. Uthi: “Ndikuthethile oko” aze alek’ umsundulo ngelithi “yaye ndiya kukuzisa.” Kwakhona uYehova uthi: “Ngoko ilizwi lam eliphuma emlonyeni wam liya kuba njalo. Aliyi kubuyela kum ngaphandle kwemiphumo, kodwa ngokuqinisekileyo liya kukwenza oko ndiyoliswa kuko, likuphumelelise ngokuqinisekileyo oko ndilithumele kona.”—Isaya 46:11; 55:11.
Ngokucacileyo, injongo kaThixo yantlandlolo yayikukuba abantu baphile ubomi obungunaphakade kumhlaba oyiparadesi. Sinokuqiniseka ukuba ekugqibeleni loo njongo iza kuzaliseka. Makhe sihlole ngokufutshane ukuba iBhayibhile ithi buya kuba njani ubomi kwihlabathi elitsha likaThixo. Siya kuphawula ukuba zonke izilwanyana, ezikwaziyo ukuphila phakathi kwabantu nezasendle, ziya kuphila ngoxolo zibe noxolo nabo nabantu.—Isaya 65:17, 21-25; 2 Petros 3:13.
Izilwanyana Kwihlabathi Elitsha LikaThixo
Kwihlabathi elitsha likaYehova, abantu baya kukwazi ukubamba isingci sengonyama nengwe enamabala, yaye baya kutsho bakwazi ukulala ehlathini bengenaxhala lokwenzakaliswa zizilwanyana. Phawula esi sithembiso sikaThixo: ‘Ngokuqinisekileyo ndiya kuwaphelisa elizweni amarhamncwa enzakalisayo, baya kuthi ke okunene abantu bahlale ngonqabiseko entlango baze balale emahlathini.’—Hezekile 34:25; Hoseya 2:18.
Ngokwenene, izilwanyana zasendle ziya kube zimbuna, zithobela kwanabantwana! IBhayibhile ithi: “Ingcuka iya kuhlala ithutyana nenkunzi yemvana, ihlosi libuthe netakane, kubuthe ndawonye ithole lenkomo nengonyama entsha enesingci, nesilwanyana esondlekileyo; nenkwenkwana iziqhube ezo zinto.”
Kodwa akuphelelanga apho! Esi sibhalo sihlabela mgama sithi: “Kuya kudla imazi yenkomo nebhere; amathole azo abuthe ndawonye. Kwanengonyama iya kudla iindiza kanye njengenkunzi yenkomo. Umntwana owanyayo ngokuqinisekileyo uya kudlala emngxunyeni wephimpi; nomntwana olunyulweyo abeke isandla sakhe emngxunyeni wenyoka enobuhlungu. Aziyi kwenzakalisa okanye zonakalise entabeni yam yonke engcwele; ngenxa yokuba umhlaba ngokuqinisekileyo uya kuzaliswa kukwazi uYehova njengamanzi egubungele ulwandle.”—Isaya 11:6-9.
Kwihlabathi likaYehova elitsha, abantu abayi kuxinaniselana ezixekweni apho kukho abantu abangenathando ngabanye abantu nangezilwanyana. Liyinyaniso elokuba abantu abaninzi namhlanje bayazithanda izilwanyana zabo yaye banembono elungeleleneyo ngazo. Kodwa khawucinge nje ngethemba elimangalisayo lokuba nobuhlobo nezilwanyana ngonaphakade kwihlabathi elitsha elizaliswe bubulungisa! Indlela eziya kunyanyekelwa ngothando ngayo iya kuzukisa uMdali Ozukileyo owadala zonke izinto.
Ukuba akukafundi ngezinto ezimangalisayo ezithenjiswe nguThixo—njengoMaria osandul’ ukufunda ngazo—siyakumema ukuba uqhagamshelane nabapapashi beli phephancwadi okanye omnye wamaNgqina kaYehova oya kukuvuyela ukukunceda ufunde ngezi zithembiso.
[Umfanekiso okwiphepha 18]
Kwihlabathi likaThixo elitsha, abantu baya kuba nobuhlobo nezilwanyana ngonaphakade