Kuthekani Ngekamva?
Kutheni uxolo phakathi kwabantu namarhamncwa lunqweneleka kangaka? Kungenxa yokuba abantu ekuqaleni babedalelwe ukuba bahlalisane ngoxolo nezilwanyana, kwanezo zigqalwa njengezidlongodlongo.
Xa uThixo wenza indoda nomfazi bokuqala, wababeka kummandla womhlaba oyiparadisi ukuze banandiphe ubomi. Kwakuyinjongo yakhe ngabo ukuba babe nabantwana baze bandise imida yaloo Paradisi yantlandlolo de igubungele umhlaba uphela. Kuloo mmandla uphela, uluntu lwaluza kuhlala nezilwanyana ziluthobela ngoxolo.
Ingxelo yeGenesis ithi: “Mababe nobukhosi ezintlanzini zolwandle, nasezintakeni zezulu, nasezintweni ezizitho zine, nasemhlabeni wonke, nasezinambuzaneni zonke ezinambuzela emhlabeni. . . . Wakubona uThixo konke akwenzileyo, nanko, kulungile kunene.”—Genesis 1:26-31; 2:9.
Oku kuthobela kwezilwanyana kwakungazukuba nogonyamelo. Kwakucetywe ukuba abantu nezilwanyana bahlalisane ngoxolo. Oku kunokubonwa kwisibakala sokuba xa izilwanyana zeziswa phambi komntu ukuba azithiye, wayengaxhobanga. Yaye akuzange kukhankanywe uloyiko olwalubonakaliswa ngumntu okanye lirhamncwa.—Genesis 2:19, 20.
Injongo Yantlandlolo Iza Kuzalisekiswa
Okuvuyisayo kukuba, loo njongo kaThixo yantlandlolo kungekudala iza kufezwa, xa bonke oorhulumente babantu beye bathatyathelwa indawo buBukumkani bukaThixo, obulawula ngokusuka ezulwini. (Daniyeli 2:44; Mateyu 6:9, 10) Xa ulawulo lukaThixo lumiselwe kwakhona ngokupheleleyo phezu komhlaba wonke, injongo kaThixo yantlandlolo ngomhlaba nabantu nezilwanyana ezihlala kuwo iya kuqalisa ukuzaliseka.
Imiphumo yolawulo lukaThixo lobulungisa ebangela iinguqulelo ichazwa kakuhle kwiziprofeto ezininzi zeBhayibhile. Ngokomzekelo, phawula oko uIsaya wakubhalayo ephantsi kwempefumlelo: “Ingcuka iya kuhlala nemvana, ingwe ibuthe netakane lebhokhwe; kubuthe ndawonye ithole lenkomo, nengonyama entsha, nenkomo etyetyisiweyo; nomntwana aziqhube ezo zinto. Ithokazi lenkomo nemazi yebhere ziya kudla utyani ndawonye, amankonyana azo abuthe ndaweni-nye; ingonyama idle umququ njengenkomo; ezo zinto aziyi kwenza bubi, aziyi konakalisa ezintabeni zam zonke ezingcwele; ngokuba ilizwe liya kuzala kukwazi uYehova, njengamanzi egubungele ulwandle.”—Isaya 11:6, 7, 9.
Nezinye iziprofeto zibonisa imiphumo emihle yoxolo eya kubakho kwihlabathi elitsha likaThixo. Kule nkalo uMika waxela kusengaphambili wathi: “Ziwakhande, amakrele azo abe ngamakhuba, nezikhali zazo zibe zizitshetshe zokuthena imidiliya. Uhlanga aluyi kuphakamisela kuhlanga ikrele lalo, bangabi safunda ukulwa. Baya kuhlala elowo phantsi komdiliya wakhe, naphantsi komkhiwane wakhe, kungabikho uboyikisayo.”—Mika 4:3, 4.
Akukho nasinye kwizilwanyana zasendle esiya kuthi ngelo xesha siphazamise uxolo loluntu, kuba ilizwi likaThixo elibuprofeti lithi: “Ndiya kuwenzela umnqophiso woxolo, ndiwaphelise amarhamncwa amabi elizweni, uhlale entlango ukholosile, ulale emahlathini. . . . Banqabe emhlabeni wabo.”—Hezekile 34:25, 27.
Ngoko uxolo nemvisiswano kuyo yonke loo Paradisi ibuyiselweyo luya kuba lolupheleleyo. Kungenxa yoko le nto iimeko apho zinokuchazwa kwincwadi yokugqibela yeBhayibhile ngale ndlela: “Azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile. Waza lowo uhleli phezu kwetrone wathi, Uyabona, izinto zonke ndizenza ntsha. Athi kum, Bhala; ngokuba lawo ngamazwi ayinyaniso, athembekileyo.”—ISityhilelo 21:4, 5.
Ewe, ngamazwi athembekileyo nayinyaniso. Oku kuthetha ukuba sinokuthembela kumadinga kaThixo, kuba ngokungafaniyo nabantu abangafezekanga, unamandla, ubulumko nozimiselo lokuphumeza iinjongo zakhe. Kunjengokuba omnye wabakhonzi bakaThixo abathembekileyo bamandulo wathi: “Akuwanga phantsi nalinye ilizwi emazwini onke alungileyo, abewathethile uYehova uThixo wenu ngani; onke enzekile kuni; akuwanga phantsi nalinye ilizwi kuwo.”—Yoshuwa 23:14; bona kwanoIsaya 55:11.
Sinokuba nentembelo efanayo yokuba kungekudala, kwihlabathi elitsha likaThixo, injongo yakhe yantlandlolo ngalo mhlaba, ngabantu nangezilwanyana iya kuzalisekiswa. Uxolo oluvela kuThixo luya kuba yinto yokwenene emhlabeni wonke. Yaye uxolo olunjalo aluyi kubakho phakathi kwabantu kuphela kodwa luya kubonakaliswa kwanaphakathi kwezilwanyana.