UMoses—Indlela Obukuchaphazela Ngayo Ubomi Bakhe

ABAPHENGULULI nabahlalutyi abaninzi, bagqala uMoses njengomntu wasentsomini. Bayayigatya ingxelo yeBhayibhile, basebenzisa ubungqina obuya kwenza ukuba amadoda afana nooPlato nooSocrates agqalwe njengabantu basentsomini.

Noko ke, njengoko sele sibonile, akukho sizathu sibambekayo sokugatya ingxelo yeBhayibhile ephathelele uMoses. Ngokwahlukileyo koko, kubantu abanokholo, kukho intabalala yobungqina bokuba iBhayibhile iphela ‘lilizwi likaThixo.’a (1 Tesalonika 2:13; Hebhere 11:1) Abantu abanjalo, xa befunda ngobomi bukaMoses abafundi nje kuba bethanda ukufunda, kodwa bafunda ngenjongo yokwakha ukholo.

UMoses Wokwenene

Abenzi bee-movie badla ngokubalaselisa ubukroti nenkalipho kaMoses—mpawu ezo zibangel’ umdla kubaphulaphuli. Kuyavunywa ukuba uMoses wayenenkalipho. (Eksodus 2:16-19) Kodwa eyona nto ibalulekileyo ngaye kukuba wayeyindoda yokholo. UMoses wayekholelwa ngokwenene kuThixo—kangangokuba umpostile uPawulos wathi uMoses “waqhubeka eqinile ngokungathi uyambona Lowo ungabonakaliyo.”—Hebhere 11:24-28.

Ngaloo ndlela uMoses usifundisa ukuba sihlakulele ubuhlobo kunye noThixo. Kubomi bethu bemihla ngemihla, nathi sinokuziphatha ngokunga siyambona uThixo! Ukuba senjenjalo asisayi kuze senze nantoni na engamkholisiyo. Phawula ukuba ukholo lukaMoses lwamiliselwa kuye ngoxa wayeselusana. Ukholo lwakhe lwalunzulu ngokwaneleyo kangangokuba lwaqhubeka lomelele lwakwazi ukumelana nabo “bonke ubulumko bamaYiputa.” (IZenzo 7:22) Olunjani lona ukhuthazo lokuba abazali baqalise ukufundisa abantwana babo ngoThixo ukususela ebusaneni!—IMizekeliso 22:6; 2 Timoti 3:15.

Enye into ephawulekayo kukuthobeka kukaMoses. ‘Wayeyeyona ndoda ilulamileyo kubantu bonke ababephezu komhlaba.’ (Numeri 12:3) Ngaloo ndlela uMoses wayekulungele ukuvuma iimpazamo zakhe. Ubhala nangokusilela kwakhe ukwalusa unyana wakhe. (Eksodus 4:24-26) Ubalisa ngokuphandle ngasihlandlo sithile awasilela ngaso ukuzukisa uThixo nangesohlwayo esinzulu awasifumana kuThixo ngenxa yoko. (Numeri 20:2-12; Duteronomi 1:37) Kwakhona, uMoses wayekulungele ukwamkela amacebiso abanye. (Eksodus 18:13-24) Ngaba bekungayi kuba kuhle ukuba abayeni, ootata namanye amadoda asemagunyeni ebenokulinganisa uMoses?

Liyinyaniso elokuba, abanye abahlalutyi bayakuthandabuza ukululama kukaMoses becaphula inyathelo logonyamelo awalithabathayo. (Eksodus 32:26-28) Umbhali uJonathan Kirsch uthi: “UMoses ekuthethwa ngaye eBhayibhileni wayengathobekanga yaye wayengenabulali, yaye akanakugqalwa njengomntu owayelilungisa. Ngamanye amaxesha xa ephazamisekile, . . . uMoses ubonakala enekratshi, enxanelw’ igazi yaye ekhohlakele.” Ukugxekwa okunjalo kubonisa ukungaphangalali engqondweni. Kusisingela phantsi isibakala sokuba uMoses wayengaqhutywa yinkohlakalo kodwa wayeqhutywa luthando olunzulu ngokusesikweni yaye wayengabunyamezeli ubungendawo. Namhlanje, ngoxa ukuziphatha okubi kuyinto eqhelekileyo, uMoses ungumzekelo wokulondoloza imilinganiselo engaguquguqukiyo yokuziphatha okuhle.—INdumiso 97:10.

Imibhalo KaMoses Ililifa

UMoses washiya imibhalo emininzi ebalaseleyo. Le mibhalo iquka imibongo (Yobhi, INdumiso 90), imbali (Genesis, Eksodus, Numeri), umlibo wokuzalwa (Genesis, isahluko 5, 11, 19, 22, 25) nengqokelela eninzi yemithetho ebizwa ngokuba nguMthetho kaMoses (Eksodus, isahluko 20-40; Levitikus; Numeri; Duteronomi). Le Mithetho iphefumlelwe nguThixo, yayiquka iingcamango, imithetho nemigaqo karhulumente eyayihambele phambili kangangeenkulungwane kuneminye imithetho yelo xesha.

Kumazwe apho umlawuli weLizwe ekwayintloko yeCawa, kubakho ukunganyamezelani ngokuphathelele iimbono zonqulo, ukucinezelwa kwabanquli nokusetyenziswa kakubi kwegunya. UMthetho kaMoses wawuquka umgaqo owawusahlukanisa iCawa noRhulumente. Ukumkani wayengavumelekanga ukuba enze imisebenzi yobubingeleli.—2 Kronike 26:16-18.

UMthetho kaMoses wawuqulethe imibandela yezempilo nendlela yokuthintela izifo, njengokuhlalisa umntu onesifo esasulelayo yedwa nokulahlwa kwelindle lomntu, nto leyo evisisanayo nenzululwazi yanamhlanje. (Levitikus 13:1-59; 14:38, 46; Duteronomi 23:13) Oku kuyancomeka, xa ucinga ukuba amayeza awayesetyenziswa eYiputa ngomhla kaMoses yayiyimixube eyingozi eyenziwe ngabantu abangenalwazi ngamayeza nabaneenkolelo. Namhlanje, kumazwe asakhasayo izigidi zabantu bezinokusinda kwizifo nasekufeni ukuba bekusetyenziswa imilinganiselo yococeko kaMoses.

AmaKristu akanyanzelekanga ukuba alandele uMthetho kaMoses. (Kolose 2:13, 14) Kodwa ukuwufunda kubaluleke kakhulu. UMthetho wawubongoza amaSirayeli ukuba azinikele ngokupheleleyo kuThixo aze aphephe unqulo-zithixo. (Eksodus 20:4; Duteronomi 5:9) Wawuyalela abantwana ukuba bahlonele abazali babo. (Eksodus 20:12) UMthetho wawukugatya ukubulala, ukukrexeza, ukuba, ukuxoka nokubawa. (Eksodus 20:13-17) Loo migaqo ixatyiswe kakhulu ngamaKristu namhlanje.

Umprofeti OnjengoMoses

Siphila kumaxesha embandezelo. Ngokuqinisekileyo uluntu lufuna inkokeli enjengoMoses—umntu ongenamandla negunya nje kuphela kodwa onengqibelelo, inkalipho, imfesane nonothando olusuk’ entliziyweni ngokusesikweni. Kusenokwenzeka ukuba wathi uMoses akufa, amaSirayeli azibuza, ‘Ngaba uya kuze aphinde abekho umntu ofana naye?’ UMoses wawuphendula ngokwakhe loo mbuzo.

Imibhalo kaMoses iyachaza ukuba kwaqala njani ukugula nokufa, ichaza nesizathu sokuba uThixo avumele ubungendawo buqhubeke. (Genesis 3:1-19; Yobhi, isahluko 1, 2) KwiGenesis 3:15, kubhalwe isiprofeto sikaThixo sokuqala ngqa—isithembiso sokuba ubungendawo buya kushenxiswa ekugqibeleni! Njani? Esi siprofeto sabonisa ukuba kwakuya kuzalwa umntu olwaluya kuza ngaye usindiso. Esi sithembiso sanika ithemba lokuba kwakuya kuvela uMesiya aze akhulule uluntu. Kodwa ngubani owayeza kuba nguMesiya? UMoses usinceda sikwazi ukumbona kakuhle.

Xa wayesele eza kufa, uMoses wathetha la mazwi abuprofeti: “UYehova uThixo wakho uya kunivelisela umprofeti, phakathi kwenu, kubazalwana benu, onjengam—nize nimphulaphule.” (Duteronomi 18:15) Kamva, umpostile uPetros wawasebenzisa ngokuthe ngqo loo mazwi kuYesu.—IZenzo 3:20-26.

Abahlalutyi abaninzi abangamaYuda bayikhaba ngaw’ omane eyokuba kukho izinto abafana ngazo uMoses noYesu. Bathi la mazwi akule ndinyana abhekisela nakuwuphi na umprofeti wenyaniso owalandela emva koMoses. Noko ke, ngokutsho kwe-Tanakh—The Holy Scriptures, ebhalwe yi-Jewish Publication Society, iDuteronomi 34:10 ithi: “Akubanga savela kwaSirayeli mprofeti unjengoMoses—eyathi INKOSI yamnyula, ubuso ngobuso.”

Ewe, abaprofeti abaninzi abathembekileyo, njengoIsaya noYeremiya balandela emva koMoses. Kodwa akukho namnye kubo owaba nolwalamano olukhethekileyo noThixo njengoMoses—owayethetha naye “ubuso ngobuso.” Ngoko ke, mnye umntu esinokuba sibhekisela kuye isithembiso sikaMoses somprofeti ‘onjengaye’—nguMesiya! Kubonakala ukuba ngaphambi kokubakho kobuKristu—nokutshutshiswa kwabanquli ngamaKristu obuxoki—abaphengululi abangamaYuda babezibona ngendlela efanayo izinto. Oku kunokubonwa kwiincwadi zamaYuda, njenge-Midrash Rabbah, echaza uMoses njengomanduleli “woMhlawuleli wamva,” okanye uMesiya.

Isibakala sokuba uYesu wayefana noMoses ngeendlela ezininzi asinakukhanyelwa. (Bona ibhokisi ethi “UYesu—Umprofeti OnjengoMoses.”) UYesu unamandla negunya. (Mateyu 28:19) UYesu ‘unomoya wobulali, uthobekile ngentliziyo.’ (Mateyu 11:29) UYesu uluthiyile ulwaphulo-mthetho nokungekho sikweni. (Hebhere 1:9) Ngoko ke, unako ukusilawula ngohlobo lolawulo esilunqwenelayo! Nguye oza kubususa neengcambu ubungendawo kungekudala, aze enze umhlaba ube yiParadesi echazwa yiBhayibhile.b

[Imibhalo esemazantsi]

[Ibhokisi ekwiphepha 28]

UMoses—Inyaniso Nxamnye Nentsomi

Indlela aboniswa ngayo uMoses kwiifilim iye yangunozala weentsomi neengcamango ezininzi ezingachananga. Nazi ezimbalwa zazo:

Intsomi: UMoses wayengazazi ukuba wayengumYuda ngokwemvelo.

Inyaniso: UMoses wayesanyiswa ngunina ongumYuda yaye kubonakala ukuba wamanyisa iminyaka eliqela. IZenzo 7:23-25 zibonisa ukuba uMoses wayegqala amakhoboka angamaYuda ‘njengabazalwana bakhe.’

Intsomi: UMoses wayefuna isikhundla sobukhosi eYiputa.

Inyaniso: IBhayibhile ayithethi ngaloo nto. I-Daily Bible Illustrations, ebhalwe nguJohn Kitto, ithi akukho sizathu sokukholelwa ukuba uMoses “waba yindlalifa yolawulo ngenxa yokukhuliselwa kwakhe ebukhosini. . . . Akubonakali ngathi iindlalifa zolawulo zazimbalwa kwelo.”

Intsomi: UMoses wabuyela eYiputa ukuze aye kuqubisana notshaba lwakhe.

Inyaniso: IBhayibhile ithi ekubuyeni kwakhe, zonke iintshaba zakhe zazisele zalala kobandayo.—Eksodus 4:19.

Intsomi: UThixo waqala ukuthetha ngeMithetho Elishumi emva kokuba uMoses enyuke iNtaba iSinayi.

Inyaniso: IMithetho Elishumi yachazwa nguThixo ngengelosi yakhe, ebhekisa kuhlanga lwakwaSirayeli luphela. Emva koko, amaSirayeli awayegubha luloyiko acela uMoses ukuba anyuke aye kuwathethelela.—Eksodus 19:20–20:19; 24:12-14; IZenzo 7:53; Hebhere 12:18, 19.

Intsomi: UFaro wasinda xa kwakutshatyalaliswa umkhosi wakhe kuLwandle Olubomvu.

Inyaniso: “UFaro nomkhosi wakhe wamajoni” batshabalala kuLwandle Olubomvu.—Eksodus 14:28; INdumiso 136:15.

[Ibhokisi ekwiphepha 29]

UYesu—Umprofeti OnjengoMoses

Nazi ezinye zezinto awayefana ngazo uYesu noMoses:

▲ Bobabini uMoses noYesu basinda ekubulaweni kweentsana ezingamakhwenkwe, kubulawa oko kwakungumyalelo womlawuli welo xesha.—Eksodus 1:22; 2:1-10; Mateyu 2:13-18.

▲ UMoses wabizwa eYiputa ‘nezibulo’ likaYehova, uhlanga lwakwaSirayeli. UYesu wabizwa eYiputa njengoNyana olizibulo likaThixo.—Eksodus 4:22, 23; Hoseya 11:1; Mateyu 2:15, 19-21.

▲ Bobabini uMoses noYesu bazila ukutya kangangeentsuku ezingama-40 entlango.—Eksodus 34:28; Mateyu 4:1, 2.

▲ UMoses noYesu babelulamile yaye bethobekile.—Numeri 12:3; Mateyu 11:28-30.

▲ UMoses noYesu benza imimangaliso.—Eksodus 14:21-31; INdumiso 78:12-54; Mateyu 11:5; Marko 5:38-43; Luka 7:11-15, 18-23.

▲ Bobabini uMoses noYesu babengabalamli kumnqophiso phakathi koThixo nabantu Bakhe.—Eksodus 24:3-8; 1 Timoti 2:5, 6; Hebhere 8:10-13; 12:24.

[Imifanekiso ekwiphepha 26]

NguYesu kuphela owayengumprofeti onjengoMoses

[Umfanekiso okwiphepha 28]

Imigaqo yezempilo ekuMthetho kaMoses inokuba luncedo ekuthinteleni izifo