Libambe Ixesha!
“UKUNGALIBAMBI IXESHA yingxaki eqhelekileyo yabaphathi beenkampani,” itsho njalo iUSA Today. Icaphula uhlolisiso olwenziwa kubaphathi abaziintloko abangama-2 700, yathi: “Bafika emva kwexesha kwiintlanganiso ezintandathu kwezili-10.”
Kwezoshishino, ukungalibambi ixesha akugqalwa njengokuba krwada nje kuphela. Kuhlolisiso olwenziwa kubantu abafuna umsebenzi abangama-81 000 kwathiwa: “Iiyure ezihamba nje ngenxa yokungabanjwa kwexesha nokungabikho emsebenzini ngaphandle kwemvume zezona zinto zibangela ilahleko eninzi.” Kakade ke, ukungabanjwa kwexesha akubangeli iingxaki kwezoshishino nje kuphela. Uhlolisiso olwenziwa kwiinqununu zezikolo zamabanga aphakathi lwabonisa ukuba “ukungabanjwa kwexesha ngabafundi yeyona nto iphambili ibonisa ukungabikho kwengqeqesho.”
UMdali wethu wayefuna siliphaphele ixesha. Wenza “izikhanyiso ezibini ezikhulu”—ilanga nenyanga—ukuze zisincede sazi ixesha. (Genesis 1:14-16) Namhlanje, kukho izinto zokujonga ixesha ezenza sikwazi ukubala ixesha ngemizuzu nemizuzwana. Noko ke, phezu kwabo nje obo bugcisa, uninzi lwethu alukwazi ukufika ngexesha—emsebenzini, esikolweni nakwezinye iindawo ezibalulekileyo.
Ngaba ingxaki kukungabi naxesha laneleyo? Kuyavunywa ukuba iingxaki zomsebenzi nezentsapho zinokumthez’ amandla umntu. Sekunjalo, omnye umama osebenzayo ogama linguWanda Rosseland uthi: “Ndayeka ukukhala ngokungabi naxesha laneleyo ndakuqonda ukuba wonke umntu uneeyure ezingama-24 ngosuku. Ndiye ndacingisisa nzulu ngalo mbandela ndaza ndafikelela kwisigqibo sokuba kwihlabathi esiphila kulo, ingxaki asiloxesha lincinane, kodwa zizinto ezininzi ezisiphazamisayo.”
Kwakhona khawucinge ngoRenee,a umama onabantwana abahlanu ongomnye wamaNgqina kaYehova. Uthi: “Xa abantwana bam babesebancinane, kwakulucelomngeni ukubalungisa xa besiya esikolweni nakwiintlanganiso zamaKristu. Sekunjalo kwakungeyongxaki ukufika kwangethuba. Kodwa ngoku bakhulileyo, ndinomkhwa ombi wokungalibambi ixesha.” Ngaba nawe unalo mkhwa mbi? Ukuba kunjalo, unako ukutshintsha! Nazi ezinye izinto onokuzenza.
● CINGA NGEMIPHUMO. Umkhwa wokungalibambi ixesha usenokubonakala njengento encinane. Kodwa khawucinge ngamazwi eBhayibhile athi: “Iimpukane ezifileyo ziyibangela inuke kakubi ioli yomenzi wezithambiso, yaye ibile. Benza ngokukwanjalo ubudenge obuncinane koxabisekileyo ngobulumko nozuko.” (INtshumayeli 10:1) Ewe, “ubudenge obuncinane,” njengokungabahloneli abanye, kunokukwenzela igama elibi kumfundisi-ntsapho okanye umqeshi wakho.
Ngoxa lalifunda kwikholeji yasekuhlaleni, ibhinqa elinguMarie laphawula ukuba abanye abafundi “abalikhathalele ixesha,” yaye babedla ngokufika sele ziqalile izifundo. “Kodwa kwanyanzeleka ukuba batshintshe ngokukhawuleza,” utsho njalo. “Oonjingalwazi ababini babengqongqo xa kusiziwa kumbandela wexesha. Ngoko ukuba umfundi ufike emva kwexesha ngemizuzu embalwa, wayegqalwa njengongekhoyo. Yaye ukungabikho izihlandlo eziliqela kwakunokubangela angaphumeleli.”
Ukungalibambi ixesha kunokukwenzela igama elibi kubahlobo nakoontanga bakho. UJoseph, osele ebuqina ukhumbula umKristu awayemazi kumashumi eminyaka eyadlulayo. Nangona le ndoda yayihlonelwa ngenxa yendlela eyayifundisa ngayo, yayinomkhwa ombi. “Yayingalibambi ixesha,” utsho uJoseph. “Yayifika emva kwexesha kuyo yonk’ into! Yaye loo nto yayibonakala ingayikhathazi. Abantu babethanda ukuhlekisa ngokungakwazi kwayo ukubamba ixesha.” Ngaba abantu bakwazi njengomntu ongalibambiyo ixesha? Ukuba kunjalo, basenokungaziboni iimpawu zakho ezintle.
● BACINGELE ABANYE. Ukungalibambi ixesha bubukrwada yaye kuyabaphazamisa abanye. Yaye kusenokwenza abanye bacinge ukuba uzenza bhetele. Ecacisa isizathu sokuba abaphathi bamashishini abaninzi bangalibambi ixesha xa besiya kwiintlanganiso, omnye usomashishini wathi: “Inkoliso yethu izele likratshi.” Ngokwahlukileyo koko, amaKristu agqala abanye njengabongamileyo kubo. (Filipi 2:3) Kwakhona, asebenzisa uMthetho Omkhulu aze aphathe abanye ngendlela ebeya kuthanda ukuphathwa ngayo nawo. (Mateyu 7:12) Ngaba ayikucaphukisi into yokulinda abanye abantu? Ukuba kunjalo, nabanye abantu mabangami ngawe.
● ZIFUNDISE UKUBAMBA IXESHA. Ngaba ungumntu ozibekela amangomso izinto uze ugxabhagxabhise ngomzuzu wokugqibela? Ngaba uye ucebe ukwenza izinto ezininzi ngexesha nje elifutshane? Umgaqo ofumaneka kwiNtshumayeli 3:1 unokukunceda: “Yonke into inexesha layo elimisiweyo.” Ukuba ‘nexesha elimisiweyo’ lokwenza izinto kubangela uzenze ngolungelelwano.
Okokuqala, bhala zonke izinto ofuna ukuzenza. Wandule ulandele umgaqo ofumaneka kweyabaseFilipi 1:10 othi: “Niqiniseke ngezinto ezibaluleke ngakumbi.” Ewe, beka izinto ezibalulekileyo kwindawo yokuqala. Yintoni efanele yenziwe nakanjani na? Ziziphi izinto ezinokubekelwa ixa elizayo? Okokugqibela, hlola ukuba kuza kuthabatha ixesha elingakanani ukwenza ezo zinto nokuba unokuzenza nini. Sebenzisa ingqiqo uze uphephe ukufuna ukwenza izinto ezininzi ngexesha elifutshane.
Ibhinqa elinguDorothy lithi abazali balo balifundisa ukubamba ixesha. Lithi: “Xa kwakufuneka sibe kwintlanganiso yamaKristu nge-7:30 ngokuhlwa, umama wayeqala ukusilungisa kwisithuba esingangeyure nemizuzu engama-45 ngaphambi kwelo xesha. Sasilungiselela ukuba nexesha lokutya isidlo sangokuhlwa, lokuhlamba izitya, lokunxiba nelokuya kwiintlanganiso. Ukubamba ixesha kwade kwasegazini kuthi.” Maxa wambi kuyanceda ukuba nexesha elaneleyo ukulungiselela nantoni na enokuvela. UDorothy uthi: “Kutshanje kuye kwafuneka ndidlule ngabantu abathile xa ndisiya kwiintlanganiso. Endleleni kwagqabhuka ivili. Lalungiswa, kodwa ndaba nalo ixesha lokudlula ngabo bantu. Uyabona, ndisoloko ndilungiselela ukuba xa kunokuvela ingxaki kwinqwelo-mafutha okanye ndilibaziseke endleleni, ndibe nexesha elaneleyo.”
● FUNA AMACEBISO KWABANYE. KwiMizekeliso 27:17 iBhayibhile ithi: “Intsimbi, ilolwa ngentsimbi. Ngoko umntu ulola ubuso bomnye.” Ngokuvumelana nalo mgaqo, thetha nabanye abakwimeko efanayo neyakho—kodwa abakwaziyo ukubamba ixesha. Badla ngokuba namacebiso aluncedo amaninzi.
URenee, ocatshulwe ngaphambili uzimisele ukutshintsha umkhwa wakhe wokungalibambi ixesha. Uthi: “Ndenze isigqibo sokuba ndiphucule. Nangona kungelula, ndenza inkqubela.” Nawe unako ukuphucula. Xa unesimo sengqondo esifanelekileyo yaye uzimisele, unokufunda ukubamba ixesha!
[Umbhalo osemazantsi]
a Abanye asingomagama abo la.
[Imifanekiso ekwiphepha 16]
Ukungalibambi ixesha kunokukwenzela igama elibi kubaqeshi bakho yaye kubonisa ukungabakhathaleli abanye
[Umfanekiso okwiphepha 17]
Ukucwangcisa izinto kunokukunceda uphephe ukuchitha ixesha