Ndingalisebenzisa Kakuhle Njani Ixesha Lam?

• Kutheni kufuneka ulisebenzise kakuhle ixesha lakho?

• Into onokuyenza

• Oko kuthethwa ngoontanga bakho

Kutheni kufuneka ulisebenzise kakuhle ixesha lakho?

• Ixesha liyafana nemali. Ukuba awulisebenzisi kakuhle lingaphela. Kodwa ukuba uceba ukulisebenzisa kakuhle ixesha lakho uza kuba nexesha elaneleyo lokwenza nezinye izinto ozithandayo!

  Umgaqo weBhayibhile: “Umntu olivila uyarhala, abe engenanto, kodwa okhutheleyo uza kwanela ngokupheleleyo.”—IMizekeliso 13:4

  Eyona nto siyithethayo: Xa ukwazi ukulisebenzisa kakuhle ixesha uza kutsho ube nexesha elaneleyo lokwenza ezinye izinto.

• Indlela olisebenzisa kakuhle ngayo ixesha inokukunceda naxa sele ukhulile. Ingakunceda ungagxothwa nasemsebenzini. Ngokomzekelo, ngaba ubuya kumgcina umsebenzi ongafiki ngexesha emsebenzini?

  Umgaqo weBhayibhile: “Umntu othembekileyo kwezona zinto zincinci uthembekile nakwezona zinkulu.”—Luka 16:10

  Eyona nto siyithethayo: Ukukwazi ukulisebenzisa kakuhle ixesha kubonisa ukuba ungumntu onjani.

Xa sithetha inyani, akusoloko kulula ukulisebenzisa kakuhle ixesha. Khawujonge ezi zinto zisenokuba yingxaki.

Ingxaki #1: Abahlobo

“Xa abahlobo bam befuna siphume ndiye ndizame ukuhamba nabo, nokuba andinalo ixesha. Ndiye ndicinge ukuba xa ndifika endlini ndiza kukhawuleza ndizenze izinto endifanele ukuba ndiyazenza. Le nto ayisoloko isebenza ibe ingamosha nezinye izinto.”—UCynthia.

Ingxaki #2: Izinto eziphazamisayo

“ITV ifana nomtshini ofunxa inkunkuma. Iyalifunxa ixesha ngeenkqubo neemuvi ekunzima ukungazibukeli.”—UIvy.

“Ndiye ndichithe iiyure ezininzi ndikwitablethi yam. Ndiye ndibe nesazela kuba eyona nto ide indiyekise kukuphela kwebhetri.”—UMarie.

Ingxaki #3: Ukulibazisa

“Ndiye ndilibazise ekwenzeni umsebenzi wam wesikolo, nakwezinye izinto endimele ndizenze. Ndiye ndichithe ixesha elininzi ndisenza ezinye izinto kube kufuneka ndiwugqibe umsebenzi wesikolo—leyo ayondlela yokulisebenzisa kakuhle ixesha.”—UBeth.

Into onokuyenza

1. Bhala phantsi izinto ekufuneka uzenze. Ungabhala izinto ekufuneka uzenze ekhaya nomsebenzi wesikolo. Kwinto nganye bhala ukuba uza kudinga ixesha elingakanani ukuze uzigqibe, ubhale izinto zeveki yonke.

   Umgaqo weBhayibhile: “Niqiniseke ngezona zinto zibalulekileyo.”—Filipi 1:10.

2. Bhala phantsi izinto oye uzenze xa kungekho nto uyenzayo. Apha ungabhala izinto ezifana nokusebenzisa iiwebhsayithi zokuncokola nokusebenzisa i-TV. Kwakhona, bhala ukuba uzisebenzisa kangaphi ngeveki.

   Umgaqo weBhayibhile: “Yibani nobulumko . . . , nilisebenzisa kakuhle ixesha lenu.”—Kolose 4:5.

3. Plana kakuhle. Khawuphinde ujonge ezi zinto zimbini uzibhalileyo apha ngasentla. Ngaba izinto ezibalulekileyo uzibekele ixesha elaneleyo? Ngaba umele uthathe kwelinye lexesha obuza kwenza ngalo izinto ozithandayo?

   Icebiso: Bhala phantsi izinto ekuza kufuneka uzenze ngosuku, uze umane utikisha xa ugqibe enye.

   Umgaqo weBhayibhile: “Amacebo omntu okhutheleyo aza kumenza aphumelele ngokuqinisekileyo.”—IMizekeliso 21:5.

4. Zenze izinto ozicebileyo. Yinyani kona ukuba kusenokufuneka ngamanye amaxesha ungavumi xa umenywa kwindawo ethile, uze ukwazi ukwenza ezona zinto ezibalulekileyo. Kodwa, uza kufumanisa ukuba unexesha elininzi lokonwaba.—

   Umgaqo weBhayibhile: “Khuthalani, ningabi ngamavila.”—Roma 12:11.

5. Zivise kamnandi—kodwa ungangxami. Elinye ibhinqa elinguTara lithi: “Ngamanye amaxesha ndiye ndigqibe ukwenza izinto ezimbini kwezo bendigqibe ukuba ndiza kuzenza, emva koko ndiqonde ukuba makhe ndibukele iTV nokuba yimizuzu nje eyi-15 emva koko ndize ndibuyele emsebenzini. Ndiye ndiyibukele lo mizuzu, eyi-15 ndiyibone sele iyi- 30 ndisajonge leyo ibeyiyure. Ndithi ekugqibeleni xa ndijonga ndifumanise ukuba ndisebenzise iiyure ezimbini zonke oko ndibukele iTV”.

   Eyona nto onokuyenza kukujonga ukuzonwabisa njengento yokuzivisa kamnandi emva kokuba ugqibe imisebenzi yakho_ngakujongi njengento enyanzelekileyo ukuba uyenze.

   Umgaqo weBhayibhile: “Akukho nto imnandi emntwini . . . Nokonwabela ukusebenza nzima.”—INtshumayeli 2:24.