Imbono YeBhayibhile
Ngaba Ukuxhalaba Kubonisa Ukungabi Nakholo?
“AKUVUMELEKANGA UKUXHALABA.” Phantsi kwalo mxholo, umfundisi wenkulungwane yama-20 wabhala wathi ukuxhalabela izinto eziphathekayo akuyonto nje ephosakeleyo, kodwa “kusisono esinzulu.” Kutshanje, omnye umcholacholi weendaba owayebhala ngombandela wokulwa nexhala wathi, “Ukuxhalaba kubonisa ukungamthembi uThixo.”
Kuzo zombini ezi meko, aba babhali bafikelela kwisigqibo sabo ngenxa yeNtshumayelo kaYesu yaseNtabeni awathi kuyo: ‘Musani ukuxhalaba.’ (Mateyu 6:25) Ekubeni bebaninzi kangaka abantu abaxhalabileyo namhlanje, usenokubuza: Ngaba amaKristu afanele azive enetyala ngenxa yokuxhalaba? Ngaba ukuxhalaba kubonisa ukungabi nakholo?
UThixo Uyabuqonda Ubuthathaka Bethu
IBhayibhile ayifundisi ukuba ukuxhalaba kubangelwa kukungabi nakholo. Ekubeni siphila ‘kumaxesha amanqam ekunzima ukujamelana nawo,’ asinakukuphepha ngokupheleleyo ukuxhalaba. (2 Timoti 3:1) Mihla le, amaKristu athembekileyo axhalatyiswa yimpilo enkenenkene, ukwaluphala, imeko yezoqoqosho, iingxabano zentsapho, ulwaphulo-mthetho nezinye iingxaki. Namandulo, abakhonzi bakaThixo babesiba nazo iingxaki nezinto ezibaxhalabisayo.
Khawucinge ngengxelo yeBhayibhile ephathelele uLote. UThixo wamyalela ukuba asabele kummandla weentaba ukuze asinde xa kutshatyalaliswa iSodom neGomora. Noko ke, uLote waxhalaba. Wathi: “Hayi, khawuncede, Yehova!” Emathidala wahlabela mgama wathi: “Mna—andinakukwazi ukubalekela kummandla weentaba, kuba hleze ndehlelwe yintlekele ndize ndife ngokuqinisekileyo apho.” Yintoni eyayisenza uLote oyike ukusabela kummandla weentaba? IBhayibhile ayisichazi isizathu. Kodwa nokuba siyintoni na, uLote wayesoyika. UThixo wasabela njani? Ngaba uThixo wamohlwaya uLote ngenxa yokungabi nakholo okanye intembelo kuye? Akunjalo. Ngokwahlukileyo koko, uYehova waba novelwano waza wamvumela uLote ukuba asabele kwisixeko esikufuphi.—Genesis 19:18-22.
EBhayibhileni kukho neminye imizekelo yabakhonzi abathembekileyo ababa nexhala ngaxa lithile. Umprofeti uEliya woyika waza wasaba emva kokusongelwa ngokubulawa. (1 Kumkani 19:1-4) UMoses, uHana, uDavide, uHabhakuki, uPawulos namanye amadoda namabhinqa awayenokholo oluqinileyo akha axhalaba. (Eksodus 4:10; 1 Samuweli 1:6; INdumiso 55:5; Habhakuki 1:2, 3; 2 Korinte 11:28) Sekunjalo, uThixo waba novelwano waza waqhubeka ewasebenzisa kwinkonzo yakhe, ngaloo ndlela ebonisa ukuba uyayiqonda imeko yabantu abangafezekanga.
‘Isono Esisithandela Ngokulula’
Noko ke, ukusoloko sixhalabile kunokubangela singabi nakholo size singabi nantembelo kuThixo. Umpostile uPawulos wathi ukungabi nakholo ‘sisono esisithandela ngokulula.’ (Hebhere 12:1) Ngokuziquka, kusenokwenzeka ukuba uPawulos wayevuma ukuba naye ngamathub’ athile wayekhe ‘athandelwe lula’ ngumgibe wokungabi nakholo lwaneleyo.
Mhlawumbi yiloo nto eyabangela uZekariya akayikholelwa ingelosi eyayimxelela ukuba umfazi wakhe uza kukhulelwa. Ngesinye isihlandlo, abapostile bakaYesu abazange bakwazi ukuphilisa umntu othile ngenxa ‘yokholo lwabo oluncinane.’ Sekunjalo, aba bantu baqhubeka bekholekile kuThixo.—Mateyu 17:18-20; Luka 1:18, 20, 67; Yohane 17:26.
Kwelinye icala, iBhayibhile iqulethe imizekelo yabantu abangazange baqhubeke benentembelo kuThixo baza bavuna imiphumo ebuhlungu yoko. Ngokomzekelo, amaSirayeli amaninzi aphuma eYiputa akazange avunyelwe ukungena kwiLizwe Lesithembiso ngenxa yokungabi nakholo kwawo. Ngesinye isihlandlo ade athetha ngokunxamnye noThixo esithi: “Yini na ukuba nisinyuse eYiputa ukuba size kufela entlango? Ngokuba akukho sonka namanzi apha.” Ukubonisa ukuba wayengakuthandi oku, uThixo wawohlwaya ngokuthumela iinyoka ezinobuhlungu.—Numeri 21:5, 6.
Abemi bedolophu yakuloYesu, iNazarete, baphoswa lilungelo lokubona imimangaliso engakumbi isenziwa kwindawo yabo ngenxa yokungabi nakholo kwabo. Ngapha koko, uYesu wasigxeka kabukhali isizukulwana esigwenxa selo xesha ngenxa yokungabi nakholo kwaso. (Mateyu 13:58; 17:17; Hebhere 3:19) Ngokufanelekileyo ke ngoko, umpostile uPawulos walumkisa wathi: “Lumkani, bazalwana, kungaveli nakuwuphi na kuni onentliziyo engendawo eswele ukholo ngokuthi imke kuThixo ophilayo.”—Hebhere 3:12.
Ewe, kwiimeko ezigqithiseleyo, ukungabi nakholo kunokubangelwa yintliziyo embi. Kodwa kwakungenjalo kumzekelo kaZekariya nowabafundi bakaYesu okhankanywe ngaphambili. Ukungabi nakholo kwabo kwakubangelwa bubuthathaka bokwexeshana. Indlela ababephila ngayo yayibonisa ukuba ‘basulungekile entliziyweni.’—Mateyu 5:8.
UThixo Uyazazi Iimfuno Zethu
IZibhalo ziyasinceda sikwazi ukwahlula phakathi kokuxhalaba okuqhelekileyo nesono sokungabi nakholo. Ukuxhalaba okanye ukungabi nakholo ngamathub’ athile ngenxa yobuthathaka benyama akufanelanga kugqalwe njengokungabi nantembelo kuThixo okubangelwa yintliziyo embi neneenkani. Ngoko amaKristu akafanelanga azive enetyala ngokugqithiseleyo xa exhalaba ngamaxesh’ athile.
Sekunjalo, kufuneka silumke singafane sixhalatyiswe nazizinto ezincinane de ixhala lilawule ubomi bethu. Ngoko ke, sifanele sithobele amazwi obulumko kaYesu athi: “Musani ke ukuxhala nisithi, ‘Siza kudla ntoni na?’ okanye, ‘Siza kusela ntoni na?’ okanye, ‘Siza kunxiba ntoni na?’” Wandula wathetha la mazwi athuthuzelayo: “Kuba uYihlo osemazulwini uyazi ukuba ziyimfuneko kuni zonke ezi zinto. Qhubekani, ke ngoko, nifuna kuqala ubukumkani nobulungisa bakhe, yaye zonke ezinye izinto ziya kongezelelwa kuni.”—Mateyu 6:25-33.
[Umfanekiso okwiphepha 16]
Zazikho izinto ezazixhalabisa umpostile uPawulos