Indlela Yokuhlakulela Ukuthanda Ukufunda
“Mfundise umntwana ngendlela efanele umntwana, naxa athe wamkhulu, akasayi kumka kuyo.”—IMIZEKELISO 22:6, IBHAYIBHILE YESIXHOSA.
NGABA wakha wazama ukulalisa abantwana ngoxa kukho into ebangel’ umdla eyenzekayo? Nangona bediniwe, belila yaye becaphuka, baya kuzama ukuhlala bethe qwa yaye bebandakanyekile kuloo nto yenziwayo. “Bafuna ukuqonda ihlabathi abakulo nokuba nobuchule bokwenza izinto kanye njengokuba befuna ukutya okanye ukuphumla okanye ukulala. Maxa wambi banokufuna ukuqonda ihlabathi abakulo ukodlula zonke ezi zinto,” utsho njalo umbhali uJohn Holt.
Ucelomngeni abajamelene nalo abantwana kukuba baqhubeke bekuthanda ukufunda ubomi babo bonke, naxa besahamba isikolo. Nangona kungekho ndlela ikhethekileyo inokulandelwa ukuqinisekisa impumelelo, zikho iindlela eziye zaluncedo abanokuzisebenzisa abazali, abafundisi-ntsapho nabantwana. Noko ke, eyona ndlela ibaluleke ukodlula zonke kukubonisa uthando.
Bonisa Uthando Ukuze Baphumelele
Abantwana bayalufuna uthando lwabazali. Lubenza bazive benqabisekile, nto leyo ebenza bancokole ngokukhululekileyo nabo, bababuze imibuzo baze babe nomdla wokufunda. Uthando lwenza abazali bancokole rhoqo nabantwana babo baze babe nomdla kwimfundo yabo. Uphando lubonisa ukuba “abazali ngabona baphembelela abantwana ukuba babe nomdla wokufunda,” itsho njalo incwadi ethi Eager to Learn—Helping Children Become Motivated and Love Learning. Abazali baba nempembelelo ngakumbi xa besebenzisana nabafundisi-ntsapho. Kwale ncwadi ithi: “Ayikho into ekhuthaza abantwana ukuba bafunde ukodlula intsebenziswano yabazali nabafundisi-ntsapho.”
Kwakhona abazali banempembelelo kwindlela abafunda ngayo abantwana babo. Kuphando olwathabatha ixesha elide olwenziwa kwiintsapho ezingama-43, olukhankanywe kwincwadi ethi Inside the Brain, abaphandi “bafumanisa ukuba abantwana ababencokola rhoqo nabazali babo [kwiminyaka emithathu yokuqala yobomi babo] bakrelekrele ukodlula abantwana ababengafane bancokole nabazali babo.” Le ncwadi yalek’ umsundulo ngelithi “abazali abancokola rhoqo nabantwana babo bayabancoma xa besenza inkqubela, baphendule imibuzo yabo, banikele ulwalathiso kunokuba banikele imiyalelo yaye basebenzisa amagama ngeendlela ezahlukahlukeneyo.” Ukuba ungumzali, ngaba uncokola rhoqo nabantwana bakho ngendlela eyakhayo?
Uthando Lwenza Ube Nobubele Nokuqonda
Abantwana abafani ngobuchule yaye batyekele kwizinto ezahlukileyo. Ngokuqhelekileyo, abazali abayi kuvumela oku kungafani kuchaphazele indlela ababathanda ngayo abantwana babo. Noko ke, kwihlabathi esiphila kulo ukuxabiseka komntu kudla ngokuxhomekeka kubuchule bakhe, nto leyo inokubangela abanye abantwana “bacinge ukuba ukuze baxabiseke kufuneka bagqwese,” itsho njalo incwadi ethi Thinking and Learning Skills. Oku kwenza abantwana “basoloko bexhalabele ukuphumelela” yaye oku kunokubenza baxinezeleke ngokungeyomfuneko. Iphephancwadi ekuthiwa yi-India Today lithi ukufuna ukugqwesa esikolweni nokungaxhaswa yintsapho, kugqalwa njengeyona nto ibangela ukuba umlinganiselo wokuzibulala kwabakwishumi elivisayo eIndiya uphindaphindeke kathathu kule minyaka ingama-25 edluleyo.
Kwakhona, abantwana basenokukhathazeka xa kusithiwa “zizidenge” okanye “abanangqondo.” Kunokuba kubakhuthaze, ukubabiza ngaloo magama ahlabayo kubenza bangakuthandi ukufunda. Noko ke, umzali onothando ufanele abe nobubele, axhase imigudu yomntwana yokufunda—ngokwamandla akhe kungekhona ngenxa yokoyika ukuhlekwa. (1 Korinte 13:4) Ukuba umntwana unengxaki, abazali abanothando bafanele bazame ukumnceda, bangamenzi azive esisidenge okanye engungantweni. Liyinyaniso elokuba, oku kufuna umonde nobuchule, kodwa oko kuwufanele umzamo. Umntu uluhlakulela njani olo thando? Ukuba nembono yokomoya linyathelo lokuqala elibalulekileyo.
Ukuba Nembono Yokomoya Kubangela Ulungelelwano
Ukuba nembono yokomoya esekelwe eBhayibhileni kubalulekile ngenxa yezizathu ezininzi. Phakathi kwezinye, kusinceda sikhumbule ukuba nangona imfundo yehlabathi ibalulekile, ayibalulekanga ukodlula yonk’ into. Ngokomzekelo, ukwazi izibalo kuyingenelo kwizinto ezininzi, kodwa akumenzi ubani aphile ngemilinganiselo efanelekileyo.
Kwakhona, iBhayibhile isikhuthaza ukuba silungelelane kwixesha esilichitha sifundela umsebenzi wokuziphilisa, ithi: “Ukwenza iincwadi ezininzi akupheli, yaye ukuzinikela kakhulu kuzo kudinisa inyama.” (INtshumayeli 12:12) Yinyaniso ukuba abantwana kufuneka babe nemfundo esisiseko efanelekileyo, kodwa oku akufanele kuthabathe lonke ixesha labo. Bayalifuna ixesha lokwenza ezinye izinto, ingakumbi izinto zokomoya, zona ezichaphazela ubuntu babo.
Enye inkalo efundiswa yiBhayibhile kukuthozama. (Mika 6:8) Abantu abathozamileyo bayazi ukuba ubuchule babo bulinganiselwe, yaye abanawo umoya wokhuphiswano nokufuna ukugqwesa okukhuthazwa ngamaziko emfundo amaninzi namhlanje. I-India Today ithi zezi zinto kanye “ezibangela abantu banxunguphale.” Enokuba sibancinane okanye sikhulile ngeminyaka, siyonwaba xa sithobela eli cebiso leBhayibhile liphefumlelweyo: “Masingazigwagwisi, sikhuphisana, simonelana.” “Kodwa ngamnye makangqine oko ukuko umsebenzi wakhe, uya kwandula ke abe nesizathu sokugcoba ngaye siqu, kungekhona ngokuzithelekisa nomnye umntu.”—Galati 5:26; 6:4.
Abazali banokukusebenzisa njani oku xa befundisa abantwana babo? Enye indlela kukukhuthaza umntwana ukuba azibekele usukelo yaye angazithelekisi namntu. Ngokomzekelo, ukuba umntwana wakho usandul’ ukuvavanywa kwizibalo okanye ekubhaleni amagama, mkhuthaze ukuba athelekise iziphumo zolo vavanyo nezexesha elidluleyo. Emva koko mncome okanye umkhuthaze. Ngaloo ndlela, uyamnceda aqhele ukuzibekela usukelo anokulufikelela, ahlole inkqubela yakhe aze aphucule apho asilela khona kodwa akumthelekisi nabanye.
Noko ke, namhlanje abanye abantu abaselula abakrelekrele bakhetha ukungasoloko bephumelela esikolweni ngenxa yokoyika ukugculelwa. Abanye bavakalelwa kukuba “ukuba krelekrele kukwenza ‘ungathandwa’ ngabanye.” Ngaba ukuba nembono yokomoya kunokukunceda kule nkalo? Ngokuqinisekileyo kunokukunceda! EyabaseKolose 3:23 ithi: “Nayiphi na into eniyenzayo, yenzeni ngomphefumlo uphela ngokungathi niyenzela uYehova, kungekhona abantu.” Ngaba ikho enye into enokukwenza usebenze nzima ngaphezu kokufuna ukwanelisa uThixo? Ukuba naloo mbono kunika ubani amandla okumelana nempembelelo yoontanga engakhiyo.
Fundisa Abantwana Ukuba Bathande Ukufunda
Ukukwazi ukufunda nokubhala kubaluleke gqitha—kwimfundo yehlabathi nakwimfundo yokomoya. Abazali banokwenza abantwana babo bakuthande ukufunda ngokubafundela besebancinane. UDaphne, ongumhloli-zimpazamo uyayivuyela kakhulu into yokuba abazali bakhe babemfundela rhoqo ngoxa wayeselusana. Uthi: “Bandenza ndakuthanda ukufunda. Ngenxa yoko, ndandisele ndikwazi ukufunda ngaphambi kokuba ndiqalise isikolo. Abazali bam bandifundisa nokuzenzela uphando ukuze ndikwazi ukufumana iimpendulo kwimibuzo endinayo. Ingqeqesho yabo iyandinceda nanamhlanje.”
Kwelinye icala, uHolt ocatshulwe ekuqaleni ulumkisa ngelithi ukufundela abantwana nje kukodwa “akubenzi bakuthande ukufunda.” Uthi: “Ukuba umzali akakunandiphi ukufunda okanye umntwana akakunandiphi ukufundelwa, loo nto idala umonakalo kunokuba ibe luncedo. . . . Kwanabantwana abakuthandayo ukufundelwa . . . abakunandiphi xa umzali engakunandiphi.” Ngenxa yoko, lo kaHolt ucebisa ukuba abazali bakhethe iincwadi abazithandayo bakhumbule ukuba abantwana basenokufuna ukuba zifundwe ngokuphindaphindiweyo ezo ncwadi! Iincwadi ezimbini izigidi zabazali ehlabathini lonke eziye zakuvuyela ukuzifundela abantwana bazo yethi Funda Kumfundisi Omkhulu nethi Incwadi Yam Yamabali EBhayibhile, ezipapashwe ngamaNgqina kaYehova. Ekubeni zilungiselelwe abantwana ngokukhethekileyo, ezi mpapasho zinemizekeliso emininzi, zibangela ubani acingisise nzulu yaye zifundisa imigaqo kaThixo.
UTimoti, umKristu wenkulungwane yokuqala wakhuliswa ngunina noninakhulu ababenomdla wokuba afunde, ingakumbi izinto zokomoya. (2 Timoti 1:5; 3:15) UTimoti wakhula waba ngumntu okwaziyo ukusingatha iimbopheleleko nonokuthenjwa—iimpawu umntu angenakuzifunda kwimfundo yehlabathi kuphela. (Filipi 2:19, 20; 1 Timoti 4:12-15) Nanamhlanje, emabandleni amaNgqina kaYehova ehlabathini lonke kukho ulutsha oluninzi—abafana neentombi—olufana “noTimoti” olufundiswa ngabazali abanothando nabanoxabiso ngezinto zokomoya.
Fundisa Ngehlombe!
Indlela amele afundise ngayo umfundisi-ntsapho ukuze abafundi bakuthande ukufunda “inokushwankathelwa nje ngegama elinye—ihlombe,” itsho njalo incwadi ethi Eager to Learn. “Ngobukho nje babo, abafundisi-ntsapho abafundisa ngehlombe babonisa ukuba bayayithanda into abayifundisayo yaye olo thando lubonakala kwindlela abafundisa ngayo.”
Noko ke, asingabo bonke abazali okanye abafundisi-ntsapho abafundisa ngehlombe. Ngoko abafundi abalumkileyo baba nomdla kwimfundo, bayazi ukuba ukufunda kuyimbopheleleko yabo. Ngapha koko, le ncwadi ikhankanywe ngasentla ithi “akukho mntu uza kusoloko ejongene nabantwana bethu ubomi bakhe bonke, ebanunusa ngokufunda, ebacela ukuba benze izinto ngokucokisekileyo, basebenzise ingqiqo nokuba bafunde ubuchule.”
Kwakhona, oku kugxininisa ingongoma yokuba imilinganiselo efanelekileyo ifundwa ekhaya kungekhona esikolweni. Bazali, ngaba ninomdla kwimfundo yabantwana benu? Ngaba abantwana bakho bafunda ngokukhululekileyo xa besekhaya yaye ngaba uyabafundisa imilinganiselo yokomoya? (Efese 6:4) Khumbula ukuba, umzekelo wakho nemfundiso yakho ziya kuba nempembelelo kubantwana bakho naxa sele begqibile ukufunda bengasahlali ekhaya.—Bona ibhokisi ethi “Iintsapho Eziphumelelayo Ukufunda,” kwiphepha 23.
Qonda Ukuba Abantu Bafunda Ngeendlela Ezahlukahlukeneyo
Abekho abantu abanengqondo efanayo; mntu ngamnye ufunda ngendlela yakhe. Into emlungelayo omnye umntu isenokungamlungeli omnye. Ngenxa yoko, kwincwadi yakhe ethi A Mind at a Time, uGqr. Mel Levine uthi: “Ukuphatha abantwana ngendlela efanayo, kukubadlel’ indlala. Abantwana bafunda ngeendlela ezahlukahlukeneyo; yaye mntwana ngamnye unelungelo lokufunda ngendlela yakhe.”
Ngokomzekelo, abanye abantu bafunda lula baze bazigcine izinto xa bebona imifanekiso. Bambi bakholwa kukuzifundela okanye bayixelelwe into—okanye zombini ezi ndlela. OkaLevine uthi: “Ukuyitshintsha inkcazelo kusenokuba luncedo. Ukuba ngumfanekiso, wucacise ngamazwi, ukuba yinkcazelo ebhaliweyo, yenza umfanekiso wayo.” Oku kwenza ukufunda kungabi neengenelo nje kuphela, kodwa kutsho kunandipheke.
Kakade ke, kufuneka uhlole ukuba yiyiphi indlela ekulungelayo. UHans, umlungiseleli wexesha elizeleyo ongumKristu wayeqhuba isifundo seBhayibhile noGeorge, indoda eyayisele ikhulile ngeminyaka eyayingafundanga kangako. Kwakunzima ukuba uGeorge aziqonde aze azigcine izinto awayezifunda. Ngoko ukuze acacise iingongoma ezibalulekileyo, uHans wagqiba kwelokuba azizobe. UHans wathi: “Kwatsho kwakhanya kuGeorge. Eneneni, naye wamangaliswa yindlela awayeziqonda nawayezigcina ngayo izinto awayezifunda! Emva kokuqonda indlela esebenza ngayo ingqondo yakhe, ndatsho ndabona ukuba ukrelekrele kunokuba bendicinga. Watsho waba ngumntu ozithembayo yaye wayesoloko ekhangele phambili kwisifundo esilandelayo kunokuba kwakunjalo ngaphambili.”
Umntu Ufunda Ade Akhokhobe
Incwadi ethi Inside the Brain ithi: “Amandla engqondo axhomekeke ekusetyenzisweni kwayo. Ingqondo engasetyenziswayo iba buthuntu, kuba ingqondo isoloko ilungele ukufunda izinto ezintsha.” Kwale ncwadi ithi: “Kanye njengokuba ukulolonga umzimba kusenza umntu adlamke naxa sele ekumashumi asixhenxe namashumi asibhozo eminyaka ubudala, abaphandi bathi xa ingqondo yomntu omdala isoloko isebenza, ayibi buthuntu. Bekusoloko kucingwa ukuba ngokuhamba kwexesha, ingqondo yabantu abadala iba buthuntu. Kodwa uphando lwakutshanje lubonise ukuba [oku] kwenziwa yinto yokuba abantu balindela ukuba ingqondo ibe buthuntu baze bangayisebenzisi. Ngapha koko, bekusoloko kucingwa ukuba suku ngalunye, iiseli zengqondo ziyayeka ukusebenza njengoko umntu ekhula kodwa oku akunjalo.” Ukungasebenzi kwengqondo okuphawulekayo kudla ngokubonisa ukuba umntu unesifo esithile, kuquka isifo sentliziyo.
Kuyavunywa ukuba njengoko umntu ekhula, umlinganiselo wokusebenza kwengqondo uyehla kodwa hayi ngendlela ephawulekayo. Abaphandi bathi xa umntu eyisebenzisa ingqondo ayikhawulezi ibe buthuntu—ingakumbi ukuba ulolonga umzimba rhoqo. “Okukhona umntu efunda izinto ezininzi, kokukhona ingqondo yakhe ibamba izinto ezininzi. Ingqondo esoloko isebenza, iyakwazi ukugcina izinto ezininzi,” itsho incwadi ethi Elderlearning—New Frontier in an Aging Society.
Oku kwangqinwa luphando olwenziwa eOstreliya kangangeminyaka engama-20 kubantu abaneminyaka engama-60 ukusa kwengama-98 ubudala. Umlinganiselo wobukrelekrele babo wawusihla ngesi-1 ekhulwini kuphela ngonyaka. Noko ke, “kwabanye abantu, kuquka abo bakwiminyaka yamashumi asithoba ubudala, awuzange uhle kwaphela,” itsho njalo le ngxelo. “Oku kwenzeka kubantu abasoloko befunda izinto ezintsha, kuquka ukufunda ulwimi lwasemzini okanye ukufunda ukudlala isixhobo somculo.”
UGeorge, ocatshulwe ngaphambili wayekuma-70 eminyaka ubudala ukuqalisa kwakhe ukufunda iLizwi likaThixo. Ngokufanayo, uVirginia, ngoku okuma-80 eminyaka ubudala nomyeni wakhe owafayo uRobert, baqalisa ukufunda iBhayibhile sele baluphele. UVirginia uthi: “Nangona amehlo akhe ayesele enorhatyazo, uRobert wayenikela iintetho ezimfutshane ezisekelwe eBhayibhileni kwiHolo yoBukumkani esebenzisa ulwandlalo awayelufunda de alwazi ngentloko. Mna ndandingakuthandi ukufunda, kodwa ngoku ndiyakuthanda. Kanye ngale ntsasa ndiye ndafunda inkupho kaVukani! ndayigqiba.”
UGeorge, uRobert noVirginia yimizekelo nje emithathu yabantu abakhulileyo ngeminyaka abangafuniyo ukuphenjelelwa yingcamango eqhelekileyo, abayisebenzisa ngokupheleleyo ingqondo yabo. Uphando lubonisa ukuba engqondweni, ukuchitha iminyaka engama-70 okanye engama-80 ufunda kufana nokugalela ithontsi lamanzi emgqomeni omkhulu—akwenzi mahluko ungako. Kutheni ingqondo ikwazi ukufunda izinto ezininzi kangaka?
[Ibhokisi/Umfanekiso okwiphepha 20, 21]
I-Internet Nomabonwakude—Ngaba Ziluncedo Okanye Zidala Umonakalo?
“I-Internet iluncedo ukanti kwangaxeshanye ibangela umonakalo,” itsho njalo incwadi ethi A Mind at a Time. Ukufumana inkcazelo ethile kunokuba luncedo, kodwa le ncwadi ithi abanye abafundi basuka nje “bakhuphele inkcazelo ngobunjalo bayo bengayiqondi okanye bengakhange bayithelekise nolwazi abanalo. Ngenxa yoko, umntu usenokungaqheli ukufunda okanye aqhele ukuthabatha ingcamango zomnye umntu azenze ezakhe.”
Abaphengululi bathi, ukuchitha ixesha elininzi ubukele umabonwakude kunokubangela ungabi nabuchule bokucombulula iingxaki nobokuphulaphula, ungabi nengqondo ephangaleleyo yaye ungakwazi ukuzimela. “Kanye njengokuba icuba libhalwa ubungozi balo, noomabonwakude bafanele babhalwe ukuba bayingozi,” itsho njalo incwadi ethi Eager to Learn.
Enye incwadi ithi eyona nto bayifunayo abantwana “kukufunda, ukuncokola, ukuthandwa nokwangiwa ngokufudumeleyo.”
[Ibhokisi/Imifanekiso ekwiphepha 23]
Iintsapho Eziphumelelayo Ukufunda
Ezi zinto zilandelayo zinokuyinceda intsapho yakho iphumelele ekufundeni:
◼ Ukubaxelela rhoqo nangothando abantwana bakho ukuba ulindele lukhulu kubo
◼ Ukugqala ukusebenza nzima njengeyona nto ibalulekileyo ukuze umntu aphumelele
◼ Ukuzigcina nixakekile
◼ Ukuqeqesha abantwana ukuba veki nganye bachithe ixesha elininzi befunda ekhaya, benze umsebenzi wesikolo owenzelwa ekhaya, bafunde ngenjongo yokuzonwabisa, bazihlaziye, benze izinto njengentsapho nokubaqeqesha ukuba benze eminye imisebenzi yasekhaya
◼ Ukugqala intsapho njengowona mthombo wenkxaso nendawo umntu anokubhenela kuyo xa enengxaki
◼ Ukubaxelela abantwana into elindelekileyo kubo nokuqinisekisa ukuba bayakwenza oko kulindelekileyo kubo
◼ Ukunxibelelana rhoqo kwabazali nabafundisi-ntsapho
◼ Ukubethelela ukubaluleka kokukhula ngokomoya
[Umfanekiso]
Bazali, ngaba nifundisa abantwana benu ukuba bakunandiphe ukufunda?
[Inkcazelo]
La macebiso athatyathwe kwincwadi ethi Eager to Learn—Helping Children Become Motivated and Love Learning.
[Ibhokisi/Imifanekiso ekwiphepha 24, 25]
Ukuphucula Indlela Yokufunda Nokukwenza Kunandipheke
Yiba Nomdla Kulula ukufunda into onomdla kuyo. Incwadi ethi Motivated Minds—Raising Children to Love Learning ithi: “Abaphandi bafumanise ukuba xa abantwana beyithanda into abayifundayo, banikel’ ingqalelo engakumbi yaye loo nto iyabetheleleka ezingqondweni zabo. Bayifunda rhoqo, ngeendlela ezahlukahlukeneyo yaye baba nomdla wokwenza izinto eziza kubenza bacingisise nzulu.”
Nxibelelanisa Into Oyifundayo Nezinto Eziqhelekileyo Umbhali okwangumfundisi-ntsapho uRichard L. Weaver II wabhala wenjenje: “Abantwana baziqonda lula izinto abazifundayo esikolweni xa zinxityelelaniswa nezinto abaziqhelileyo, kutsho kukhanye kubo.”
Zama Ukufumana Umongo Wento Oyifundayo Xa abantu befuna ukwazi into ethile, bacingisisa nzulu ngayo yaye itsho ibetheleleke engqondweni. Ukuyifunda ngokuphindaphindiweyo into kunokuba luncedo, kodwa oko akuthethi kuthi akufanelanga ufune umongo wayo. IMizekeliso 4:7, 8 ithi: ‘Kunye nako konke oko ukuzuzayo, zuza ukuqonda. Kuhloniphe kakhulu, kwaye kuya kukuphakamisa.’
Nikel’ ingqalelo “Undoqo ekufundeni kukunikela ingqalelo,” itsho njalo incwadi ethi Teaching Your Child Concentration. “Kubaluleke gqitha kangangokuba kude kuthiwe yeyona nto yenza umntu abe krelekrele kanti kude kuthiwe bubulumko ngokwabo.” Umntu unokukufunda ukunikel’ ingqalelo. Undoqo kukuba uqale ngokufunda ixesha nje elifutshane uze ulandise ngokuthe ngcembe.
Wushwankathele umbandela “Abona bafundi baphumelelayo ngabafundi abanobuchule bokushwankathela umbandela,” utsho uGqr. Mel Levine kwincwadi yakhe ethi A Mind at a Time. Ukuwushwankathela umbandela kuwenza ube mfutshane kuze kube lula ukuwukhumbula. Kunokuba babhale yonk’ into ethethwayo, abantu abanobuchule ekuthabatheni amanqaku basebenzisa lo mgaqo.
Nxibelelanisa izinto Kwincwadi ethi The Brain Book, uPeter Russell ufanisa izinto ezisengqondweni namasebe akhula kwamanye. Ngamafutshane, uzikhumbula lula izinto xa uzinxibelelanisa nolwazi osele unalo. Uzikhumbula lula ngakumbi xa uzinxibelelanisa nezinto ezininzi.
Zenzele Umfanekiso-ngqondweni Imifanekiso iyabetheleleka engqondweni. Ngoko ukuba kunokwenzeka, zenzele umfanekiso-ngqondweni wento oyifundayo. Iingcali ngokusebenza kwengqondo zidla ngokwenza imifanekiso-ngqondweni ebaxiweyo xa zifuna umntu akhumbule.
Yenza impinda Kwiiyure nje ezingama-24 sinokulibala ama-80 ekhulwini ezinto esizifundileyo. Siyikhumbula lula into esiyifundileyo ukuba sisenza impinda emfutshane xa sigqiba ukufunda, siphinde siyenze emva kosuku, emva kweveki, emva kwenyanga nasemva kweenyanga ezintandathu sinokude sikhumbule malunga ne-100 ekhulwini laloo nto besiyifunda.
[Imifanekiso ekwiphepha 24]
Abazali bafanele basebenzisane nabafundisi-ntsapho ekufundiseni abantwana
[Imifanekiso ekwiphepha 26]
Ukwaluphala akufanelanga kukuyekise ukufunda