Ezona Zinto Zokudlala Zibhetele

Ndifanele ndimthengele izinto zokudlala ezinjani umntwana wam? Ndifanele ndichithe imali engakanani kuzo? Ukuba ungumzali, kusenokwenzeka ukuba wakha wazibuza le mibuzo izihlandlo eziliqela. Okuvuyisayo kukuba ezona zinto zokudlala zibhetele zibiza imali encinane.

“Abantwana bangenelwa ngakumbi xa bezenzela izinto kunokuba bahlale nje baze babukele, ngoko bathanda ukudlala ngezinto ezifuna basebenzise ingqondo kunokudlala ngeemoto ezihamba ngombane okanye oonodoli abakwazi ukuthetha ekungekho nto ingako banokuyenza ngabo,” itsho njalo incwadi ethi Motivated Minds—Raising Children to Love Learning. “Ekuqaleni, basenokukunandipha ukudlala ngezo zinto, kodwa bakhawuleza baphelelwe ngumdla kuzo ekubeni bengakwazi ukwenza izinto ezahlukahlukeneyo ngazo.”

Kuxhomekeka ukuba umntwana ungakanani, izinto anokudlala ngazo eziza kumenza asebenzise ingqondo ziquka izitena zokudlala, iibhokisi ezingenanto, amaphepha, izinto zokuzoba kunye nesanti namanzi. Incwadi ethi Motivated Minds ithi: “Izinto zokudlala ezincinane, njengezilwanyana zasekhaya zinika [umntwana] ithuba lokuba azidibanise ngeentlobo zazo nokuba azithelekise, ukanti zimnika nethuba lokuba abalise amabali yaye oko kubangela aphucule ubuchule bakhe bokuthetha.” Le ncwadi ikwacebisa ukuba badlale ngezixhobo zomculo ezincinane—ukuba uza kukwazi ukumelana nengxolo yazo—kuba oku kubenza baqhelane nezandi.

Abantwana bayathanda ukuthelekelela izinto yaye banomdla wokufunda nokudlala. Ngoko kutheni ungabancedi kuzo zontathu ezi nkalo ngokuzikhetha ngobulumko izinto zabo zokudlala.